Jehova bɛ an dɛmɛ ka muɲuli kɛ cogo di?

1. Mun na an ka kan ka muɲu ani mun de bɛ an dɛmɛ ka o kɛ? (1 Piɛrɛ 5:10)

JEHOVA sagokɛlaw mako be muɲuli la laban wagati gwɛlɛ nunu na. U dɔw be tɔɔrɔla kabi wagatijan bana dɔ kosɔn. Dɔ wɛrɛw ka mɔgɔ kanulen saya lo b’u tɔɔrɔla. Dɔ wɛrɛw fana somɔgɔw wala gofɛrɛnɛman lo b’u kɛlɛla (Mat. 10:18, 36, 37). La a la ko gwɛlɛya o gwɛlɛya b’i kan, Jehova be se k’i dɛmɛ k’o muɲu.—1 Piyɛri 5:10 kalan.

2. Mun de bɛ an krecɛnw dɛmɛ ka muɲu?

² Ka muɲu, o kɔrɔ ko ka to kantigiya la, ani ka kɛ ni jigiya ye gwɛlɛyaw, tɔɔrɔw wala kɔrɔbɔliw bɛɛ n’a ta. An kerecɛnw tɛ se ka muɲuli kɛ n’an yɛrɛ fanga dama ye. Nga an be sera k’o kɛ sabu Jehova be “sebagaya kabakoman” di an ma (2 Kor. 4:7). Barokun nin na, an bena kuma labɛn naani koo la, Jehova ye minw kɛ walisa k’an dɛmɛ ka muɲuli kɛ. An ben’a ye fana cogo min na an be se ka nafa sɔrɔ o labɛnw kelen kelen bɛɛ la.

DELILI

3. Mun na an bɛ se k’a fɔ ko delili ye dabalibanko ye?

³ Jehova ye labɛn kabakoman dɔ kɛ min be se k’an dɛmɛ ka muɲu. An ka dafabaliya bɛɛ n’a ta, a y’a kɛ an be se ka kuma n’ale ye, ani a b’an lamɛn (Eburuw 4:16). Miiri ka filɛ: An be se ka Jehova deli wagati bɛɛ ani an be se ka koo bɛɛ fɔ a ye. An mana a deli kaan o kaan na, a b’o mɛn ani a b’an lamɛn an mana kɛ yɔrɔ o yɔrɔ, hali n’an b’an kelen n’an kelen wala n’an be kaso la (Zonasi 2:2, 3; Kɛw. 16:25, 26). N’an hakili ɲagaminin lo fɔɔ an tɛ sera k’an ka miiriya fɔ, Jehova b’a faamu an tun b’a fɛ ka min fɔ (Ɔrɔm. 8:26, 27). Tiɲɛn na, delili ye Jehova ka labɛn kabakoman ye yɛrɛ le!

4. Mun na an bɛ se k’a fɔ ko ka Jehova deli walisa a k’an dɛmɛ ka muɲu, o delili bɛ bɛn ni a sago ye?

⁴ Jehova b’an hakili sigi a ka Kuma kɔnɔ ko “n’an ye fɛɛn o fɛɛn daali [ale] fɛ, n’o kɛra a sago ye, . . . a be mɛnni kɛ an fɛ.” (1 Zan 5:14). An be se ka Jehova deli a k’an dɛmɛ ka muɲuli kɛ wa? Ɔnhɔn! Sabu o delili bɛnnin lo n’a sago ye. Mun na an be se k’o fɔ? N’an be muɲuli kɛ, an be sababu di Jehova ma a ka se k’a darabɔbaga Sutana jaabi (Talenw 27:11). Ka fara o kan, Bibulu b’a fɔ ko Jehova “koo be mɔgɔ minw dusu la, a be barika don olu la.” (2 Til. Kib. 16:9). An be se ka la a la ko see be Jehova ye k’an dɛmɛ ka muɲu, ani a b’a fɛ k’o kɛ.—Ezayi 30:18; 41:10; Luka 11:13.

5. Delili bɛ hakilisigi di an ma cogo di? (Esayi 26:3)

⁵ Bibulu b’a fɔ ko n’an b’an dusukunnakow fɔ delili la, ‘Ala ka hɛɛrɛ min tɛmɛna mɔgɔw ka faamuyali ma, o le bena an tanga hamikojugu ma.’ (Filip. 4:7). An be Jehova waleɲuman lɔn kosɔbɛ o kosɔn. Mɔgɔ minw tɛ Jehova bato, gwɛlɛyaw b’olu fana kan ani u be fɛɛrɛ caaman ɲini walisa ka hakilisigi sɔrɔ. Misali la, u b’a ɲini k’u ka miiriyaw bɛɛ bɔ u kuun na walisa ka hakilisigi sɔrɔ. Nga Alako ta fan fɛ, farati b’o la yɛrɛ le (Matiyo 12:43-45 lajɛ). Hali n’o mɔgɔw ye hakilisigi sɔrɔ o fɛɛrɛ sababu fɛ, Jehova be hɛɛrɛ min di, o kɔrɔtanin lo ka tɛmɛ o hakilisigi ɲɔgɔn kan fɔɔ ka taga ka na. N’an be Jehova deli, an b’a yira ko an y’an jigi bɛɛ la ale lo kan, ani a b’a ka “hɛrɛ” di an ma tuma bɛɛ (Ezayi 26:3 kalan). A b’o kɛ cogo minw na, u la dɔ ye ko a b’an dɛmɛ an k’an hakili jigi vɛrise dɔw la minw b’an hakili sigi. O vɛrisew b’an hakili sigi sabu u b’a yira ko Jehova b’a janto an na ani ko a b’a fɛ an ka koow ka ɲɛ an bolo.—Zab. 62:2, 3.

6. Jehova ye sababu min di an ma an ka se k’a deli, i bɛ se k’a jira cogo di ko o ka di i ye? (Ja fana lajɛ.)

⁶ I be se ka min kɛ. Ni gwɛlɛya dɔ b’i kan, i “ka koow to Masaba [Jehova] bolo,” ani a deli walisa a k’a ka hɛɛrɛ d’i ma (Zab. 55:23). I mako be hakilitigiya min na walisa k’o gwɛlɛya muɲu, o fana deli Jehova fɛ (Talenw 2:10, 11). A deli a k’i dɛmɛ ka muɲuli kɛ. Nga kana ɲinɛ fana k’a fo i ka deliliw la (Filip. 4:6). Jehova be koo minw kɛra walisa k’i dɛmɛ ka muɲuli kɛ loon o loon, miiri o la ani a fo a ka dɛmɛ kosɔn. Jehova be duga minw lase i ma, kana a to i ka gwɛlɛyaw k’i bali k’o ye.—Zab. 16:5, 6.

ALA KA KUMA

7. Ka to ka Bibulu kalan, o b’an dɛmɛ cogo di ka muɲuli kɛ?

⁷ Jehova y’a ka Kuma di an ma walisa k’an dɛmɛ ka muɲuli kɛ. Bibulu kɔnɔ, vɛrise caaman b’an hakili sigi ko Jehova bena an dɛmɛ, siga t’o la. An ka misali kelen dɔrɔn lajɛ. Matiyo 6:8 b’a fɔ ko: “Aw mako be fɛɛn minw na, aw Faa Ala be olu lɔn sanni aw k’o daali a fɛ.” Yezu lo y’o kumaw fɔ ani a b’a Faa lɔn koɲuman ka tɛmɛ bɛɛ kan. O la, an be se ka la a la kosɔbɛ ko ni tɔɔrɔ b’an kan, Jehova b’a lɔn an mako be min na ani a bena an dɛmɛ. O jijali kumaw ɲɔgɔn caaman be sɔrɔ Bibulu kɔnɔ ani u be se k’an dɛmɛ an k’an jija ka gwɛlɛyaw muɲu.—Zab. 94:19.

8. (a) Bibulu sariyakolo dɔ jira min b’an dɛmɛ ka muɲuli kɛ. (b) Walisa Bibulu sariyakolow ka jigin an hakili la, an mago bɛ u la tuma min na, an ka kan ka mun de kɛ?

⁸ Bibulu ka sariyakolow be se k’an dɛmɛ ka muɲuli kɛ. O sariyakolow be se k’an dɛmɛ ka hakilitigiya sɔrɔ walisa ka desizɔn ɲumanw ta (Talenw 2:6, 7). Misali la, Bibulu b’an jija ko an kana hami kojugu siniko la, nga ko an k’an jigi la Jehova kan loon o loon (Mat. 6:34). N’an b’a kɛ an delinanko ye ka Bibulu kalan ani ka miiri a kan, an ka teli k’an hakili jigi sariyakolo dɔw la tuma min na an mako b’u la.

9. Maana minnu bɛ Bibulu kɔnɔ, olu bɛ se k’an ka dannaya barika bonya cogo di ka ɲɛsin Jehova ma?

⁹ Bibulu be mɔgɔ dɔw ka koo lakali minw be i ko anw. U y’u jigi la Jehova kan ani a y’u dɛmɛ (Eburuw 11:32-34; Zaki 5:17). N’an be miiri o maanaw kan, o b’a to an be la a la ko Jehova ye “an dogoyɔrɔ ye . . . a be fanga d’an ma. Dɛmɛbaga lo, min b’an gɛrɛfɛ tuma bɛɛ tɔɔrɔ waati la.” (Zab. 46:2). N’an miirila o cɛɛw n’o muso kantigiw koo la o b’a to an fana b’a fɛ k’u ka limaniya n’u ka muɲuli ɲɔgɔn ladegi.—Zaki 5:10, 11.

10. Ala ka Kuma, a ye o min di an ma, i bɛ se k’a jira cogo di k’o ka di i ye?

¹⁰ I be se ka min kɛ. Bibulu kalan loon o loon ani vɛrise dɔw sɛbɛ ka bila minw be se k’i dɛmɛ kosɔbɛ. Mɔgɔ caaman fana y’a ye ko n’u ye tilera kalan kɛ sɔgɔma, o b’a to u be miiri jijali kumaw kan tile kuru bɛɛ la. Balimamuso dɔ tɔgɔ ko Marie.a Ale y’o kumaw tiɲɛntigiya ye tuma min na dɔgɔtɔrɔw y’a yira ko kansɛri bana b’a bangebaga fila bɛɛ la. Mun lo y’a dɛmɛ ka muɲuli kɛ tuma min na a tun b’a jantora u la u ka kalo labanw na? A y’a fɔ ko: “Loon bɛɛ sɔgɔma, n’ tun be tilera kalan kɛ ani ka miiri a kan. O delinanko tun b’a to Bibulu ka miiriya dɔ be to n’ hakili la. O tun be n’ dɛmɛ loon o loon ka miiri koo kɔrɔtaninw na sanni ka sinsin n’ yɛrɛ ani n’ ka gwɛlɛyaw kan.”—Zab. 61:3.

BALIMA MINNU BƐ JƐKULU KƆNƆ

11. K’a dɔn ko an tɛ an kelen na tɔɔrɔ waati la, mun na o bɛ dusu don an kɔnɔ?

¹¹ Jehova ye balimaw di an ma minw b’an dɛmɛ ka muɲuli kɛ. K’a lɔn ko an ka “tɔɔrɔ . . . ɲɔgɔn [b’an] baden tɔw kan,” o b’an jija yɛrɛ le! (1 Piyɛri 5:9). Gwɛlɛya o gwɛlɛya b’an kan, an be se ka la a la k’o ɲɔgɔn y’an balima dɔw sɔrɔ ani u sera ka muɲuli kɛ. O b’a yira ko an fana bena se k’an ka gwɛlɛyaw muɲu!—Kɛw. 14:22.

12. Balima minnu bɛ jɛkulu kɔnɔ, olu bɛ se k’an dɛmɛ cogo di, wa an fana bɛ se ka u dɛmɛ cogo di? (2 Kɔrɛntekaw 1:3, 4)

¹² Gwɛlɛyaw tuma na, an balimaw be se k’an jija ka muɲuli kɛ. Ciden Pol y’o lo kɔrɔsi. Tuma caaman na, Pol y’a ka waleɲumanlɔn yira balimaw na minw ye dɛmɛ lase a ma tuma min na a tun be kaso la. A yɛrɛ y’u tɔgɔw fɔ a ka batakiw kɔnɔ. U ye Pol dusu saalo, k’a jija, ani k’a dɛmɛ cogo tigitigi dɔw la (Filip. 2:25, 29, 30; Kɔlɔs. 4:10, 11). Balimaw b’o ɲɔgɔn lo kɛ bi bi nin na. N’an mako be dɛmɛ na walisa ka muɲuli kɛ, an balimaw b’an dɛmɛ. O cogo kelen na, ni gwɛlɛya b’u kan an fana b’u dɛmɛ.—2 Korɛntikaw 1:3, 4 kalan.

13. Mun de ye an balimamuso Maya dɛmɛ ka muɲuli kɛ?

¹³ Balimamuso dɔ tɔgɔ ko Maya ani a be Irisi jamana na. Balimaw y’a jija kosɔbɛ gwɛlɛyaw tuma na. Saan 2020, polisiw y’a ka boon fuye ani kɔfɛ, u tagara n’a ye kititigɛso la sabu a y’a ka lannakow fɔ tɔɔw ye. A ko: “Tuma min na n’ hakili tun ɲagaminin lo pewu, balimaw ye n’ weele telefɔni na ani ka lɛtɛrɛw ci n’ ma walisa ka n’ hakili sigi ko u be n’ kanu. Tiɲɛn lo ko n’ tun b’a lɔn ko n’ be denbayaba dɔ kɔnɔ o min mɔgɔw be ɲɔgɔn kanu. Nga saan 2020 na le n’ y’o faamu bɛrɛbɛrɛ.”

14. An bɛ se ka mun de kɛ walisa an balima minnu bɛ jɛkulu kɔnɔ, olu ka se k’an dɛmɛ tɔɔrɔ waati la? (Ja fana lajɛ.)

¹⁴ I be se ka min kɛ. Gwɛlɛyaw tuma na, i magwɛrɛnin to balimaw na. Kana sigasiga ka dɛmɛ ɲini diinan mɔgɔkɔrɔw fɛ. U be se ka kɛ “i ko dogoyɔrɔ, min be mɔgɔ tanga fɔɲɔ ma” ani “i ko boon, sanji natuma na.” (Ezayi 32:2). Ani a to i hakili ko gwɛlɛyaw be balimaw kan fana. Mɔgɔ min mako be dɛmɛ na, n’i be koo ɲuman kɛ a ye, o bena a to i be ninsɔndiya ani k’i dɛmɛ k’i ka gwɛlɛyaw muɲu.—Kɛw. 20:35.

AN KA JIGIYA

15. Jigiya ye Yesu dɛmɛ cogo di, ale min tun ye Ala batobaa kantigi dɔ ye? (Heburuw 12:2)

¹⁵ Jehova ye jigiya barikaman di an ma walisa k’an dɛmɛ ka muɲuli kɛ (Ɔrɔm. 15:13). A to i hakili la ko ka Yezu to dugukolo kan, loon min gwɛlɛyara a ma kosɔbɛ, a sera ka muɲuli kɛ o loon na sabu a tun be ni jigiya ye (Eburuw 12:2 kalan). Yezu tun b’a lɔn ko n’a tora kantigiya la, o bena a to Jehova tɔgɔ be lafasa. Yezu tun kɔrɔtɔnin lo fana ka kɔsegi sankolo la a Faa fɛ ani kɔfɛ ka kuntigiya kɛ n’a balimaw ye Ala ka Masaya kɔnɔ. O cogo kelen na, an be ni jigiya min ye ka ɲɛnamaya kɛ fɔɔ abada Ala ka duniɲa kura kɔnɔ, o b’an dɛmɛ ka gwɛlɛya sifaw bɛɛ muɲu Sutana ka duniɲa nin na.

16. Jigiya ye an balimamuso dɔ dɛmɛ ka muɲuli kɛ cogo di, wa an bɛ kalan jumɛn de sɔrɔ ka bɔ a ka ɲɛfɔli la?

¹⁶ Balimamuso dɔ tɔgɔ ko Anna ani a be Irisi jamana na. U tun y’a cɛɛ minɛ k’a don kaso la ka kɔn a ka kitilon ɲɛ. An be ni jigiya min ye duniɲa kura koo la, an k’a filɛ o y’a dɛmɛ cogo min na. Anna y’a fɔ ko: “An be ni jigiya min ye siniɲasigi koo la, n’ kɛtɔ ka delili kɛ o koo la ani ka miiri o kan, o y’a to n’ fari ma faga kojugu. N’ y’a faamu ko n’ ka tɔɔrɔw bena ban loon dɔ. Jehova bena see sɔrɔ ani an fana bena see sɔrɔ.”

17. Jigiya min bɛ an bolo, an bɛ se k’an ka waleɲumandɔn jira ka ɲɛsin o ma cogo di? (Ja fana lajɛ.)

¹⁷ I be se ka min kɛ. Jehova ye siniɲasigi ɲuman min labɛn an ye, wagati ta ka miiri o koo la. Miiri k’a filɛ ko i be Ala ka duniɲa kura kɔnɔ ani Jehova ko a bena fɛɛn ɲuman minw di an ma, i b’u diyabɔra. Gwɛlɛya minw bɛɛ b’an kan bi, n’an y’u suma n’an ka duga nataw ye, u “te foyi ye” ani u ye “waati dɔɔni” koo lo ye (2 Kor. 4:17). Ka fara o kan, i seko kɛ k’i ka lanaya kofɔ mɔgɔw ye. O mɔgɔw yɛrɛ t’a lɔn Ala sagonata ye min ye siniɲasigi koo la. O la, miiri k’a filɛ a ka gwɛlɛ u ma cogo min na ka gwɛlɛyaw muɲu Sutana ka duniɲa nin kɔnɔ. Hali n’an ye baro dennin dɔ lo kɛ n’u ye, o be se k’a to u b’a ɲini ka dɔ lɔn tugun Jehova ka Masaya n’a ka layiduw koo la.

18. Mun na an bɛ se ka da a la ko Jehova bɛna a ka layiduw dafa?

¹⁸ Zɔbu ye gwɛlɛya caaman muɲu ani a tora kantigiya la. O kɔ, a y’a fɔ Jehova ye ko: “Ne y’a lɔn ko i be se koo bɛɛ la, i te dɛsɛ i ka kolatigɛnin si la.” (Zɔbu 42:2). Zɔbu y’a faamu ko foyi tɛ se ka Jehova bali k’a sagonata dafa. N’an y’o to an hakili la, o be se k’an dɛmɛ k’an ka gwɛlɛyaw muɲu. Misali la, miiri k’a filɛ ko muso dɔ man kɛnɛ ani a fari fagara sabu a tagara dɔgɔtɔrɔ caaman fɛ nga u ma se k’a kɛnɛya. Loon dɔ, a tagara dɔgɔtɔrɔ ŋana dɔ fɛ min ye lannamɔgɔ ye. Ale y’a lɔn bana min b’a la ani a y’a ɲɛfɔ a ye a bena a furakɛ cogo min na. O muso dusu lafiyara kosɔbɛ hali k’a sɔrɔ a b’a lɔn ko a bena wagati ta ka sɔrɔ ka kɛnɛya. Sisan, a ka nɔgɔ a ma k’a ka bana muɲu sabu a jigi b’a la ko a bena kɛnɛya. O cogo kelen na, an be se ka to ka muɲuli kɛ sabu an lanin b’a la ko Ala ye layidu min ta alijɛnɛ nata koo la, o bena dafa.

19. An mago bɛ mun de la walisa ka muɲuli kɛ?

¹⁹ I ko an y’a ye cogo min na, Jehova b’an dɛmɛ k’an ka gwɛlɛyaw muɲu delili, a ka Kuma, an balimaw, ani an ka jigiya sababu la. N’an b’a ɲini ka nafa sɔrɔ bɛrɛbɛrɛ o labɛnw na, Jehova bena to k’an dɛmɛ an ka se k’an gwɛlɛyaw bɛɛ muɲu fɔɔ tuma min na a bena daan sigi Sutana ka duniɲa n’a ka gwɛlɛyaw bɛɛ la.—Filip. 4:13.