ƝIninkali Jaabi

◼ Ni cɛ ni muso dɔ b’a fɛ ka u ka furu kɛ Masaya so kɔnɔ, u ni maakɔrɔw ka kan ka kuma fɛn jumɛnw kan?

Furu minnu ko labɛnna ka kɛɲɛ ni Bibulu sariyakolow ye, olu bɛ bonya da Jehowa kan. A bɛ ten fana kɛrɛnkɛrɛnnenya la furuw ko la minnu bɛ kɛ Masaya so kɔnɔ, bawo ko minnu bɛ kɛ o yɔrɔ la, mɔgɔw bɛ o kow mafilɛ an ka jamakulu ka kow ye, k’a jira fana jamakulu sugu min don. Ni furukɛlaw y’a ɲini u ka furu ka kɛ Masaya so kɔnɔ, a bɛnnen don olu ni jɛkulu maakɔrɔw ka kuma furu koɲɛ dɔw kan walisa “fɛn bɛɛ ka kɛ cogo bɛnnen na, a ko ɲɛnabɔlen koɲuman”.-1 Kɔr. 14:40.

Ni cɛ ni muso dɔ b’a fɛ ka u ka furu kɛ Masaya so kɔnɔ, u ka kan ka lɛtɛrɛ sɛbɛn, k’a jira o kɔnɔ k’u b’a fɛ ka u ka furu kɛ Masaya so kɔnɔ. U bɛna o lɛtɛrɛ ɲɛsin jɛkulu Baara komite ma min bɛ a ka lajɛw kɛ o Masaya so kɔnɔ. U ka lɛtɛrɛ ka kan ka kɔn ka di joona ani u ka kan k’a jira fana u b’a fɛ ka u ka furu kɛ don min na ani waati min na Masaya so kɔnɔ. U ka kan ka to u hakili la ko maakɔrɔw tɛna jɛkulu ka lajɛ bolodalen lɛrɛ yɛlɛma u ka furu kama. Ka fara o kan, cɛ ni muso minnu b’a fɛ ka furu ɲɔgɔn ma, tɔgɔ ɲuman ka kan ka kɛ u la, wa, o ka sɔrɔ fana ko u bɛ u ka ɲɛnamaya kɛ ka bɛn Bibulu sariyakolow ni Jehowa ka sariyakolo tilennenw ma.

U b’a fɛ u ka furu kow ka kɛ cogo min na, u ka kan k’o fɔ jɛkulu ka Baara komite ye, k’a sɔrɔ ka o kow sigi, yɛlɛma tɛna don minnu na tuguni. O kun ye u ka da a la tigitigi ko u ka furu bɛna jira koɲuman ko an ka Ala ye Ala ye min ni bonya ka kan. Hali ni maakɔrɔw tɛna a ɲini ka cɛ ni muso diyagoya u ka kow kɛ i n’a fɔ olu b’a fɛ cogo min na, ni fɛn dɔ bɛ u ka ko labɛnnenw kɔnɔna na min man ɲi, maakɔrɔw bɛ yɛlɛma minnu ɲini u fɛ, u ka kan ka olu kɛ. Fɔli min ka kan ka kɛ, o ye fɔli dɔrɔn ye min sugandira ka bɔ an ka Mélodies du Royaume na walima min sugandira ka bɔ an ka dɔnkilida gafe kɔnɔ. Ni u b’a fɛ ka Masaya so cɛɲɛ ni fɛn o fɛn ye walima ka sigilanw bilacogo yɛlɛma, fo u ka yamaruya sɔrɔ olu ko la. Ni fotow ka kan ka ta walima ni furu ja ka kan ka ta wideyo la, olu man ka kan ka kɛ cogo la min mankutu bɛ bonya ni furu yɛrɛ danbɛ ye. Maakɔrɔw bɛ se ka jɛn n’a ye fana ko ko dɔw labɛnni ka kɛ u ka furu don kama Masaya so kɔnɔ, n’a y’a sɔrɔ olu labɛnni tɛna kɛ baasi ye jɛkulu bolo jɛkulu ka ko wɛrɛ labɛnnenw kosɔn. Welesɛbɛn si man kan ka nɔrɔ kunnafoni walan kan. Nka, maakɔrɔw bɛ se ka kunnafoni surun dɔ kɛ Baara ka lajɛ kɛwaati la walisa ka jɛkulu kɔnɔmɔgɔw ladɔnniya ko furu bɛna kɛ Masaya so kɔnɔ.

Mɔgɔ minnu sugandira walisa ka kɔɲɔkɛ ni kɔɲɔmuso bilasira, hali ni wajibi tɛ olu bɛɛ ka kɛ mɔgɔ batiselenw ye, a bɛnnen tɛ mɔgɔw ka sɔrɔ olu la minnu ka ɲɛnamaya kɛcogo bɛ Bibulu sariyakolow kɛlɛ ka juguya kosɛbɛ, walima minnu taamacogo bɛ mɔgɔ welelenw bila ka siga u ka jogoɲuman ko la. N’a bɛ se ka kɛ, maakɔrɔ sugandilen dɔ de ka kan ka furu koɲɛ ɲɛminɛ. Maakɔrɔw de ye karamɔgɔw ye minnu bɛ mankutuw dafa walisa ka mɔgɔw kalan Ala ka Kuma na. O kosɔn, olu de bɛ se kosɛbɛ ka Bibulu sariyakolow nafa jira minnu bɛ waleya o ko nafama in na.-1 Tim. 3:2.

Ikomi maakɔrɔ min bɛna furu koɲɛ ɲɛminɛ, ale fana tɔgɔ bɛ furu koɲɛ la, ko minnu latigɛla furu ko la, ale fana ka kan ka kɔn ka ladɔnniya olu bɛɛ la. Ale ni furukɛlaw bɛna ɲɔgɔn ye walisa k’a dɔn u taamacogo kɛra min ye tuma min na u tun bɛ bɔ ɲɔgɔn fɛ. Furukɛlaw ka kan k’u kɔnɔjɛya a ye ani k’a fɔ a ye u jogo kɛra min ye tiɲɛ na. N’a y’a sɔrɔ cɛ walima muso tun furulen don, o ka kan ka se ka dalilu jira ko Bibulu sira la ani sariya ɲɛkɔrɔ, a hɔrɔnyalen don ka furu kɛ. (Mat. 19:9) Furusa sɛbɛn laban sen bɛ dalilu la, a bɛna min jira maakɔrɔ la.

Ni furukɛlaw bɛ u kɔnɔ jɛya ɲɔgɔn ye k’a sɔrɔ u ma siran ani n’u bɛ sɔn cogo dafalen na maakɔrɔw ka laadilikan na, u ka fura bɛna kɛ nisɔndiya sababu ye bɛɛ bolo.-Nta. 15:22; Heb. 13:17.