Ala b’a ɲini i fɛ i ka kɛ a teri ye

Ala b’a fɛ i ka kɛ a teri ye. Yali i delila ka miiri k’i bɛ se ka kɛ dunuya bɛɛ la mɔgɔba teri ye wa? Ibrahima min tun ye fɔlɔ mɔgɔ dɔ ye, a tun bɛ wele ko Ala terikɛ. (Yakuba 2:23) Bibulu bɛ kuma mɔgɔ wɛrɛw fana kan minnu kɛra Ala teriw ye. Ala dubara u ye kosɛbɛ. Bi bi in na, mɔgɔw kɛra Ala teriw ye dugukolo yɔrɔ bɛɛ la. E fana bɛ se ka kɛ Ala teri ye.

Ka kɛ Ala teri ye, o ka fisa ka kɛ hadamaden teri ye, a mana kɛ mɔgɔ o mɔgɔ ye. Ala t’a teri kantigiw jigi tigɛ abada. (Zaburu 18:26) Ka kɛ Ala teri ye, o ka fisa ni nafolo sɔrɔli ye. Ni nafolotigi dɔ sara, a ka wari bɛ kɛ mɔgɔ wɛrɛw ta ye. Nka, teriyasira bɛ mɔgɔ minnu ni Ala cɛ, nafolo b’u bolo mɔgɔ si tɛ se ka min ta.—Matiyu 6:19.

A bɛ se ka kɛ ko mɔgɔ dɔw bɛna a ɲini k’i bali ka Ala dɔnniya sɔrɔ. Hali i teriw n’i somɔgɔ dɔw bɛ se k’a ɲini k’o kɛ. (Matiyu 10:36, 37) Ni mɔgɔw bɛ yɛlɛ i ma, walima n’u b’i bagabaga, i k’i yɛrɛ ɲininka nin na: ‘Ne b’a fɛ n ko ka diya jɔn ye, hadamadenw wa, walima Ala?’ I ka miiri nin fana na: Ni mɔgɔ dɔ y’a fɔ i ye k’i kana dumuni kɛ tuguni, yali i bɛna sɔn a ka kuma ma wa? I tɛna sɔn dɛ! I b’a dɔn k’i ka kan ka dumuni kɛ walasa ka balo. Ala dun bɛ se k’a kɛ i ka balo kudayi. O kosɔn, i kan’a to mɔgɔ si k’i bali k’a dɔn i bɛ se ka kɛ Ala teri ye cogo min na.—Yuhana 17:3.