Kalanden kuraw labɛn walisa u k’u kologɛlɛya ni mɔgɔw b’u kɛlɛ
1 Ni mɔgɔw ye Bibulukalan daminɛ ani n’u ‘b’a fɛ ka taama Ala ɲɛsiran na,’ sitanɛ bɛ cɛsiri kɛrɛnkɛrɛnnen kɛ walisa ka u kɛlɛ. (2 Tim. 3:12) Kɛlɛ bɛ se ka bɔ u baarakɛɲɔgɔnw, u lakɔlidenɲɔgɔnw walima u sigiɲɔgɔnw yɔrɔ. O bɛ se ka kɛ ko gɛlɛn ye Bibulu kalanden kuraw bolo k’a ye ko u somɔgɔ minnu ŋaniya ka ɲi, olu de bɛ ka u kɛlɛ.-Mat. 10:21; Mar. 3:21.
2 O kɛlɛ tun kofɔra: Kalanden kuraw ka kan k’a dɔn ko tɔɔrɔ ye fɛn ye u ka kan ka sigi ni min ye, wa, k’o ye fɛn ye fana min b’a jira ko u ye Krisita ka kalanden lakikaw ye. (Yuhana 15:20) Tuma dɔw la, an bɛ kɛlɛ min sɔrɔ ka bɔ mɔgɔw yɔrɔ, o sababu bɛ se ka kɛ faamubaliya ye Jehowa Seerew ko la. A to i hakili la ko n’i ye maloya sɔrɔ bawo i ye Yesu ka kalanden ye ani ko i ye Ala kan minɛ, o ye ko ye min bɛ nisɔndiyaba lase mɔgɔ ma. (Kɛw. 5:27-29, 40, 41) Kalanden kuraw hakili sigi ko Jehowa bɛ u kɔkɔrɔdon ni kanuya ye. (Zab. 27:10; Mar. 10:29, 30) N’u y’u ka kantigiya mara Jehowa fan fɛ, o b’a to koɲɛba min lawuli la Jehowa ka masabaya ko la dunuya bɛɛ kunna, u bɛ sɔrɔ Jehowa fan fɛ la la o koɲɛba la.-Nta. 27:11.
3 Dɔnniya lakika jɔyɔrɔ: Nafa min b’a la ka dɔnniya lakika sɔrɔ ka taa a fɛ hali ni ko gɛlɛnw bɛ se ka kɛ Bibulu kalanden da la, u lafaamuya kosɛbɛ o la. Sitanɛ b’a ɲini kɛlɛ sababu fɛ, k’u bali walisa u bɛ ka min kalan, o kana se ka sinsin u dusukun na. (Zab. 4:23; Luka 8:13) U ka kan ka Ala ka Kuma dɔnniya lakika ɲini ka taa a fɛ walisa u ka kɛ mɔgɔw ye minnu sinsinnen don kosɛbɛ dannaya la.-Zab. 1:2, 3; Kol. 2:6, 7.
4 U mago bɛ muɲu na: Ko gɛlɛn o ko gɛlɛn na, muɲu ka kan, wa, a bɛ se ka wolo kodumanw na. (Luka 21:16-19) Ni mɔgɔ bɛ kalanden kuraw kɛlɛ, nka, ni u b’o muɲu, olu yɛrɛ ni mɔgɔ wɛrɛw bɛ nafa sɔrɔ o la. U bɛ Jehowa ka setigiya ye ko a bɛ dugawu caman lase mɔgɔw ma, mɔgɔ minnu bɛ muɲu ni kantigiya ye.-Yak. 1:12.
5 Ciden Paul balima minnu tun bɛ Tesalonike, olu ye ɲɛtaa min kɛ alako ta fan fɛ, o tun ye Paul nisɔndiya kosɛbɛ. A ye barika da Ala ye olu ko la. Paul tun ye u caman dɛmɛ ka tiɲɛ dɔn. (2 Tes. 1:3-5) An fana bɛ se ka o nisɔndiya sugu ni o wasa sugu sɔrɔ, ni an bɛ an ka Bibulu kalandenw labɛn u kologɛlɛyalen ka to ni kɛlɛ bɛ u da la ani k’o muɲu.