KALANSEN 11

Kuma ni nisɔndiya ye

Romɛkaw 12:11

BAKURUBAFƆLI: I lamɛnbagaw bila ka wale kɛ ani ka dusu don u kɔnɔ i kɛto ka kuma ni kunkɛnɛya ye.

A to barokun ka nɔ bila i dusukun na. Ni i bɛ ka i labɛn walasa ka i ka barokun kɛ, i bɛna cikan min lase, nafa min bɛ o la, i ka i hakili jagabɔ kosɛbɛ o kan. A ɲini ka i ka barokun dɔn ka ɲɛ, o b’a to i ka se ka kuma ni kɔnɔnajɛya ye.
Miiri i lamɛnbagaw la. I bɛna barokun min kalan walima ka mɔgɔw kalan o min na, o bɛna mɔgɔ tɔw nafa cogo min na i hakili jagabɔ o kan. Cogo minnu bɛ yen walasa ka o barokun walawala olu sɛgɛsɛgɛ, o la i ka a walawala cogo la min bɛna a to i lamɛnbagaw k’a dɔn k’a jɛya u bɛ se ka nafa bɔ a la cogo min na.
Ni don i ka barokun na. Kuma ni kunkɛnɛya ye. I bolow lamaga cogo la iko i yɛrɛ bɛ deli k’a kɛ cogo min na i ka barow kɔnɔna na, ani i ɲɛda kɛcogo ka kɛ ni kɔnɔnajɛya ye walasa ka i dusukunnataw jira.

I jija i kana i lamɛnbagaw hakili bɔ i ka barokun kan i kɛtɔ ka to ka segin segin bolow lamaga cogo kelen kan iko delinanko, kɔrɔ foyi tɛ min na. I bolow lamaga cogow la, kɔrɔ bɛ minnu na. Nisɔndiya jira fɔlɔ ni i bɛna mɔgɔw kalan yɔrɔ kolomaw la ani ka dusu don i lamɛnbagaw kɔnɔ u ka wale kɛ. I ka barokun kɔnɔna na, kana a to a ka nege bɔ i lamɛnbagaw la i kɛtɔ ka nisɔndiya jira k’a dama tɛmɛn.