I bɛ se ka kɛ karamɔgɔ ye
1. Cogo kɛrɛnkɛrɛnnen jumɛn bɛ Masaya weleweledala kelen-kelen bɛɛ bolo?
1 Ka mɔgɔ dɔ kalan Ala ka tiɲɛkuma na, o ye cidenyabaara ɲɛw dɔ la kelen ye min bɛ hɛrɛba lase mɔgɔ ma. Ka o tigi ye ka sɔn Masaya cikan ma ani k’a dɛmɛ a ka gɛrɛ dunuya masaba la, o ye ko ye min ka kan ka diya an ye. (Yak. 4:8) Ka mɔgɔ dɔ kalan min bɛ Ala ka tiɲɛkuma fɛ kosɛbɛ ani k’a ye ko a y’a daminɛ ka yɛlɛmaw don a jogo la, a yecogo la ani a taamacogo la, o ka kan ka kɛ Masaya weleweledala kelen-kelen bɛɛ kuntilenna ye.—Mat. 28:19, 20.
2. Mun b’a to mɔgɔ dɔw tɛ sɔn ka Bibulukalan ɲɛminɛ ani mun bɛna u dɛmɛ u ka sɔn o ma?
2 An k’an jigi da Jehowa kan: Fɔlɔ la, Ala ka baarakɛla kantigi dɔw tun dalen t’a la ko Ala ye baara min di u ma ka kɛ, ko u tun bɛ se k’o kɛ. Nka Musa, Jeremi, Amos ni mɔgɔ gansan wɛrɛw ye u jigi da Jehowa Ala kan minkɛ, siranya min tun bɛ u la, u sera ka se sɔrɔ o kan, wa, u ye baara ɲɛnama kɛ. (Ek. 4:10-12; Jer. 1:6, 7; Amos 7:14, 15) Ciden Paul fana y’a “ja gɛlɛya.” A sera k’o kɛ cogo jumɛn na? A y’a jira ko “Ala” de ye a ja gɛlɛya. (1 Tes. 2:2) Tiɲɛ na, an bɛɛ bɛ se k’an jigi da Jehowa kan walisa a k’an dɛmɛ, ka hakilitigiya ni fanga di an ma, an mago bɛ minnu na walisa ka se ka Bibulukalanw ɲɛminɛ minnu bɛ taa ɲɛ.—Esa. 41:10; 1 Kɔr. 1:26, 27; 1 Pi. 4:11.
3, 4. Kalan sugu jumɛn de sigira sen kan walisa k’an dɛmɛ ka mɔgɔw kalan Ala ka Kuma na?
3 An ka sɔn Ala ka an kalan: An ka Karamɔgɔba Jehowa Ala bɛ an kalan mɔgɔ kalan kɛcogo la, kalan bolodalen basigilen dɔ sababu fɛ min sinsinnen bɛ Bibulu kan, walisa an ka se ka kɛ karamɔgɔw ye minnu bɛ se u ka baara la cogo dafalen na. (Esa. 54:13; 2 Tim. 3:16, 17) An ka sɔn o kalan ma, ka an seko bɛɛ kɛ ni cogo dira an ma ka dɔ fara an ka faamuyali kan Bibulu ko la ani ka dɔ fara an seko kan walisa ka Bibulu ka tiɲɛkumaw kalan kɛ mɔgɔw kun. Hali ni o de ye Ala-ka-Marako kalan ni Baara ka lajɛ kuntilenna fɔlɔ ye, jɛkulu lajɛw bɛɛ b’an dege an k’an sinsin Ala ka Kuma kan walisa ka mɔgɔw kalan.
4 I jija ka cogo nɔgɔnw dege walisa ka mɔgɔw kalan hali Bibulu ka tiɲɛkuma dunbaw la. L’École du Ministère théocratique ɲɛ 227 y’a jira ko n’i b’a fɛ ka mɔgɔw dɛmɛ u ka kumakun dɔ faamu, e yɛrɛ de ka kan fɔlɔ k’o kumakun faamu cogo jɛlɛn na. N’an bɛ ɲɛfɔli kɛ lajɛw la, o b’an dɛmɛ ka yɔrɔ kolomaw to an hakili la walisa an ka se ka baara kɛ ni olu ye kɔfɛ. O kosɔn, i ka lajɛw labɛn koɲuman. I bɛna da i yɛrɛ la ka taa a fɛ k’i bɛ se ka mɔgɔw kalan.
5. Degeli cogo wɛrɛ jumɛn bɛ sɔrɔ jɛkulu kɔnɔna na walisa k’an dɛmɛ ka taa ɲɛ an ka mɔgɔ kalan baara la?
5 I ko a fɔra nin barokun daminɛ na cogo min na, siga t’a la ko Kretiɛn cidenyabaarakɛlaw bɛ u dege u cidenyabaarakɛla ɲɔgɔnw fɛ, n’u bɛ ka kalanden-kɛli baara kɛ ɲɔgɔn fɛ. (Luka 10:1) N’a bɛ se ka kɛ, weleweledalaw bilasira minnu bɛ se kosɛbɛ mɔgɔ-kalan na tuma min na u bɛ Bibulukalan baara kɛ. Tutigɛbagaw, maakɔrɔw ni lakɔlɔsibaga taamakɛlaw sen bɛ o weleweledalaw la. U bɛ baara kɛ cogo min na ni misali nɔgɔnw ni fɛn wɛrɛw ye minnu bɛ an ka kalankɛ sɛbɛnw kɔnɔ walisa ka Bibulu ka tiɲɛkumaw ɲɛfɔ, i ka o kɔlɔsi. I bɛ se ka min kɛ walisa ka taa ɲɛ i ka mɔgɔ kalan cogo la, u ɲininka o la. (Nt. 1:5; 27:17) An balimakɛw ni an balimamusow bɛ an degeli min kɛ, an ka waleɲumandɔn jira o ko la, bawo tiɲɛ-tiɲɛ na o degeli bɛ bɔ Ala de yɔrɔ.—2 Kɔr. 3:5.
6. Walisa ka kɛ Ala ka Kuma karamɔgɔ ye, mun de wajibiyalen bɛ?
6 I jigi da Jehowa kan, ani i ka nafa bɔ kalan na, a bɛ min lase i ma. A kɛ i kuntilenna ye ka Jehowa deli i ka ɲɛtaa ko la mɔgɔ kalan kɛcogo la. (Zab. 25:4, 5) Nisɔndiya min b’a la ka mɔgɔ dɔ dɛmɛ a ka kɛ i ko e yɛrɛ, ka kɛ Ala ka Kuma karamɔgɔ ye, e fana bɛ se ka o nisɔndiya sɔrɔ.