I ka kan k’a ɲini ka Ala dɔn

I ka kan k’a ɲini ka Ala dɔn walasa ka kɛ a teri ye. Yali i teriw b’i tɔgɔ dɔn wa? Yali u b’i tɔgɔ fɔ wa? U b’o fɔ. Ala b’a fɛ i k’a tɔgɔ dɔn, k’o fɔ fana. Ala tɔgɔ ye Jehowa ye. (Zaburu 83:19; Matiyu 6:9) A bɛ min fɛ, an’a tɛ min fɛ, i ka kan k’o fana dɔn. Minnu ye a teriw ye, ani minnu ye a juguw ye, fo i k’olu dɔn. O la sa, i ka kan ka waati de ta walasa ka mɔgɔ dɔn. Bibulu b’a fɔ ko hakilitigiyako don ka waati bila walasa k’a ɲini ka Jehowa dɔn.—Efesekaw 5:15, 16.

Fɛn min ka di Ala ye, a teriw b’o de kɛ. I ka miiri i teriw ma bani. N’i t’u minɛ koɲuman, ani n’i bɛ fɛn kɛ min ka go u ye, yali u bɛna to i ka teriya la wa? Cogo si la. O cogo kelen na fana, n’i b’a fɛ ka kɛ Ala teri ye, fo i ka fɛn kɛ, fɛn min ka di a ye.—Yuhana 4:24.

Diinɛ bɛɛ tɛ na ni teriya ye anw ni Ala cɛ. Yesu min ye Ala teri ye, teri min ka surun a la ni bɛɛ ye, a kumana sira fila kan. Kelen ye siraba ye min falen bɛ mɔgɔw la. O sira bɛ taa halakili la. Sira tɔ kelen ka dɔgɔ. Mɔgɔ caman tɛ tɛmɛ o fɛ. Nka, o sira de bɛ taa ɲɛnamaya banbali la. O kɔrɔ ye ko n’i b’a fɛ ka kɛ Ala teri ye, Jehowa bɛ bato sira tilennen min fɛ, fo i k’o dɔn.—Matiyu 7:13, 14.