Waajuli tɛ taa muɲu kɔ
1 San 30 ni kɔ kɔnɔ, ciden Paul ye nisɔndiya sɔrɔ bawo a ye waajuli kɛ a ka baara fɔlɔ ye. I ko a bɛ ten cogo min na baara nafama bɛɛ la, waajuli baara tɛ taa gɛlɛya dɔw kɔ. (2 Kɔr. 11:23-29) O bɛɛ n’a ta, Paul ma a ka waajuli baara jɔ. (2 Kɔr. 4:1) Paul ye fanga min sɔrɔ ka muɲu a ka cidenyabaara kɔnɔna na, a y’a faamu ko o tun bɛ bɔ Jehowa de yɔrɔ. (Fil. 4:13) Ka muɲu k’a da kantigiya kan, a ye o misali ɲuman jira an na. O kosɔn, a tun bɛ se k’a fɔ ko: ‘Aw ka kɛ ne ladegebagaw ye, i ko ne fana ye Krisita ladegebaga ye cogo min na.’—1 Kɔr. 11:1.
2 Ka kɔrɔbɔliw muɲu bi: Don o don, an balima caman somɔgɔw, u baarakɛɲɔgɔnw walima u lakɔlidenɲɔgɔnw bɛ yɛlɛ u ma, k’u kɛlɛ, walima u b’a jira u la k’u ka sira tɛ u fɛ. (Mat. 10:35; Yuh. 15:20) I b’a sɔrɔ o ko ɲɔgɔnw de bɛ e fana da la. A bɛ se ka kɛ fana ko i ni bana dɔ bɛ ɲɔgɔn na tuma bɛɛ walima ko i bɛ ka i yɛrɛ kɛlɛ don o don walisa ka ɲɛnajɛw ni kɔrɔbɔlikow dabila minnu bɛ i ka limaniya n’i ka muɲu kɔrɔbɔ. Fɔlɔmɔgɔ minnu tun ye Ala ka baarakɛla kantigiw ye ani an ka waati la fana, an kretienɲɔgɔn minnu ye gɛlɛya sɔrɔ, nka u sera ka olu kunnasagon, n’an bɛ olu ka maanaw kalan, an bɛ se ka fanga sɔrɔ.—1 Pi. 5:9.
3 An bɛ se ka fanga sɔrɔ ka to kologɛlɛya la an ka cidenyabaara la, n’an b’a sɛgɛsɛgɛ ko an ye ‘Ala ka kɛlɛkɛ minɛnw bɛɛ don an na.’ (Efɛ. 6:10-13, 15) Ka delili kɛ walisa ka se ka muɲu, o fana nafa ka bon kosɛbɛ. Ala b’a ka hakili senu di an ma walisa an ka se ka kɔrɔbɔliw muɲu. (2 Kɔr. 6:4-7) Walisa an ka se sɔrɔ an ka kɛlɛ la Sitanɛ fɛ alako ta fan fɛ, fo an k’an tulomajɔ Ala ka hakilijigin kumaw na walisa k’an hakili kuraya. (Zab. 119:24, 85-88) I ko den bɛ se ka a fa kanubaganci ka lɛtɛrɛ cilen kalan siɲɛ caman-caman cogo min na, n’an bɛ Bibulu kalan don o don, o bɛ an ni Jehowa cɛsira kologɛlɛya fana. N’an bɛ an yɛrɛ kalan tuma bɛɛ, an bɛ hakili sɔrɔ walisa an jɔlen ka to kɔrɔbɔliw la. O cogo la, an b’a to Ala ka miiriw k’an ɲɛminɛ an ka ko latigɛtaw la, k’an ka kantigiya sinsin fana.—Nta. 2:10, 11.
4 Muɲu bɛ na ni koduman caman ye: I ko a kɛra cogo min na Paul ka ko la, n’an bɛ muɲu k’a da an ka kantigiya kan an ka cidenyabaara kɔnɔna na, o bɛ Jehowa dusukun nisɔndiya, wa, o bɛ na ni koduman caman ye an yɛrɛ ani mɔgɔ wɛrɛw fana ma. (Nta. 27:11) An jɔlen ka to a kan ka cidenyabaara kɛ ka taa a fɛ. O cogo la, an b’a jira ko an ka dannaya sinsinnen don ani ko o “ka fisa ni sanu ye kosɛbɛ,” o min ye “fɛn banta ye” nka n’o bɛ “kɔrɔbɔ tasuma fɛ.”—1 Pi. 1:6, 7.