Ala ye teri sɛbɛ ye i ma deli ka min ɲɔgɔn sɔrɔ fɔlɔ

I ma deli ka ko ɲuman min ɲɔgɔn dɔn diɲɛ na, o ye Ala ka teriya ye. Ala bɛna i kalan hɛrɛ ni lafiya sɔrɔcogo la. A bɛna i hɔrɔnya ka bɔ kɛwale juguw la ani dannayakow la minnu tɛ tiɲɛ ye. A bɛna i ka deliliw lamɛn, k’i dɛmɛ walasa i k’i hakili latigɛ, ka dannaya sɔrɔ. (Zaburu 71:5; 73:28) A bɛna i dɛmɛ kɔnɔnafili waati la. (Zaburu 18:18) Ala bɛ ɲɛnamaya banbali ni i la.— Romɛkaw 6:23.

Ikomi i bɛ gɛrɛ Ala la, i bɛna gɛrɛ a teriw la. Olu fana bɛna kɛ i teriw ye. Tiɲɛ na, u bɛna kɛ i bolo iko i balimakɛw n’i balimamusow. A bɛna diya u ye k’i kalan walasa i ka Ala dɔn. U bɛna i dɛmɛ, ka dusu don i kɔnɔ.

Anw ni Ala tɛ kelen ye. N’i bɛ Ala ka teriya ɲini, i ka kan ka fɛnba dɔ faamu. O ye ko teriyasira min bɛ anw ni Ala cɛ, o tɛ teriyasira ye min bɛ anw ni an mɔgɔɲɔgɔnw cɛ. A ka kɔrɔ n’an ye kosɛbɛ, ani a ka hakilitigiya n’a ka setigiya ka bon n’an taw ye. Dalilu b’ale de bolo ka kɛ an kuntigi ye. O la sa, n’an b’a fɛ ka kɛ a teriw ye, a bɛ min fɔ an ye, an ka kan k’o lamɛn, k’o kɛ. O bɛna hɛrɛ lase an ma tuma bɛɛ.—Esayi 48:18.