Diinɛ maakɔrɔw, a’ye jurumukɛlaw minɛ ni kanuya ni makari ye

1. Mɔgɔ min ye jurumuba kɛ, mun de bɛ se ka a tigi dɛmɛ?

BAROKUN tɛmɛnin na, an y’a ye ciden Pol y’a fɔ ko Korɛnti kafo mɔgɔw ka min kɛ tuma min na cɛɛ dɔ ye jurumuba kɛ. O cɛɛ ma nimisa minkɛ, u y’a bɔ kafo kɔnɔ. Nka i ko barokun ka vɛrise jɔnjɔn b’a yira cogo min na, minw ye jurumuba kɛ, u dɔw be sɔn dɛmɛ ma ani u be nimisa (Ɔrɔm. 2:4). Diinan mɔgɔkɔrɔw be se k’u dɛmɛ cogo di u ka nimisa?

2-3. An ka kan ka mun de kɛ ni an bɔra a kalama ko an krecɛn ɲɔgɔn dɔ ye jurumuba kɛ, ani mun na?

² Ni diinan mɔgɔkɔrɔw t’a lɔn ko mɔgɔ dɔ ye jurumuba kɛ, u tɛ se k’a tigi dɛmɛ. O la, n’an bɔra a kala ma ko an kerecɛnɲɔgɔn dɔ ye jurumuba kɛ, u be se k’a bɔ kafo kɔnɔ min kosɔn, an ka ɲi ka mun lo kɛ do? An ka ɲi k’a tigi jija a ka taga dɛmɛ ɲini diinan mɔgɔkɔrɔw fɛ.—Ezayi 1:18; Kɛw. 20:28; 1 Piyɛri 5:2.

³ Nka, n’o tigi banna ka taga kuma diinan mɔgɔkɔrɔw fɛ do? N’o lo, an yɛrɛ be se ka taga kuma u fɛ walisa u k’a dɛmɛ. N’an y’o kɛ, an b’a yira ko an b’an balima kanu sabu an b’a lɔn ko diinan mɔgɔkɔrɔw bena a dɛmɛ. N’o tigi tora ka o koo jugu kɛ, a bena ale ni Jehova ka jɛnɲɔgɔnya nagasi. A be se ka Jehova ni kafodenw tɔgɔ tiɲɛ fana. Komi an be Jehova n’o jurumukɛla kanu, an b’an jaa gwɛlɛya ka dɔ kɛ dɔ ye.—Zab. 27:14.

DIINƐ MAAKƆRƆW BƐ MIN KƐ WALASA KA MƆGƆ DƐMƐ MIN YE JURUMUBA KƐ

4. Diinɛ maakɔrɔw ka laɲini ye mun de ye tuma min na u bɛ ka kuma ni jurumuba kɛbaga ye?

⁴ Ni kafoden dɔ ye jurumuba kɛ, diinan mɔgɔkɔrɔw jɛnkulu be balimacɛ setigi saba sugandi u cɛma minw be kɛ diinan mɔgɔkɔrɔw ka kɔmite ye.a O cɛɛw ka ɲi ka kɛ mɔgɔ majigininw ye minw b’u seko daan lɔn. N’u be jurumukɛla dɛmɛna a ka nimisa, u be sɔn a ma ko u tɛ se ka mɔgɔ waajibiya a k’a sɔɔn yɛlɛma (Deter. 30:19). U b’a faamu ko jurumukɛlaw bɛɛ lo tɛna nimisa i ko masacɛ Dawuda (2 Sam. 12:13). N’a sɔrɔ u dɔw tɛna sɔn Jehova ka ladiliw ma (Zɛnɛzi 4:6-8). O bɛɛ n’a ta, diinan mɔgɔkɔrɔw ka laɲinita ye k’u seko bɛɛ kɛ ka jurumukɛla dɛmɛ a ka nimisa. N’u lajɛnna ni jurumukɛla ye, u ka ɲi ka mun lo to u hakili la?

5. Diinɛ maakɔrɔw ka kan ka mun de to u hakili la ni u bɛ ka kuma ni jurumukɛla ye? (2 Timote 2:​24-​26) (Ja fana lajɛ)

⁵ Diinan mɔgɔkɔrɔw be jurumukɛla jati i ko Jehova ka sagaden tununin min koo ka gwɛlɛ a ma (Luka 15:4, 6). O la, n’u lajɛnna n’o tigi ye, u tɛ fariya a ma u kumacogo n’u ka kokɛcogow fɛ. Diinan mɔgɔkɔrɔw t’a miiri ko u ka ɲi ka min kɛ dɔrɔn, o ye ka ɲiningaliw kɛ ani k’a ɲini k’a lɔn min kɛra. Nka, u b’a yira ko u be ni jogow ye minw kofɔra 2 Timote 2:24-26 kɔnɔ (a kalan). Diinan mɔgɔkɔrɔw be muɲu ka koow kɛ ni dususuman ni ɲumanya ye sabu u b’a fɛ ka jurumukɛla dɛmɛ a k’a miiricogo yɛlɛma.

6. Diinɛ maakɔrɔw bɛ se ka u dusukun labɛn cogo di sani u ka kuma ni jurumukɛla ye? (Romɛkaw 2:4)

⁶ Diinan mɔgɔkɔrɔw b’u yɛrɛ dusukun labɛn. U b’u jija ka Jehova ladegi u ka kokɛtaw bɛɛ la ni jurumukɛla ye, u kɛtɔ ka miiri ciden Pol ka kuma nunu na: “Ala . . . b’i dɛmɛ a ka ɲumanya barika la ka nimisa ka faran i ka kojugu la.” (Ɔrɔmukaw 2:4 kalan). Diinan mɔgɔkɔrɔw ka ɲi k’a to u hakili la ko u ye Ala ka sagakulu kɔrɔsibagaw ye ani ko Krista lo b’u ɲɛminɛna (Ezayi 11:3, 4; Mat. 18:18-20). Sanni diinan mɔgɔkɔrɔw ka kɔmite dɔ ka ɲɔgɔn lajɛn ni jurumukɛla ye, u be delili kɛ u ka laɲinita koo la, o min ye ka jurumukɛla dɛmɛ a ka nimisa. U be sɛgɛsɛgɛri kɛ Bibulu n’an ka gafew kɔnɔ ani u be Jehova deli a k’u dɛmɛ ka jurumukɛla ka koow faamu. U bena a ɲini k’a lɔn fɛɛn min y’o tigi lasun ka kɛ ni miiriya juguw ye ani ka jurumu kɛ.—Talenw 20:5.

7-8. Diinɛ maakɔrɔw bɛ se ka Jehova ka muɲuli ladege cogo di ni u bɛ ka kuma ni jurumukɛla ye?

⁷ Diinan mɔgɔkɔrɔw be Jehova ka muɲuli ladegi. Jehova ye jurumukɛlaw minɛ cogo min na galen, u be miiri o la. Misali la, a muɲuna ka hakilijagabɔ kɛ ni Kayɛn ye. A y’a fɔ a ye min tun bena kɛ n’a m’a miiricogo yɛlɛma ani ko n’a ye mɛnni kɛ, ale bena a duga (Zɛnɛzi 4:6, 7). Jehova ye kira Natan ci ka taga Dawuda ladi. Natan ye misali dɔ fɔ walisa ka Dawuda dɛmɛ a ka nimisa (2 Sam. 12:1-7). Ka fara o kan, Jehova ‘tora ka a ka . . . kiraw bɛɛ ci’ Israɛlden murutininw fɛ “loon o loon.” (Zer. 7:24, 25). A ma kɔnɔni kɛ a ka mɔgɔw ka nimisa fɔlɔ a be sɔrɔ k’u dɛmɛ. Nka hali k’a sɔrɔ u ma jurumukɛ dabila, a y’u jija u ka nimisa.

⁸ Diinan mɔgɔkɔrɔw be Jehova ladegi n’u b’a ɲinina ka mɔgɔ dɔ dɛmɛ min ye jurumuba kɛ. Ka kɛɲɛ ni 2 Timote 4:2 ye, u be hakilijagabɔ kɛ ni jurumukɛla ye “ni muɲuli ye.” O la, diinan mɔgɔkɔrɔ ka ɲi ka muɲu ani ka koow kɛ ni dususuman ye tuma bɛɛ walisa ka jurumukɛla dɛmɛ a k’a ɲini ka koo tilennin kɛ. Ni diinan mɔgɔkɔrɔ dimina, n’a sɔrɔ jurumukɛla tɛna a ka ladili lamɛn wala a tɛna nimisa.

9-10. Diinɛ maakɔrɔw bɛ se ka jurumukɛla dɛmɛ cogo di a k’a faamu fɛn min y’a bila ka jurumu kɛ?

⁹ Diinan mɔgɔkɔrɔw b’a ɲini k’a lɔn koo minw ye jurumukɛla lasun ka jurumu kɛ. Misali la, u b’u yɛrɛ ɲininga ko: “Mun lo y’a tigi ni Jehova ka jɛnɲɔgɔnya nagasi dɔɔni dɔɔni? Yala a tɛ kelenna kalan ani waajuli kɛ tuma o tuma wa? Yala a tɛ Jehova deli tuma o tuma wala a be delili kɛ sanfɛ sanfɛ dɔrɔn le wa? Yala a tora ka tugu a ka nege juguw lo kɔ dɔɔni dɔɔni wa? A be wagati kɛ ni jɔnw lo ye ani a be ɲɛnagwɛko jumanw lo sugandi? O koow ye nɔɔ to a ka miiriyaw n’a negelakow kan cogo di? A ye koo minw kɛ ani a ye desizɔn minw ta, yala a b’a faamu o ye min kɛ a Faa Jehova la wa?”

¹⁰ Diinan mɔgɔkɔrɔw be se ka ɲiningali dɔw kɛ walisa ka jurumukɛla dɛmɛ a ka miiri k’a filɛ koo minw ye ale ni Jehova ka jɛnɲɔgɔnya nagasi ani k’a to a ye jurumu kɛ. U b’o kɛ ni ɲumanya ye ani u mako t’a la ka min lɔn, u tɛ ɲiningali kɛ o koo la (Talenw 20:5). Ka fara o kan, i ko kira Natan y’a kɛ cogo min na ni Dawuda ye, diinan mɔgɔkɔrɔw be se ka misali dɔ fɔ walisa ka jurumukɛla dɛmɛ a k’a faamu ko a ye min kɛ o ye koo jugu lo ye. N’a sɔrɔ u ka ɲɔgɔnye fɔlɔ la, a tigi dusu bena tiɲɛ a ka miiriyaw n’a ka kokɛtaw kosɔn. N’a sɔrɔ a yɛrɛ bena nimisa.

11. Diinɛ maakɔrɔw bɛ se ka Yesu ka misali ladege cogo di?

¹¹ Diinan mɔgɔkɔrɔw b’u jija ka Yezu ladegi. Tuma min na Yezu y’a yɛrɛ yira Tarisika Sayuli la a suu kununin kɔ, a y’a ɲininga koo dɔ la min y’a lasun ka miiri. A ko: “Sayuli, Sayuli, mun na i be ne tɔɔrɔla ten?” O ɲiningali fɛ, Yezu ye Pol dɛmɛ k’a faamu ko a be koo jugu lo kɛra (Kɛw. 9:3-6). Ani Yezu y’a fɔ “Zezabɛli” koo la ko: “N y’a to fɔlɔ waasa a k’a sɔɔn yɛlɛma.”—Yir. 2:20, 21.

12-13. Diinɛ maakɔrɔw bɛ se ka waati di jurumukɛla ma cogo di walasa a ka nimisa? (Ja fana lajɛ.)

¹² Komi diinan mɔgɔkɔrɔw be Yezu ladegi, u tɛ kɔrɔtɔ k’a miiri ko jurumukɛla dɔ tɛna nimisa. Jurumukɛla dɔw be nimisa u ka ɲɔgɔnye fɔlɔ la ni kɔmite mɔgɔw ye. Nka, dɔw mako be wagati la. O la, diinan mɔgɔkɔrɔw be se k’a latigɛ ka ɲɔgɔnye wɛrɛw kɛ ni jurumukɛla ye. N’a sɔrɔ ɲɔgɔnye fɔlɔ kɔ, diinan mɔgɔkɔrɔw ye min fɔ a ye, a bena a daminɛ ka miiri o la koɲuman. N’a sɔrɔ a bena a yɛrɛ majigi ka Jehova deli ko a ka yafa ale ma (Zab. 32:5; 38:19). O la, ɲɔgɔnye wɛrɛ la ni kɔmite mɔgɔw ye, a ka miiriya be se ka yɛlɛma.

¹³ Walisa ka jurumukɛla dɛmɛ a ka nimisa, diinan mɔgɔkɔrɔw b’a minɛ ni ɲumanya ye ani u b’a yira ko u be makari a la. U be Jehova deli a k’u duga u ka jijaliw kosɔn ani u jigi b’a la k’o balima bena a sɔɔn yɛlɛma ani ka nimisa.—2 Tim. 2:25, 26.

14. Ni jurumukɛla dɔ nimisara, jɔni de ka kan ni tanuli ye, ani mun na?

¹⁴ Ni jurumukɛla nimisara, an ninsɔn be diya kosɔbɛ! (Luka 15:7, 10). Nka, jɔn tigitigi lo b’a dɛmɛ a ka nimisa? Yala diinan mɔgɔkɔrɔw lo wa? Kana ɲinɛ ko Pol y’a fɔ jurumukɛlaw koo la ko: “N’a sɔrɔ Ala bena u dɛmɛ u ka nimisa.” (2 Tim. 2:25). O la, Jehova lo be kerecɛn dɛmɛ a k’a miiricogo n’a ka kokɛcogow yɛlɛma, adamaden tɛ. Pol y’a ɲɛfɔ koo ɲuman minw be kɛ jurumukɛla nimisanin kɔ. O b’a tigi dɛmɛ a ka tiɲɛn faamu koɲuman. O b’a dɛmɛ fana ka hakili sɔrɔ ani ka kisi ka bɔ Sutana ka jaan na.—2 Tim. 2:26.

15. Diinɛ maakɔrɔw bɛ se ka ta’a fɛ ka jurumukɛla nimisalen dɛmɛ cogo di?

¹⁵ Ni jurumukɛla dɔ nimisara, diinan mɔgɔkɔrɔw ka kɔmite bena to ka taga bɔ a ye walisa k’a dɛmɛ a k’a ka limaniya barika bonya. U bena a dɛmɛ fana a ka lɔ kelen kan Sutana ka kɔrɔbɔliw ɲɛ ani ka to ka koo tilennin kɛ (Eburuw 12:12, 13). Tiɲɛn lo ko diinan mɔgɔkɔrɔw tɛna jurumukɛla ka kɛtaw lakali mɔgɔ si ye. Nka, n’a sɔrɔ u ka ɲi ka kafodenw lalɔnniya mun lo la?

“OLU KƆRƆFƆ MƆGƆW BƐƐ ƝƐ NA”

16. Paul tun b’a fɛ ka mun de fɔ 1 Timote 5:​20 kɔnɔ, tuma min na a ko “mɔgɔw bɛɛ ɲɛ na”?

¹⁶ Vɛrise nin kalan: 1 Timote 5:20. Timote tun ye diinan mɔgɔkɔrɔ ye ani Pol y’a fɔ a ye ko a ka jurumukɛlaw jalaki “mɔgɔ bɛɛ ɲana.” A tun b’a fɛ ka mun lo fɔ do? A tun t’a fɔra le ko waajibi lo o ka kɛ kafodenw bɛɛ “ɲana.” Nka, a tun kaan be mɔgɔ damanin lo ma minw tun b’o koo kala ma. N’a sɔrɔ u ɲɛɛ lara o koo kan walima jurumukɛla tun y’a ka koow lakali u ye. Diinan mɔgɔkɔrɔw bena a fɔ olu dɔrɔn lo ye k’o koo ɲɛnabɔra ani ko u ye jurumukɛla kolo.

17. Ni mɔgɔ caman bɔra jurumuba dɔ kɛli kalama jɛkulu kɔnɔ, walima ni u bɛna bɔ a kalama, kunnafoni jumɛn de ka kan ka di jɛkulu mɔgɔw ma, ani mun na?

¹⁷ Tuma dɔw la, kafoden caaman b’a kala ma ka ban ko balima dɔ ye jurumuba kɛ wala u ka teli ka bɔ o kala ma. O koo ɲɔgɔn na, jurumukɛla ka ɲi ka jalaki kafodenw bɛɛ lo “ɲana.” O la, diinan mɔgɔkɔrɔw be kunnafoni dɔ lase kafodenw ma ko u basigira Bibulu kan k’o balima kolo. Mun na do? Pol ko: “Waasa ni tɔɔ nunu y’o ye, olu be siran” ka kojugu kɛ.

18. Ni denmisɛnnin batiselen dɔ ye jurumuba kɛ, diinɛ maakɔrɔw ka kan ka o ko ɲɛnabɔ cogo di? (Ja fana lajɛ.)

¹⁸ Denmisɛn batizenin min sii ma se saan 18 ma, n’ale ye jurumuba dɔ kɛ do? Diinan mɔgɔkɔrɔw jɛnkulu be labɛn kɛ walisa diinan mɔgɔkɔrɔ fila ka ɲɔgɔn lajɛn n’ale n’a bangebaga kerecɛnw ye.b U bena a ɲini k’a lɔn bangebagaw ye koo minw kɛ walisa k’u deen dɛmɛ a ka nimisa. Ni deen sɔɔn ka ɲi ani a be sɔnna a bangebagaw ka dɛmɛ na, o diinan mɔgɔkɔrɔ fila be se k’a latigɛ ko kuun t’a la kɔmite dɔ k’o koo ɲɛnabɔ. Jehova yɛrɛ ye kunkanbaara kalifa bangebagaw lo ma ko u k’u deenw kolo ni kanuya ye (Deter. 6:6, 7; Talenw 6:20; 22:6; Efɛz. 6:2-4). Tuma kelen kelen, o diinan mɔgɔkɔrɔw bena to ka baro kɛ ni bangebagaw ye walisa ka la a la ko u deen be dɛmɛ sɔrɔla Alako ta fan fɛ. Nka, ni denmisɛn batizenin dɔ t’a ka koo jugu dabilara do? N’o lo, kɔmite dɔ mɔgɔw bena ɲɔgɔn lajɛn n’o deen n’a bangebaga kerecɛnw ye walisa k’o koo ɲɛnabɔ.

‘JEHOVA KA HINƐ NI A KA ƝUMAYA KA BON’

19. Diinɛ maakɔrɔw bɛ se ka u seko bɛɛ kɛ cogo di, ka Jehova ladege ni u bɛ ka kuma ni jurumukɛla ye?

¹⁹ Diinan mɔgɔkɔrɔ minw sugandira ka kɛ kɔmite dɔ mɔgɔw ye, Jehova b’a ɲini u fɛ u k’u jija kafo saniyanin ka to (1 Kor. 5:7). U ka ɲi fana k’u seko bɛɛ kɛ ka jurumukɛla dɛmɛ a ka nimisa. O la, u be to ka koow filɛ ni ɲɛɛ ɲuman ye ani u be la a la k’o tigi be se k’a sɔɔn yɛlɛma. Mun na do? Sabu u b’a fɛ ka Jehova ladegi, ale min ye “ɲumanya ni makaritigi ye.” (Zaki 5:11). Ciden Zan tun b’a balimaw minɛ ni kanuya ye. A y’a sɛbɛ ko: “Ne deenw, ne be sɛbɛ nin cira aw ma, waasa aw kana hakɛ kɛ. Nga ni min nan’a kɛ, soronanikɛla b’an fɛ Faa Ala kɔrɔ n’o ye Yezu Krista ye, mɔgɔtilennin lo.”—1 Zan 2:1.

20. An bɛna ɲinikali jumɛnw de jaabi kalansen nata la?

²⁰ A fɔ man di nka tuma dɔw la, jurumukɛla tɛ nimisa. N’o lo, u ka kan k’a bɔ kafo kɔnɔ. Diinan mɔgɔkɔrɔw b’o koo ɲɔgɔn ɲɛnabɔ cogo di? An bena o lo ye Kɔrɔsili Sangaso nin ka barokun laban na.