An ka an seko bɛɛ kɛ forobaara la—An kɛtɔ ka lɛtɛrɛ ɲumanw sɛbɛn

MUN NA O NAFA KA BON: Kɔrɛntekaw ka sɛbɛn 1 ye ciden Paul ka sɛbɛn 14 dɔw la kelen ye a ye minnu sɛbɛn ka ci a krecɛn ɲɔgɔnw ma walasa ka dusu don u kɔnɔ. Lɛtɛrɛ sɛbɛnni nafa dɔ ye min ye, o ye ko a sɛbɛnbaga bɛ se k’a ka kuma fɔtaw sugandi koɲuman ani a bɛna a ci min ma o tigi bɛ se k’a kalan siɲɛ caman. Lɛtɛrɛw cili ye cogo ɲuman ye min fɛ an bɛ se ka seereya di an somɔgɔw ani an dɔnbagaw ma. Cogoya ɲumanba don fana min fɛ an bɛ se ka seereya di mɔgɔw ma an ni minnu ka ɲɔgɔnye man nɔgɔn. Misali la, a bɛ se ka kɛ ko dɔ y’a jira ko kibaru duman ka di a ye nka a tigi sɔrɔli man nɔgɔn a ka so. An ka waajulikɛyɔrɔ la, a bɛ se ka kɛ ko dɔw lasɔrɔli man nɔgɔn ka d’a kan u bɛ sankaso lakananenbaw kɔnɔ, kinw na kɔlɔsibagaw bɛ minnu dondaw la, walima yɔrɔjanbaw la minnu lasɔrɔli man nɔgɔn. An ka kan ka fɛn minnu to an hakili la olu dɔw ye jumɛnw ye, kɛrɛnkɛrɛnnenya la ni an bɛ lɛtɛrɛ sɛbɛn k’a ci dunan dɔ ma?

AN BƐ SE KA O KƐ COGO MIN NA:

• 

  N’a y’a sɔrɔ a tigi tun bɛ i ɲɛkɔrɔ, i tun bɛna min fɔ, o sɛbɛn. Kabini lɛtɛrɛ daminɛ na, i tɔgɔ fɔ ani kun min na i bɛna lɛtɛrɛ ci, o jira ka jɛya. Laala i bɛ se ka ɲininkali dɔ kɛ, a tigi bɛ se k’a hakili jagabɔ min kan ani ka an ka siti kofɔ a ye. O kɔ, Cours bibliques disponibles sur jw.org, Bibulukalan min bɛ kɛ mɔgɔw kun u ka so, olu kofɔ a ye walima an bɛ Bibulukalan kɛ ni gafe minnu ye, olu dɔ la kelen tilayɔrɔba dɔw barokunw fana fɔ a tigi ye. An ka gafew i n’a fɔ siti ɲinini sɛbɛn, weleli sɛbɛn walima sɛbɛndennin, olu dɔ la kelen bɛ se ka bila lɛtɛrɛ kɔnɔ

• Kana lɛtɛrɛ janya. I ka lɛtɛrɛ mankan ka janya kojugu, o la a cira mɔgɔ min ma, o tigi tɛna sɛgɛn a kalanni na.—Lɛtɛrɛ misali dɔ lajɛ

• Lɛtɛrɛ sɛbɛnnen kɔ, segin k’a kalan walasa ka filiw bɛɛ bɔ a la ani k’a lajɛ n’a y’a sɔrɔ a kalanni ka nɔgɔn. I jija a kɔnɔkumaw k’a tigi nisɔndiya, a sɛbɛn ni bonya ani hakilina ɲuman ye. Tɛnburu hakɛ minnu ka kan ka nɔrɔ lɛtɛrɛ la, i jija ka olu bɛɛ nɔrɔ a la.