Jehowa ka Kuma mafilɛ don o don!

¹ Tile o tile bɛ gɛlɛya kuraw lase i ka dannaya ma. A dɔ rɔ, i dɔnbaga dɔ, n’o ye diɲɛmɔgɔ ye, o bɛ k’i digi ko fo i ka taa sufɛɲɛnajɛ dɔ la. I ka lakɔli karamɔgɔ b’a fɛ i ka tugu baara sira dɔ la, walima i ka baaratigi b’a fɛ i ka lɛrɛ caman kɛ baarakɛyɔrɔ la. A bɛ se ka kɛ ko dɔ bɛ ka bɔ i ka kɛnɛya la. Hali n’o gɛlɛya suguw bɛ se k’i sɔrɔ waati o waati la, i k’a dɔn k’i kelen tɛ. Jehowa labɛnnen don ka hakilitigiya di i ma, i mago bɛ hakilitigiya min na walasa k’o kow kunbɛn. Ka Bibulu tɛmɛsira, ni “Examinons les Écritures” (An ka Sɛbɛnniw sɛgɛsɛgɛ) ɲɛfɔliw mafilɛ, o ye fɛɛrɛ kelen ye min sababu fɛ i bɛ se k’i niyɔrɔ sɔrɔ Ala ka kuma na tuma bɛɛ. Yali i bɛ nafa sɔrɔ o fɛɛrɛ in na wa?

² Dɛmɛ bɛ sɔrɔ: Esayi 30:20 bɛ Jehowa jira iko “Karamɔgɔba.” Ala ka jamakulu bɛ se ka ɲɛsin a ma ka dɛmɛ ɲini. A bɛ fɛn di i ma, i mago bɛ min na walasa ka gɛlɛyaw kɛlɛ, gɛlɛya minnu bɛ se i ka dannaya ma. Cogo di? Tɛmɛsira nata b’a ɲɛfɔ ko: “I tulo na kuma mɛn i kɔfɛ, ko: ‘Sira filɛ nin ye, aw ka o taama’ ” Bi fana, Jehowa b’a ka “kuma” ci Sɛbɛnniw, ani ‘jɔnkɛ dannamɔgɔ’ ka sɛbɛnw fɛ. (Mat. 24:45) Hakilitigiya nafolo bɛ sɔrɔ La Tour de Garde barokun tɛmɛnenw kɔnɔ. Barokunw don minnu bɛ Krecɛn ka ɲɛnamaya ɲɛ kelen kelen bɛɛ kan. Minnu kofɔlen bɛ “Examinons les Écritures” kɔnɔ, k’olu mafilɛ, o b’i dɛmɛ ka dɔnniya caman fara ɲɔgɔn kan minnu nafa ka bon kosɛbɛ, wa u bɛna i dɛmɛ fana ka gɛlɛya sugu bɛɛ ko ɲɛnabɔ.​—Esa. 48:⁠17.

³ Waati boloda o kama: Hali n’a y’a sɔrɔ sɔgɔmada ye waati ye a bolo degunnen bɛ waati min na, muso dentigi dɔ y’a fɔ k’a ye kuntilenna sigi walasa an’a denkɛ bɛ daraka dun tuma min na, u ka Bibulu tɛmɛsira ni ɲɛfɔliw kalan, ka baro kɛ u kan. O kuma ninnu, ka fara deliliw kan, olu de ye kuma labanw ye a bɛ minnu mɛn sɔgɔma o sɔgɔma sanni a ka taa lakɔli la. O kumaw ye fanga di a ma, k’a kologɛlɛya jɛnɛya kow ɲɛ, ka to tilennenya la faso lafasakow la, ka jagɛlɛya seereya di a kalankɛɲɔgɔn n’a karamɔgɔw fana ma. Hali k’a sɔrɔ ale kelen de tun ye seere ye u ka lakɔli la, a ma a yɛrɛ ye kelen ye abada.

⁴ I ɲɛsin Jehowa n’a ka kuma ma walasa a k’i ɲɛminɛ, k’i bilasira. N’i b’o kɛ, Ala bɛna kɛ lakika ye i bolo i n’a fɔ i teri dannamɔgɔ dɔ. I ɲɛsin a ma don o don! E, ni mɔgɔ miliyɔn caman wɛrɛw, aw minnu bɛ Ala ka kuma lajɛ don o don diɲɛ kɔnɔ, a ka se ka kɛ aw bolo, iko ni ‘aw ɲɛ bɛ aw dabagaba la.’