A’ye aw ka kɔɲɔ labɛn cogo la min bɛ bonya da Jehova kan

1-2. Jehova bɛ kɔɲɔ ye cogo di?

YALA i b’i yɛrɛ labɛnna furu kama wa? N’o lo, o bena kɛ loonba ye i fɛ! N’a sɔrɔ i bolo degunnin lo kosɔbɛ i ka furu labɛnw kosɔn. Jehova b’a fɛ i k’i ka furulona diyabɔ ani ele n’i furuɲɔgɔn ka hɛɛrɛ sɔrɔ aw ka furu kɔnɔ.—Talenw 5:18; Dɔnk. 3:11.

² A kɔrɔtanin lo kosɔbɛ aw ka bonya la Jehova kan aw furulon na. Mun na do? Ani aw be se k’o kɛ cogo di? Minw b’u yɛrɛ labɛnna furu kama, barokun nin labɛnna olu lo kama. Nga an bena sariyakolo minw lajɛ, u be se k’an bɛɛ dɛmɛ n’a y’a sɔrɔ ko u y’an weele furu dɔ la wala ni dɔw ye ladiliw ɲini an fɛ walisa k’u ka furu labɛn.

MUN NA JEHOVA NI BONYA KA KAN?

3. Krecɛn minnu bɛ ka u ka furu labɛn, olu ka kan ka mun de to u hakili la ani mun na?

³ Kerecɛn minw b’u yɛrɛ labɛnna furu kama, u bena desizɔn minw ta, o ka ɲi ka kɛɲɛ ni sariyakolow ye Jehova ye minw di Bibulu kɔnɔ. Mun na do? Sabu Jehova lo ye furu sigi. Ale lo ye Adama ni Awa furu siri, o min kɛra furu fɔlɔ ye (Zɛnɛzi 1:28; 2:24). O kama minw b’u yɛrɛ labɛnna furu kama, u ka ɲi ka miiri k’a filɛ u bena bonya la Jehova kan cogo min na u furulon na.

4. Minnu bɛ ka u ka furu labɛn, kun jumɛn de bɛ u bolo ka bonya da Jehova kan u ka kɔɲɔ don na?

⁴ N’i b’i yɛrɛ labɛnna furu kama, i ka ɲi k’i janto Jehova ka miiriya la kuun kɔrɔtanin wɛrɛ kosɔn. O ye ko a y’i sankolola Faa ani i Teri sɔbɛ ye (Eburuw 12:9). Siga t’a la ko i t’a fɛ o teriya ka sa. I t’a fɛ abada koo dɔ ka kɛ o loon na wala loon wɛrɛ la min bena i Teri dusu tiɲɛ (Zab. 25:14) . Jehova ye min bɛɛ kɛ i ye ani a bena min kɛ i ye, n’i miirila o la, yala i t’a fɛ ka bonya la a kan i furulon na wa?—Zab. 116:12.

AW BƐ SE KA BONYA DA JEHOVA KAN COGO DI?

5. Minnu bɛ ka u ka furu labɛn, Bibulu bɛ se ka u dɛmɛ cogo di k’u ka kɔɲɔ labɛn?

⁵ Furu ka ɲi ka siri cogo min na wala kɔɲɔya fɛti ka ɲi ka kɛ cogo min na, Bibulu tɛ sariyaw di o koo la. O la, furuɲɔgɔnw be se k’u ka furu labɛnw kɛ ka kɛɲɛ n’u ka koow cogoya, u ka jamana ka kokɛcogow ani u diyanankow ye. Gofɛrɛnɛman ye sariya minw sigi furu koo la, Jehova sagokɛlaw b’o fana labato (Mat. 22:21). Minw b’u yɛrɛ labɛnna furu kama, u mana desizɔn o desizɔn ta ka kɛɲɛ ni Bibulu ka sariyakolow ye, u bena bonya la Jehova kan ani k’a ninsɔn diya. O la, i ka ɲi ka Bibulu ka sariyakolo jumanw lo to i hakili la?

6. Faamaw ye sariya minnu sigi furu kama, minnu bɛ ka u ka furu labɛn mun na u ka kan ka o sariyaw labato?

⁶ Gofɛrɛnɛman ka sariyaw labato (Ɔrɔm. 13:1, 2). Jamana caaman na, minw b’a fɛ ka furu, u ka ɲi ka kɔn ka gofɛrɛnɛman ka sariya dɔw labato. U be jamana min na, u ka ɲi ka kunnafoniw ɲini o sariyaw koo la. N’i t’a lɔn i bena o kɛ cogo min na, kana sigasiga ka dɛmɛ ɲini diinan mɔgɔkɔrɔw fɛ.b

7. Aw bɛ se k’aw ka kɔɲɔ labɛn cogo di walisa kow kɛcogo ka bonya da Jehova kan?

⁷ I janto walisa i ka kɔɲɔya fɛti ka bonya la Jehova kan (1 Kor. 10:31, 32). I jija walisa koo o koo bena kɛ i furulon na, o kana kɛ ka kɛɲɛ ni duniɲamɔgɔw ka miiriya ye, nga o ka kɛɲɛ ni Ala ka hakili senu deen ye (Gal. 5:19-26). Komi cɛman lo bena kɛ denbaya kuntigi ye, ale lo ka kan k’a janto walisa u ka furu ka kɛ ninsɔndiyako ye ani o ka bonya la Jehova kan. Mun lo be se k’a dɛmɛ o la? Ni furu kalan basigira Bibulu kan, ani n’a kɛra ni kanuya, dusudiya ani bonya ye, o b’a to lamɛnbagaw bɛɛ b’a faamu ko furu ye Jehova ka labɛn lo ye. O kalan bena lamɛnbagaw bɛɛ nafa sabu u bena a faamu ko furu kɔrɔtanin lo kosɔbɛ. O kama, kerecɛnw fanba b’a latigɛ k’u ka furu kɛ Masaya Boon na n’a be se ka kɛ. N’aw b’a fɛ k’aw ka furu kɛ Masaya Boon na, aw ye kɔn ka demandi kɛ k’a di diinan mɔgɔkɔrɔw jɛnkulu ma o koo la.

8. N’a y’a sɔrɔ aw b’a fɛ ka ɲɛnajɛ dɔ kɛ aw ka kɔɲɔ la, aw bɛ se ka mun de kɛ walisa o ka se ka bonya da Jehova kan? (Romɛkaw 13:13)

⁸ Ɔrɔmukaw 13:13 kalan. N’aw y’a latigɛ ka fɛti kɛ aw furulon na, aw be se ka mun lo kɛ walisa o kana kɛ ka kɛɲɛ ni duniɲamɔgɔw ka miiriya ye? Gɛrɛkikan kumaden min bayɛlɛmana julakan Bibulu kɔnɔ ko “nugubatɔw,” o ɲɛsinna ɲɛnagwɛko ferekeninw lo ma, o minw na mɔgɔw tun be dɔrɔ min k’a dama tɛmɛ ani ka miziki bila a la fɔɔ dugutilama (kunnafoni wɛrɛ nin lajɛ Ɔrɔmukaw 13:13 koo la Bible d’étude kɔnɔ: “Fêtes débridées”). N’aw y’a latigɛ ka dɔrɔ di mɔgɔw ma, a’ y’aw janto mɔgɔ si kana a min k’a dama tɛmɛ.c N’aw y’a latigɛ fana ko miziki bena kɛ yen, a’ y’aw janto a mankan kana caya kojugu walisa mɔgɔw ka se ka baro kɛ. A’ ye kɔn k’a filɛ miziki sugu minw lo ani n’u kɔrɔ ka ɲi walisa u kana mɔgɔ si kunnatiɲɛ.

9. Ni mɔgɔ dɔw ka kan ka kuma ta aw ka kɔɲɔ ɲɛnajɛ la, walima aw bɛ ka ɲɛnajɛ dɔ labɛn o kama, aw ka kan k’aw hakili to mun de la?

⁹ Yɔrɔ dɔw la, kɔɲɔya fɛti tuma na, labɛnw be kɛ walisa furuɲɔgɔnw teri dɔw ani u somɔgɔ dɔ ka wuli ka kuma damanin fɔ. Tuma dɔw la fana, u be se ka videwow ni fotow yira mɔgɔw la wala ka ɲɛnagwɛko wɛrɛw kɛ. Tiɲɛn lo ko o koow be se ka dɔ fara fɛti diya kan. Nga aw ka ɲi k’aw janto ko koo minw bɛɛ bena kɛ yen, o ka mɔgɔw barika bonya (Filip. 4:8). A’ y’aw yɛrɛ ɲininga ko: “Yala o koow bena bonya la tɔɔw kan wa? O bena danbe la furu kan wa?” Ani min yɛrɛ kɔrɔtanin lo ka tɛmɛ o bɛɛ kan, o ye ko: “Yala o bena bonya la Jehova kan wa?” Hali ni yɛlɛko kuma dɔw bɛnnin lo, kuma bɛnbali si man kan ka fɔ yen i n’a fɔ kuma minw ɲɛsinna kakalayakow ma (Efɛz. 5:3). N’a sɔrɔla ko aw teri wala aw somɔgɔ dɔw ka kan ka kuma damanin fɔ, a’ y’aw janto k’u y’a faamu aw t’a fɛ u ka kuma sifa minw fɔ.

10. Minnu bɛ ka u ka kɔɲɔ labɛn, mun na u ka kan ka kow kɛ k’a bɛrɛbɛn? (1 Yuhana 2:15-17)

¹⁰ Koow kɛ k’a dama kɛɲɛ (1 Zan 2:15-17 kalan). Jehova ninsɔn ka di n’a sagokɛlaw be bonya la a kan, sanni ka mɔgɔw ɲɛɛ sama u yɛrɛ kan. O la kerecɛn min be koow kɛ k’a dama kɛɲɛ, ale tɛna sɔn ka wari caaman don a ka kɔɲɔya fɛti la walisa k’a yɛrɛ yira. N’i y’i ka furu kɛ nɔgɔman na, nafa juman lo b’o la? Balimacɛ Mike be bɔ Nɔrvɛzi. Ale y’a fɔ ko: “Komi an ma juru ta, o y’a to an sera ka taga ɲɛ n’an ka piyɔniye baara ye. An y’an ka furu kɛ cogo nɔgɔman na, nga a diyara yɛrɛ le ani an ye wagati diimanw kɛ an tɛna ɲinɛ minw kɔ abada.” Balimamuso Tabitha be bɔ Ɛndi jamana na, ale ko: “An y’an yɛrɛ tanga hamikojugu ma. Komi an y’an ka furu kɛ cogo nɔgɔman na, o y’a to labɛn caaman tun t’an fɛ ka kɛ ani bɛnbaliyako caaman ma don an ni ɲɔgɔn cɛ.”

11. Kɔɲɔcɛ ni kɔɲɔmuso bɛ se k’a jira cogo di u ka finiw ni u yecogo fɛ ko u bɛ ka kow kɛ k’a bɛrɛbɛn? (Jaw fana lajɛ.)

¹¹ Yala i y’a latigɛ i bena fani min don i furulon na wa? Siga t’a la k’o loon, i b’a fɛ ka ɲɛ yɛrɛ le! Hali Bibulu sɛbɛwagati la, kɔɲɔcɛ ni kɔɲɔmuso tun b’u janto kosɔbɛ u sawura la (Ezayi 61:10). I bena fani min don i furulon na, n’a sɔrɔ o bena kɛ dan na dɔɔni loon tɔɔw ta la. Nga o ka ɲi ka kɛ fani ye min be danbe la i kan (1 Tim. 2:9). Kana fani ani bololafɛnw bila ɲɛ i furulon na.—1 Piyɛri 3:3, 4.

12. Mun na kɔɲɔcɛ ni kɔɲɔmuso ka kan ka ban laadalakow ma, minnu ni Bibulu kalansiraw tɛ bɛn?

¹² Landako minw bɛnnin tɛ ni Bibulu ka kalanw ye, ban u la (Yir. 18:4). Bi bi nin na, mɔgɔw ka teli ka kafiriyakow, jinakow ani ngalon lannako wɛrɛw ɲagami u ka kɔɲɔya la. Jehova b’an lasɔmi ko an k’an yɔrɔ janya o koo nɔgɔninw na (2 Kor. 6:14-17). Aw ka mara la, n’a sɔrɔ mɔgɔw ka teli ka landako dɔw kɛ u furulon na ani aw b’aw yɛrɛ ɲininga n’u bɛnnin lo ni Bibulu ka kalanw ye. N’o lo, aw y’a ɲini k’u jujɔn lɔn ani ka Bibulu ka sariyakolow lajɛ walisa k’a lɔn n’u bɛnnin lo.

13. Kɔɲɔcɛ ni kɔɲɔmuso bɛ se ka Jehova ladege cogo di ka ɲɛsin kadow ma?

¹³ Aw ka mara, minw weelela furu la, yala u ka teli ka kado di kɔɲɔcɛ ni kɔɲɔmuso ma wa? Ni dɔ y’a latigɛ ko a bena kado di, siga t’a la ko a bena o di ka kɛɲɛ n’a seko ye. Bibulu be kerecɛnw jija u ka tɔɔw sɔn, ani n’an b’o kɛ, o b’an ninsɔn diya (Talenw 11:25; Kɛw. 20:35). Nga an man kan k’a kɛ i n’a fɔ waajibi lo mɔgɔw ka kado di an ma, wala ko u man kan ka kado dennin di. Mɔgɔw mana a bɔ u yɛrɛ la ka kado o kado di an ma ka kɛɲɛ n’u seko ye, n’an b’u waleɲuman lɔn o kosɔn, an be Jehova lo ladegira.—2 Kor. 9:7.

AN BƐ SE KA GƐLƐYAW KUNBƐN ANI KA U KUNNASAGO COGO DI?

14. Mɔgɔ minnu tun bɛ ka u ka furu labɛn, olu dɔw ye gɛlɛya jumɛnw de sɔrɔ?

¹⁴ Ka se ka kɔɲɔya labɛn min bena bonya la Jehova kan, o man nɔgɔ tuma bɛɛ. Misali la, n’a sɔrɔ a b’i ɲɛɛ na ko a man nɔgɔ ka furu labɛn cogo nɔgɔman na. Charlie be Salomɔn guun kan. A ko: “A tun ka gwɛlɛ an ma kosɔbɛ k’a latigɛ an bena mɔgɔ minw weele an ka kɔɲɔya fɛti la. An teriw ka ca ani an ka mara la, bɛɛ lo b’a fɛ i k’ale weele i ka furu la!” An kumana Tabitha min koo la, ale ko: “An ka mara la, mɔgɔw ka teli k’u ka kɔɲɔya fɛti kɛ kooba ye. An tun y’a latigɛ ko an bena mɔgɔ 100 ɲɔgɔn dɔrɔn lo weele an ka furu la. An bangebagaw ye wagati ta ka sɔrɔ ka sɔn o ma.” Sarah be bɔ Ɛndi. A ko: “Dɔw be sinsin wari kan kojugu. Mɔgɔw bena min miiri u koo la, u be jɔɔrɔ o fana na. N’ facɛ kɔrɔw n’a dɔgɔw ka deenw ka furu kɛra koobaw ye. O la, a tun be n’ ɲɛɛ na ko n’ ka kɔɲɔya fɛti ka ɲi ka kɛ kooba ye ka tɛmɛ u ta kan.” Mun lo be se k’i dɛmɛ ka see sɔrɔ o gwɛlɛyaw ni gwɛlɛya wɛrɛw kan?

15. Mun na a nafa ka bon aw ka to ka delili kɛ aw kɛtɔ k’aw ka kɔɲɔ labɛn?

¹⁵ Aw ye to ka delili kɛ aw ka furu labɛnw koo la. Gwɛlɛya minw b’aw kan ani aw dusukunnakow ye minw ye, aw be se k’u bɛɛ fɔ Jehova ye delili la (Filip. 4:6, 7). Aw be se k’a deli a k’aw dɛmɛ ka desizɔn ɲumanw ta, k’aw hakili sigi ani k’aw jaa gwɛlɛya (1 Piyɛri 5:7). N’aw y’a ye ko Jehova b’aw dɛmɛna, o bena a to aw be la a la kosɔbɛ. Tabitha min kofɔra sanfɛ, ale y’a fɔ ko: “Ne ni n’ maminɛcɛ tun be hamina sabu an tun t’a fɛ bɛnbaliyako dɔ ka don an ni ɲɔgɔn cɛ ani an n’an somɔgɔw cɛ. O la, tuma o tuma n’an tun b’a fɛ ka baro kɛ an ka furu labɛnw koo la, an tun be delili kɛ fɔlɔ. An y’a ye tiɲɛn na ko Jehova y’an dɛmɛ an bɛɛ kaan bɛnnin tora.”

16-17. Ni aw bɛ ka aw ka kɔɲɔ labɛn, mun na aw ka kan ka kuma ɲɔgɔn fɛ ka ɲɛ kow kɛcogoya ɲuman kan?

¹⁶ Aw ye kuma ka gwɛ, nga aw y’o kɛ nɛmɛnɛmɛ (Talenw 15:22). Aw bena desizɔn caaman ta aw ka kɔɲɔya koo la. Misali la, aw bena a latigɛ aw bena furu loon min na, aw bena wari hakɛ min don o la, aw bena mɔgɔ minw weele ani koo caaman wɛrɛw. Sanni aw ka desizɔn ta koo dɔ la, aw ye baro kɛ o koo la ɲɔgɔn fɛ ani k’a filɛ Bibulu ka sariyakolo minw be se k’aw dɛmɛ o koo la. Kerecɛn kolɔnbaga dɔw ye ladili minw di aw ma, aw y’u lajɛ ɲɔgɔn fɛ fana. Aw b’a fɛ koow ka kɛ cogo min na, n’aw be baro kɛra n’aw somɔgɔw ye o koo la, aw y’o kɛ ni ɲumanya ye ani aw kana ja kelen kan. N’aw somɔgɔw b’a fɛ aw ka koo dɔw kɛ aw ka kɔɲɔya la, n’u bɛnnin lo, a’ y’aw jija k’o kɛ. Aw ka furu ye koo kɛrɛnkɛrɛnnin ye olu fana fɛ. N’aw tɛna se ka koow kɛ i ko u b’a fɛ cogo min na, aw y’a ɲɛfɔ u ye nɛmɛnɛmɛ fɛɛn min kama aw tɛna se k’o kɛ (Kɔlɔs. 4:6). Aw y’a ɲɛfɔ ka gwɛ aw somɔgɔw ye ko aw ka laɲinita jɔnjɔn ye min ye, o ye ko aw ka kɔɲɔya ka diya ani a ka bonya la Jehova kan.

¹⁷ N’aw bangebagaw tɛ Jehova batobagaw ye, n’a sɔrɔ a tɛna nɔgɔya aw ma k’a ɲɛfɔ u ye aw b’a fɛ ka koow kɛ cogo min na. Nga aw bena se k’o kɛ. Balimacɛ Santhosh be bɔ Ɛndi. Ale y’a fɔ ko: “An somɔgɔw tun b’a fɛ an ka Ɛndu landa dɔw kɛ an furulon na. Ne ni n’ maminɛmuso ye wagatijan ta k’an ka desizɔnw ɲɛfɔ u ye. U tun b’a fɛ an ka yɛlɛmani minw kɛ, n’an tun be se k’o kɛ ani n’o tun tɛ Jehova ka sariyaw kɛlɛ, an tun be sɔn o ma. Misali la, an tun b’a fɛ ka dumuni minw tobi, an y’o to yen k’u diyanye dumuni tobi walisa k’u ninsɔn diya. An y’a latigɛ fana ko dɔɔn tɛna kɛ ani dɔnkili tɛna la an ka kɔɲɔya fɛti la sabu an somɔgɔw ma deli o la.”

18. Aw bɛ se ka mun de kɛ walisa kow bɛɛ ka se ka kɛ ka ɲɛ aw ka kɔɲɔ don na? (1 Kɔrɛntekaw 14:40) (Ja fana lajɛ.)

¹⁸ Aw ye labɛnw kɛ ka ɲɛ. N’aw ye labɛnw kɛ ka ɲɛ, o bena dɔ bɔ aw ka hami na aw furulon na (1 Korɛntikaw 14:40 kalan). Wayne be bɔ Tayiwani. A ko: “Mɔgɔ minw tun bena an dɛmɛ ka baaraw kɛ an furulon na, an ye ɲɔgɔnye dennin dɔ kɛ n’u ye tile damanin ka kɔn an furulon ɲɛ. An tun ye labɛn minw kɛ, an ye baro kɛ o koo la ani an ye ɲɛyirali dɔw kɛ walisa koo bɛɛ ka kɛ ka ɲɛ an furulon na.” Aw ye mɔgɔ minw weele aw ka furu la, janko ka bonya la u kan, a’ y’aw seko bɛɛ kɛ walisa koo bɛɛ ka kɛ a wagati la.

19. Mun de bɛ se ka aw dɛmɛ walisa kow kana ta ka aw bolo dan aw ka kɔɲɔ don na?

¹⁹ Aw be se k’aw yɛrɛ tanga gwɛlɛya caaman ma, ni a’ y’aw yɛrɛ labɛn o kama (Talenw 22:3). Misali la, ni aw ka mara la mɔgɔw ka teli ka taga kɔɲɔya fɛti la hali n’u m’u weele, aw y’a filɛ aw bena koow kɛ cogo min na walisa o ɲɔgɔn kana aw sɔrɔ. Aw y’a janto walisa aw somɔgɔ minw tɛ Jehova sagokɛlaw ye, u bɛɛ k’a lɔn min bena kɛ ani aw t’a fɛ landako minw ka kɛ aw ka kɔɲɔya fɛti la, aw y’o ɲɛfɔ u ye. Aw be se ka barokun nin yira u la jw.org kan: “Comment se passe un mariage chez les Témoins de Jéhovah ?” Walisa koow ka kɛ ka ɲɛ aw ka kɔɲɔya fɛti la, aw ye balimacɛ kolɔnbaga dɔ kɛ aw ka kɔɲɔya “ɲamɔgɔ” ye (Zan 2:8). N’aw y’a ɲɛfɔ a ye ka gwɛ aw ye labɛn minw kɛ aw ka furu kama, a bena a janto walisa aw ka kɔɲɔya ka bonya la Jehova kan ani koow ka kɛ ka ɲɛ i ko aw b’a fɛ cogo min na.

20. Minnu bɛ ka u ka furu labɛn, olu man kan ka ɲinɛ mun de kɔ?

²⁰ Aw ka ɲi ka koo minw kɛ walisa k’aw ka kɔɲɔya labɛn, n’aw miirila o bɛɛ la, a be se ka kɛ aw ɲɛɛ na ko aw tɛna se k’o kɛ. Nga, aw y’a to aw hakili la ko aw ka kɔɲɔya ye tile kelen koo lo ye. O ye aw fila ka ɲɛnamaya daminɛ lo ye Jehova batoli la, o min bena ninsɔndiyaba di aw ma. A’ y’aw jija k’aw ka kɔɲɔya kɛ cogo nɔgɔman na ani o ka bonya la Jehova kan. A’ y’aw jigi la Jehova kan. A ka dɛmɛ barika la, aw bena se k’aw ka furu labɛn ka ɲɛ. Kɔfɛ n’aw miirila o la, aw ninsɔn bena diya ani aw tɛna nimisa fewu!—Zab. 37:3, 4.