An ka Cidenyabaara— Kanuya sɛbɛ dankɛnɛmayali
1 An ka cidenyabaara fɛ, an b’a jira k’an bɛ cifɔlenw bɛɛ la belebeleba fila labato (Mat. 22:37-39). Jehowa kanuya min b’an na, o b’an bila ka kuma ale ko la ni ŋaniya ɲuman ye. An mɔgɔɲɔgɔn kanuya b’an bila ka dusu don u la ka Ala sago ani a ka kuntilennaw dɔnniya ɲini walisa, an cogo la, u ka se ka sara sɔrɔ: ɲɛnamaya banbali. Ani fana, an ka cidenyabaara fɛ, an bɛ Jehowa tɔgɔ karama ani ka Masaya jigiya sɔngɔntan tila n’an mɔgɔɲɔgɔnw ye. Ɔwɔ, an ka cidenyabaara ye kanuya sɛbɛ dankɛnɛmayali ye ka ɲɛsin Ala ni mɔgɔ ma.
2 An ka kanuya b’an bila ka kuma mɔgɔ sugu bɛɛ fɛ, yɔrɔ sugu bɛɛ la (1 Kɔr. 9:21-23). Misali la: k’a to sannakurun dɔ kɔnɔ, Krecɛn maakɔrɔ dɔ y’i sigi katoliki mɔnpɛrɛkɛ dɔ kɛrɛ fɛ. Maakɔrɔ y’i sara mɔnpɛrɛkɛ la ka ɲininkali damadɔw kɛ a la ni fɛɛrɛ ye, ka tila ka baro kunsin Masaya ma. Tuma min na mɔnpɛrɛkɛ bɛ jigin ka bɔ sannakurun kɔnɔ, a sɔnna an ka gafe fila la. Maakɔrɔ ka mɔgɔɲɔgɔn kanuya dankɛnɛmayali kɔ kɛra hɛrɛ ye!
3 Kanuya b’an bila ka waajuli kɛ: Minnu bɛ don tutigɛbaga farankan ani tutigɛbaga basigilen baara la, tiɲɛ yɛrɛ la olu bɛ kanuya sɛbɛ dankɛnɛmaya ka ɲɛsin Ala ni u mɔgɔɲɔgɔn ma. Tutigɛbagaw bɛ jɛn u ka waati n’u fanga kɔ tuma bɛɛ ka tɔw dɛmɛ hakili ta fan fɛ. Mun de b’u bila k’o kɛ? Tutigɛbaga kelen ko: “Ne b’a dɔn ko kanuya ye Ala ka hakili den ye. N’ale tɛ, ne tun tɛna sɔrɔ tiɲɛ na ban, kuma tɛ ka tutigɛbagaya ma. Kanuya de b’a to n’bɛ mɔgɔw jate k’u magow dɔn, wa n’y’a ye k’u bɛ sɔmi kanuya la.” Yesu tun ye o kanuya ɲɔgɔnna de jira mɔgɔw la. Siɲɛ dɔ la, tuma min na ale n’a ka kalanden sɛgɛnnenw taara yɔrɔ dɔ la ‘u dan na’ walisa k’u lafiɲɛ dɔɔnin, jamabaw taara yen ka kɔn u ɲɛ. Yesu tun ye mun kɛ? “U hinɛ donna a la,” a ye a yɛrɛ magow bila kɛrɛ fɛ “ka u kalan fɛn caman na.”—Marka 6:30-34.
4 Hali ni mɔgɔw b’u ban kibaru duman na an bɛ min kofɔ u ye, an bɛ nisɔndiya dunba sɔrɔ, an kɛtɔ k’a dɔn ko kanuya y’an bila k’an seko kɛ k’u dɛmɛ ka kisili sɔrɔ. Tuma min na Krista bɛna kiritigɛ an bɛɛ kan kaban, an na kɛ hɛrɛ lakika la k’a masɔrɔ an y’an ka kanuya sɛbɛ dankɛnɛmaya an kɛlen ka ‘an ka cidenyabaara kɛ k’a dafa.’—2 Tim. 4:5.