KALANSEN 10

Kumakan yɛlɛn-ka-jigin

Ntalenw 8:4, 7

BAKURUBAFƆLI: Hakilinaw labɔ cogo jɛlen na ani ka dusukunnataw labɔ fana i kɛtɔ ka i ka kumakan hakɛ, i kumacogo ani i ka kuma bolisen yɛlɛmayɛlɛma.

I BƐ SE KA O KƐ COGO MIN NA:

I ka kumakan hakɛ yɛlɛmayɛlɛma. Dɔ fara i ka kumakan hakɛ kan walasa ka yɔrɔ kolomaw da kɛnɛ kan ani ka dusu don i lamɛnbagaw kɔnɔ. O ɲɔgɔn kelen kɛ ni i bɛ ka Bibulu tɛmɛsira dɔ kalan kiritigɛ kofɔlen bɛ min kɔnɔ. Dɔ bɔ i ka kumakan hakɛ la walasa ka i ka baro nege don mɔgɔw la walima ka siran ani kɔnɔganko jira.

Kana dɔ fara i ka kumakan hakɛ kan ka caya fɔ i lamɛnbagaw k’a miiri ko i bɛ ka u kɔrɔfɔ. K’a dama tɛmɛn fɔ ka mɔgɔw hakili sama ka na i yɛrɛ kan, i yɛrɛ tanga o ma.
I kumacogo yɛlɛmayɛlɛma. I kumacogo yiriwa walasa ka nisɔndiya jira walima ka kundama hakɛ ani furancɛ janya jira, ni o bɛnnen don aw ka kan na. I kumacogo jigin walasa ka dusukasi walima kɔnɔganko jira.
I ka kuma bolisen yɛlɛmayɛlɛma. I ka kuma teliya kosɛbɛ walasa ka mɔgɔw bila u ka wale kɛ. I ka kuma sumaya kosɛbɛ ni i bɛ ka yɔrɔ nafamaw kofɔ.

I jija i kana i lamɛnbagaw kabakoya, i kana sin ka i ka kuma bolisen yɛlɛma yɔrɔnin kelen. Kana kuma teliya kojugu fɔ k’a kɛ ko mɔgɔw tɛ i ka kuma faamu ka d’a kan i ka kuma jɛlen tɛ.