KALANSEN 13

Kalan waleya cogo labɔ ka jɛya

Ntalenw 3:21

BAKURUBAFƆLI: I lamɛnbagaw dɛmɛ u k’a faamu i ka barokun bɛ nɔ bila u ka ɲɛnamaya la cogo min na, ani u bɛ min kalan, a jira u la u bɛ se ka o waleya cogo min na.

I BƐ SE KA O KƐ COGO MIN NA:

Miiri i lamɛnbagaw la. I bɛna kunnafoni min di, kun min na i lamɛnbagaw mago bɛ o la, i hakili jagabɔ o kan, barokun yɔrɔ kɛrɛnkɛrɛnnen min bɛna u dɛmɛ, o jateminɛ.
I ka barokun kɔnɔna na, a jira i lamɛnbagaw la u ka kan ka min kɛ. Kabini a daminɛ na, i lamɛnbaga kelen kelen bɛɛ ka kan k’a fɔ a yɛrɛ kɔnɔ ko: ‘Nin ko in bɛ ne kun kan’. Yɔrɔ koloma kelen kelen bɛɛ walawalatɔ, olu waleya cogo jira. Kana kuma fɔ min jɛlenba tɛ.

Baro kɛ Bibulu sariyakolow waleya cogo kan ni kanuya ye ani o kɛ cogo la min b’a jira i lamɛnbagaw la ko u bɛ cogo min na, ko i bɛ o faamu. Sani i ka mɔgɔ tɔw dusu kasi i kɛtɔ ka u jalaki, u ka kanuya ni u ka dannaya kologɛlɛya, i dalen a la ko u dusukun bɛna u bila ka ko tilennen sira taama.