I bɛ se ka i ka waleɲumandɔn jira ka ɲɛsin kunmabɔsara ma cogo di?

1-2. Yesu ka kunmabɔsara bɛ an bila an k’an jija ka mun de kɛ ani mun na? (2 Kɔrɛntekaw 5:14, 15.) (Ja fana lajɛ.)

NI ETAZIBA dɔ benna i kan ani dɔ y’i dɛmɛ ka bɔ kabakuruton cɛma, i bena mun lo kɛ o tigi ye do? Mɔgɔ min y’i kisi hali n’a ye mɔgɔ wɛrɛw kisi fana, siga t’a la a bena diya i ye k’a tigi fo i yɛrɛ ma ani k’a fɔ a ye ko a ye min kɛ i ye i tɛna ɲina o kɔ abada.

² I ko an y’a ye barokun tɛmɛnin na cogo min na, an tɛ se k’an yɛrɛ kisi ka bɔ jurumu bolo. Nga, Jehova y’o lo kɛ an ye. Kunmabɔsara barika la, 1) an be se k’an ka jurumuw yafa sɔrɔ, 2) an be ni jigiya ye ka kɛnɛya pewu an ka dafabaliya la ani 3) an be se ka jɛnɲɔgɔnya kɛ ni Ala ye kokura. O la, an be ni jigiya ye ka ɲɛnamaya kɛ fɔɔ abada Jehova ka duniɲa kura kɔnɔ. Tiɲɛn na, kunmabɔsara b’a yira ko Yezu be adamadenw kanu kosɔbɛ. A tun b’u kanu wagatijan yɛrɛ ka sɔrɔ ka na dugukolo kan (Talenw 8:30, 31). Ciden Pol y’a fɔ ko: “Krista ka kanuya sera an kɔrɔ [wala a b’an jija].” (2 Korɛntikaw 5:14, 15 kalan). O kɔrɔ ko an ka ɲi k’an ka waleɲumanlɔn yira Yezu la a ka kanuya kosɔn ani k’a yira ko a ye min kɛ an ye, an tɛna ɲina o kɔ abada.

3. Mun na mɔgɔw ka waleɲumandɔn jira cogo tɛ kelen ye ka ɲɛsin kunmabɔsara ma?

³ I bena mun lo kɛ k’i ka waleɲumanlɔn yira kunmabɔsara koo la? N’a sɔrɔ ele ni mɔgɔ wɛrɛ tɛna o ɲiningali jaabi cogo kelen na. Misali la, miiri k’a filɛ ko mɔgɔ saba ka ɲi ka dugutaga kɛ yɔrɔ kelen na, nga u kelen kelen bɛɛ ma bɔ dugu kelen na. U tɛna sira kelen lo ta. O cogo kelen na, i bena min kɛ k’i ka laɲinita dafa, o kɔrɔ k’i ka waleɲumanlɔn yira Jehova la kunmabɔsara koo la, o be se ka kɛ dan na ni mɔgɔ wɛrɛ ta ye. Barokun nin bena kuma jɛnkulu saba koo la ani u kelen kelen be se ka min kɛ k’u ka waleɲumanlɔn yira kunmabɔsara koo la: 1) Bibulu kalandenw, 2) kerecɛn batizeninw, ani 3) minw y’u yɔrɔ janya kafo la.

BIBULU KALANDENW

4. Jehovah bɛ mun de miiri Bibulu kalandenw ko la?

⁴ N’i ye Bibulu kalanden ye, miiri nin na: I b’a fɛ ka Jehova ni Bibulu ka kalanw lɔn minkɛ, o b’a yira ko Jehova b’a fɛ i ka kɛ a teri ye ani a b’i dɛmɛna k’o kɛ (Zan 6:44; Kɛw. 13:48). Jehova lo “be adamaden dusu sɛgɛsɛgɛ.” O kɔrɔ ko i be jijali minw kɛra k’a lɔn, a b’o kɔrɔsi ani a ninsɔn ka di k’a ye i be yɛlɛmani minw kɛra k’i koo diya a ye (Talenw 17:3; 27:11). Kunmabɔsara sababu la, i be se ka teriya sɔbɛ kɛ ni Jehova ye (Ɔrɔm. 5:10, 11). Kana ɲinɛ o kɔ abada.

5. Laadilikan min bɛ sɔrɔ Filipekaw 3:16 kɔnɔ, Bibulu kalandenw bɛ se k’o sira taama cogo di?

⁵ N’i ye Bibulu kalanden ye, i be se k’i ka waleɲumanlɔn yira kunmabɔsara koo la cogo di? I be se k’o kɛ cogo minw na, u la dɔ ye ka ciden Pol ka ladili nin sira tagama, a y’o min di Filipikaw ma. A ko: “An ye koo minw kɛ fɔɔ ka na se sisan ma, an ka banba ka taga ɲa n’o koow ye.” (Filip. 3:16). Biblu Ala ta Kuma b’o vɛrise bayɛlɛma ten ko: “An tagamana cogo min na fɔ ka na se bi ma, an ye taga ɲa o sira kelen kan.” Ka kɛɲɛ n’o ladili ye, banba foyi kana i bali ka taga ɲɛ ɲɛnamaya sira kan.—Mat. 7:14; Luka 9:62.

6. N’a ka gɛlɛn Bibulu kalanden ma ka yɛlɛmali dow kɛ, a ka kan ka mun de kɛ? (Dutɛrɔnɔmɛ 30:11-14) (Ja fana lajɛ.)

⁶ I ka bibulukalan tuma na, yala aw ye kalan dɔ ye a ma mɛɛn a ka gwɛlɛ i ma ka sɔn min ma wa? Sɛgɛsɛgɛri kɛ o kalan koo la ani Jehova deli a k’i dɛmɛ k’o faamu ka ɲɛ (Zab. 86:11). N’a bele ka gwɛlɛ i ma k’o faamu, o to gɛrɛn na fɔlɔ, nga kana i ka bibulukalan dabila. Bibulu b’a fɔ ko koo minw man di Ala ye, n’a ka gwɛlɛ i ma k’o dɔ dabila do? N’o lo, a to i hakili la ko adamaden dafabaliw tɛ se min na, Jehova t’o ɲini u fɛ abada. O la, i be se k’a ka sariyaw sira tagama (Deteronɔmu 30:11-14 kalan). Jehova y’a daa di fana ko a bena i dɛmɛ (Ezayi 41:10, 13; 1 Kor. 10:13). O la, kana i fari faga. Sanni i ka to ka sinsin i ka gwɛlɛyaw kan, Jehova ye koo minw bɛɛ kɛ i ye i n’a fɔ ka kunmabɔsara di i kosɔn, to ka miiri u la. Ni dɔ tora ka fara i ka kanuya kan Jehova koo la, i ben’a ye ko “a ka ciiw batoli fana man gwɛlɛ.”—1 Zan 5:3.a

7. Denmisɛn minnu lamɔna tiɲɛ kɔnɔ, olu bɛ se ka miiri mun de ko la?

⁷ Aw denmisɛn minw lamɔna tiɲɛn sira kan do? Aw fana ye Bibulu kalandenw ye. Aw ye aw bangebagaw ka Bibulu kalandenw ye minw koo ka di u ye kosɔbɛ. Bibulu b’a fɔ ko: “Aw ye gwɛrɛ Ala la, ale fana bena gwɛrɛ aw la.” (Zaki 4:8; 1 Til. Kib. 28:9). N’i y’a latigɛ k’i magwɛrɛ Ala la, ale fana bena a magwɛrɛ i la. A ma kɛ komi Jehova b’a mako don i la sabu i bangebagaw ye Jehova Seerew ye dɛ! Nga, a b’o kɛ sabu a b’a fɛ i ka kɛ a teri sɔbɛ ye. Mun lo y’a to i be se ka kɛ Jehova teri sɔbɛ ye? Kunmabɔsara lo. Kana ɲinɛ o nilifɛn nafamanba kɔ, a y’o min di i ma (Ɔrɔm. 5:1, 2). O la, ka kɔn ɲina ka Hakilijigi lajɛn ɲɛ, Jehova ni Yezu ye min bɛɛ kɛ i ye mun na i tɛ wagati ta ka miiri o la? O kɔ, i b’a fɛ k’i ka ɲɛnamaya kɛ cogo min na, miiri o la. I b’a fɛ ka laɲinita minw dafa walisa k’a yira Jehova la ko i b’a waleɲuman lɔn kosɔbɛ a Dencɛ ka kunmabɔsara kosɔn, miiri o fana na.b

KRECƐN MINNU BATISERA

8. N’i ye krecɛn batiselen ye, i y’i ka waleɲumandɔn jira cogo di ka ɲɛsin kunmabɔsara ma?

⁸ N’i ye kerecɛn batizenin ye, i y’a yira cogo caaman na ko i be Jehova waleɲuman lɔn kunmabɔsara koo la. Misali la, i ye yɛlɛmani dɔw kɛ i ka ɲɛnamaya la walisa ka kɛ Jehova teri sɔbɛ ye ani k’a ka sariyaw sira tagama. I ye Yezu ka cikan labato, o min ye k’i ka lannakow kofɔ tɔɔw ye, ani k’u dɛmɛ ka Jehova ni Yezu lɔn. I y’i yɛrɛkun di Jehova ma ani ka batize. I sɔnna tiɲɛn batoli ma minkɛ, yala dɔw y’i kɛlɛ o kosɔn wa? (2 Tim. 3:12). O bɛɛ n’a ta, i be Jehova batora kantigiya la. O b’a yira ko i be Jehova kanu ani ko i b’a waleɲuman lɔn a Dencɛ ka kunmabɔsara kosɔn.—Eburuw 12:2, 3.

9. Krecɛn batiselen ka kan k’a yɛrɛ kɔlɔsi farati jumɛn de la?

⁹ An ye kerecɛn batizeninw ye minkɛ, an k’a lɔn ko farati dɔ b’a sen kɔrɔ. N’an man janto, wagatiw tɛmɛtɔ, an tɛna to ka Jehova waleɲuman lɔn tugun kunmabɔsara koo la. O be se ka kɛ cogo di? Min ye Efɛzi kerecɛnw sɔrɔ saan kɛmɛkulu fɔlɔ la, an k’o lajɛ. Yezu suu kununin kɔ, a y’u tando u ka muɲuli kosɔn. Nga, a y’a fɔ u ye ko: “Ne b’aw jalaki. Bari aw tun be ne kanu cogo min na fɔlɔ la, aw te ne kanu ten tugu.” (Yir. 2:3, 4). I ko Yezu ka kumaw b’a yira cogo min na, kerecɛn be se ka to ka koow kɛ Jehova ye sabu a delinanko lo, nga a t’o kɛ ni kanuya ye tugun. A be to ka delili kɛ, ka taga lajɛnw na ani ka bɔ waajuli la, nga a b’o kɛ ten le dɔrɔn. A t’o koow kɛ ni kanuya ye tugun. I be se ka mun lo kɛ n’i y’a kɔrɔsi ko i tɛ Jehova kanu ten i ko fɔlɔ la tugun?

10. An bɛ alako baara minnu kɛ, mun de bɛ se k’an dɛmɛ an ka an ‘sɛbɛ don olu la’? (1 Timote 4:13, 15)

¹⁰ Ciden Pol y’a fɔ Timote ye ko a be Alako minw kɛra, a k’u to a “dusu la, k’o minɛ ka ɲa kosɔbɛ.” (1 Timote 4:13, 15 kalan). Ka kɛɲɛ n’o ladili ye, ele fana be se ka miiri k’a filɛ i be se ka min kɛ walisa i kisɛyanin ka to “ka baara kɛ Matigi ye.” (Ɔrɔm. 12:11). Misali la, n’i be wagati ta k’i ka lajɛnw labɛn ka ɲɛ, o bena i dɛmɛ ka lamɛnni kɛ koɲuman lajɛnw tuma na. Wala n’i b’i ka kelenna kalan kɛra, i be se ta taga to yɔrɔ dɔ la i kelen na. O bena i dɛmɛ ka nafa sɔrɔ bɛrɛbɛrɛ i ka kalan na. Walisa tasuma mananin ka to, i ka ɲi ka to ka lɔgɔ daa don. O cogo kelen na, i ka ɲi ka to k’i jija Alakow la walisa ka to ka Jehova waleɲuman lɔn bɛrɛbɛrɛ kunmabɔsara koo la ani a ye koo wɛrɛ minw bɛɛ kɛ i ye. Ka fara o kan, Jehova be koo ɲuman minw bɛɛ kɛra a sagokɛlaw ye, mun na i tɛ wagati ta ka miiri o la koɲuman lɔgɔkun damanin ka kɔn Hakilijigi lajɛn ɲɛ? Siga t’a la, o bena i dɛmɛ ka Jehova waleɲuman lɔn kosɔbɛ kunmabɔsara kosɔn, o min sababu la an be se ka jɛnɲɔgɔnya ɲuman kɛ n’a ye.

11-12. N’i fari fagara tuma dow la,o b’a jira ko Jehova ye a ka hakili senu bɔ i kan wa? A ɲɛ fɔ. (Ja fana lajɛ.)

¹¹ N’i y’a kɔrɔsi ko tuma dɔw la i kisɛyanin tɛ Jehova batoli la i ko fɔlɔ la, kana i fari faga wala k’a miiri ko i tɛ ni Ala ka hakili senu ye tugun. Ciden Pol ye min fɔ Korɛntikaw ye a ka waajuli baara koo la, i hakili to o la. A y’a fɔ ko: “Ni ne b’o kɛ ni jagoya ye, o ye karabako ye n ma.” (1 Kor. 9:17). A tun b’a fɛ ka mun lo fɔ do?

¹² Tuma dɔw la, waajuli kɛlɔgɔ tun tɛ Pol la. A dusukunnakow bɛɛ n’a ta, a tun cɛsirinin lo ka to ka waajuli kɛ. Ele fana be se k’a ladegi. Hali ni tuma dɔw la koo ɲuman kɛlɔgɔ t’i la, i jija k’o kɛ. O la, Jehova deli a ‘k’o kɛli nigɛ don i la k’a kɛ see di i ma.’ (Filip. 2:13). Koo minw bena i dɛmɛ i magwɛrɛnin ka to Jehova la, to k’o kɛ ni kisɛya ye. A lɔn ko wagatiw tɛmɛtɔ, i ka kɛwalew bena nɔɔ to i dusukunnakow kan ani i be ni kanuya min ye Jehova koo la, o barika bena bonya kokura.

13. An bɛ se ka ta’a fɛ k’an yɛrɛ sɛgɛsɛgɛ cogo di k’a don ni an bɛ“dannaya sira kan”?

¹³ A fɔra 2 Korɛntikaw 13:5 ko: “Aw k’aw yɛrɛ sɛgɛsɛgɛ k’a filɛ yala n’aw lanin be Yezu Krista la sɔbɛ la.” Tuma kelen kelen, a ka ɲi an k’an yɛrɛ sɛgɛsɛgɛ i ko a ɲinina an fɛ cogo min na o vɛrise kɔnɔ. An be se k’an yɛrɛ ɲininga ko: “Yala, Ala ka Masaya lo ye n’ ɲɛnako fɔlɔ ye wa?” (Mat. 6:33). “N’ be ɲɛnagwɛko minw sugandi, yala o b’a yira ko n’ be koo jugu kɔniya wa?” (Zab. 97:10). “Yala n’ be banba walisa hɛɛrɛ ani kelenya ka to kafo kɔnɔ wa?” (Efɛz. 4:2, 3). Hakilijigi lajɛn tuma ye wagati ɲuman lo ye ka miiri kunmabɔsara koo la. A be sababu di an ma k’an yɛrɛ sɛgɛsɛgɛ k’a filɛ ani k’an janto ko an be Krista sago lo kɛra sanni k’an yɛrɛ sago kɛ.c

MINNU YE U YƆRƆ JANYA JƐKULU LA

14. Mun de b’a to krecɛn dow bɛ u yɔrɔ janya jɛkulu la?

¹⁴ An balima dɔw ye lajɛntaga dabila, hali k’a sɔrɔ u ye Jehova sago kɛ kantigiya la kalo caaman wala saan caaman kɔnɔ. Mun na do? “Diɲɛ hamikow” lo ye dɔw hakili ɲagami (Luka 21:34). N’a sɔrɔ balima dɔ ka kumaw wala a ka kɛwalew lo ye dɔ wɛrɛw kunnatiɲɛ (Zaki 3:2). Dɔw fana ye jurumuba kɛ ani u t’a fɛ ka dɛmɛ ɲini. A mana kɛ min o min ye, i be se ka mun lo kɛ n’i y’i yɔrɔ janya kafo la? Kunmabɔsara ani Jehova ni Yezu b’i kanu cogo min na, o ka ɲi k’a to i b’a ɲini ka mun lo kɛ?

15. Balima minnu ye u yɔrɔ janya jɛkulu la, Jehova b’a jira cogo di ko a b’a janto olu la? (Ezekiɛl 34:11, 12, 16)

¹⁵ Minw ye lajɛntaga dabila, miiri k’a filɛ Jehova be min miiri u koo la. A tɛ ban u la. Nga, a b’u yɔrɔ ɲini i ko sagadɛndɛla b’a ka saga tununinw yaala cogo min na. A b’u balo ani a b’u dɛmɛ u ka kɔsegi ale ma (Ezekiyɛli 34:11, 12, 16 kalan). Yala Jehova b’o ɲɔgɔn le kɛra ele fana ye wa? Ɔnhɔn! I be barokun nin lajɛra minkɛ, o b’a yira ko i bele b’a fɛ k’i koo diya a ye. Jehova tun y’i dusukun cogoya ye, o lo kama a y’i sama ka na tiɲɛn sira kan. A bele b’i dusukun cogoya lɔn ani a b’a fɛ i ka kɔsegi ale ma.

16. Balima minnu y’u yɔrɔ janya Jehova la, mun de bɛ se k’u dɛmɛ u ka segin ka na Jehova ma? (Ja fana lajɛ.)

¹⁶ Jijali kuma nunu be sɔrɔ kitabunin Reviens à Jéhovah kɔnɔ: “La a la ko n’i kɔsegira Jehova ma, a bena i dɛmɛ. A bena i dɛmɛ fana i ka see sɔrɔ i ka siranya kan ani i ka se ka yafa balimaw ma minw donna i gasi la. A bena i dɛmɛ i ka hakilisigi sɔrɔ fana sabu i b’a lɔn ko a yafara i ma. O bena a to i b’a ɲini ka Jehova sago kɛ n’i balimaw ye kokura.” A to i hakili la fana ko diinan mɔgɔkɔrɔw b’a fɛ k’i dɛmɛ n’u dusu bɛɛ ye. U bena kɛ “i ko dogoyɔrɔ, min be mɔgɔ tanga fɔɲɔ ma” ani “i ko boon, sanji natuma na.” (Ezayi 32:2). An b’a lɔn ko i be Jehova waleɲuman lɔn kunmabɔsara kosɔn ani ko i b’a fɛ k’o yira. O la, i yɛrɛ ɲininga ko: “Ne be se ka mun ni mun lo kɛ walisa ka ‘sigikafɔ kɛ’ ni Jehova ye?” (Ezayi 1:18; 1 Piyɛri 2:25). Misali la, mun na i tɛ taga lajɛn dɔ la Masaya Boon na? Mun na i tɛ kaan bɔ diinan mɔgɔkɔrɔ dɔ ma walisa ka dɛmɛ ɲini Alako ta fan fɛ? A be se ka labɛn kɛ walisa balima dɔ ka bibulukalan kɛ n’i ye wagati dɔ kɔnɔ. I be deliliw ani jijali minw kɛra walisa ka Jehova waleɲuman lɔn a Dencɛ ka kunmabɔsara kosɔn, la a la ko a bena i duga o kosɔn.

I BƐNA I KA WALEƝUMANDƆN JIRA COGO DI?

17-18. An bɛ se ka baara kɛ ni an ka waati ye ka ɲɛ cogo di ɲinan hakilijigin lajɛ kama?

¹⁷ Yezu y’a fɔ ko kunmabɔsara dira “waasa ni mɔgɔ min y’a jigi la a kan, o tigi kana halaki, nga o ka nii banbali sɔrɔ.” (Zan 3:16). Kunmabɔsara sababu la, Jehova be se k’an kisi ka bɔ jurumu ni saya bolo. An si t’a fɛ ka kɛ ɲumanlɔnbaliw ye kunmabɔsara koo la (Ɔrɔm. 3:23, 24; 2 Kor. 6:1). Jehova ni Yezu ye min kɛ k’a yira an na k’u b’an kanu, wagati ta ka miiri o la ka kɔn Hakilijigi lajɛn ɲɛ. O bena a to i b’a ɲini k’i ka waleɲumanlɔn yira u la.

¹⁸ I be se k’i ka waleɲumanlɔn yira Jehova ni Yezu la cogo di kunmabɔsara kosɔn? I bena min kɛ, n’a sɔrɔ o bena kɛ dan na ni mɔgɔ wɛrɛ ta ye. Duniɲa kuru bɛɛ kɔnɔ mɔgɔ miliyɔn caaman be jijaliw kɛra walisa u “kana taama u yɛrɛ sago la tugu, nga u k’o kɛ [Yezu] kosɔn, min sara . . . u ka nafa kosɔn.” (2 Kor. 5:15). I be se ka la a la ko i bena jijali minw kɛ ka fara olu kan, Jehova bena i duga o kosɔn.