Limaniya lakika bɛ na ni hɛrɛ banbali ye

“MƆGƆ tilennen na ɲɛnamaya dannaya de barika la.” Kitabu ko ten. (Romɛkaw 1:17) O kuma bɛ dakabana layidu dɔ kan, min bɛ i ɲɛkɔrɔ. Sira jumɛn fɛ?

Yesu tilalen kɔ a ka baara la dugukolo kan, a yɛlɛnna sankolo la Ala kɛrɛ fɛ. Ka a ka kalandenw ɲɛ to a la, “a kɔrɔtara, . . . a donna sankaba la, u m’a ye tun.” (Kɛwalew 1:9) Ala y’a kɛ masakɛ ye sankolo la. Sɔɔni, “Mɔgɔ Denkɛ” Yesu bɛ “na ni a nɔɔrɔ ni a ka mɛlɛkɛw bɛɛ ye, a na sigi a ka masasigilan nɔɔrɔma kan. Siyaw bɛɛ na lajɛ a ɲɛ kɔrɔ. A na u fara ka bɔ ɲɔgɔn na, i ko bagangɛnna bɛ a ka sagaw ni a ka baw fara ka u bɔ ɲɔgɔn na cogo min na.” (Matiyu 25:31, 32) O bɛna kɛ tuma jumɛn?

Kitabu y’a fɔ ka tɛmɛ ko waati bɛ na, diɲɛ bɛna ɲagami fan bɛɛ la. O ye taamasyɛn ye k’a dɔn ko Masiya bɛna siyaw kiri tigɛ sɔɔni. Yesu ye o taamasyɛn kɔnɔko dɔw fɔ, ko: “Siya dɔ na wuli siya dɔ wɛrɛ kama. Masaya dɔ na wuli masaya dɔ wɛrɛ kama. Dugukolo yɛrɛyɛrɛbaw na kɛ yɔrɔ dɔw la, fiɲɛbanaw ni kɔngɔbaw na kɛ yɔrɔ caman na. Siran kobaw ni taamashyɛnbaw na ye ka bɔ sankolo la.”—Luka 21:7, 10, 11.

Yesu tun ye min fɔ, o de bɛ ka kɛ an ɲɛ na bi. A tɛ mɛn, a bɛna mɔgɔjuguw halaki. Hali Sitanɛ yɛrɛ bɛna laban ka halaki. Dugukolo fan bɛɛ bɛna kɛ alijinɛ ye. Hɛrɛ bɛna kɛ mɔgɔw ni ɲɔgɔn cɛ ani mɔgɔw ni baganw cɛ. “Suruku ni sagaden na kɛ sigiɲɔgɔnw ye. Waraninkalan ni baden na da ɲɔgɔn kɛrɛ fɛ. Misiden ni warabaden ani misiba na balo ɲɔgɔn fɛ. Denmisɛn na kɛ u gɛnbaa ye. Fɛn si tɛna tɔɔrɔ wala tiɲɛni kɛ.” (Esayi 11:6, 9) “O dugu mɔgɔw si tɛna a fɔ ko ale man kɛnɛ. . . . O tuma la fiyentɔw ɲɛw na yɛlɛ, tulo gerenw tulow na yɛlɛ.” (Esayi 33:24; 35:5, BS) Hali mɔgɔ salenw bɛna lakunun. Jehova na “ɲɛji bɛɛ cɛ ka bɔ u ɲɛw la,” wa “saya tɛna kɛ tun, su kasi fana tɛna kɛ tun, wala kasikan wala dimin.” (Esayi 25:8; Jirali 21:4) Ala sagonata tun ye min ye ka ɲɛsin dugukolo ma, o bɛna tiimɛ. O bɛna kɛ dakabanakoba ye!

To ka dɔ fara i ka limaniya kan

Ala bɛna mɔgɔ minnu sara ni alijinɛ ye, o dan ye limaniyatigiw ye, limaniya lakika bɛ minnu na.

I hakili jigin a la ko limaniya lakika sinsinnen bɛ dɔnniya jɔnjɔn de kan ka bɔ Ala ka Kuma kɔnɔ. O la, i ka ta’a fɛ k’a ɲini ka Ala dɔn kosɛbɛ, ani Yesu.

Limaniya lakika bɛ na ni wale tilennenw ye. Ala ka Kuma ko: “Dannaya salen don ni kɛwalew tɛ.” (Yakuba 2:26) N’i tora ka o wale ɲumanw kɛ, koba minnu bɛ Ala la, o na ye i la. O ye barika ni tilennenya ni hakilitigiya ni kanuya ye. I jija ka o ko ɲumanbaw sɛnɛ i la ka taa ɲɛ.

N’i ye limaniya lakika mara, o bɛna dugawu caman lase i ma. Tiɲɛ na, o de ye i ka ɲɛnamaya hɛrɛ gundo ye, kabini sisan fo abada!