An ka waajuli kɛ k’a sɔrɔ an ma o dabila
1 Tuma dɔw la an bɛ se ka miiri ko an bɛ waajuli kɛ yɔrɔ min na, o baarala siɲɛ caman ka dafa, nka mɔgɔ bɛrɛ ma sɔn Masaya cikan ma. O n’a ta o ta, kun ɲɛnamaw de b’an bolo minnu b’an bila ka waajuli kɛ ka taa a fɛ.—Mat. 28:19, 20.
2 Seereya kosɔn: Ko minnu tun bɛna kɛ “diɲɛ laban” taamasiyɛn ye, Yesu y’o fɔ. A y’a jira ko Masaya waajuli tun bɛna kɛ o ko nafama dɔ ye, ani ko o tun bɛna kɛ “siyaw bɛɛ seere ye.” (Mat. 24:3, 14) Ni mɔgɔw ɲɛ b’an na Masaya kibaru duman waajuli la, o bɛ kɛ seereyaba de ye u bolo. An bɔlen kɔfɛ u ka yɔrɔ la, mɔgɔ dɔw bɛ se ka kuma lɛrɛ caman kɔnɔ walima tile caman kɔnɔ an nali ko la, hali ni u tun ma sɔn ka kibaru duman lamɛn. An bɛ cidenyabaara kɛ kun minnu na, n’an bɛ o kunw dɔn, o bɛna an dɛmɛ an k’an timinandiya ka waajuli kɛ. N’an b’an niyɔrɔ kɛ Bibulu kirayakuma tiimɛni na, n’o ye ka seereya kɛ ani ka mɔgɔw lasɔmi, an ko bɛna diya Jehowa ye.—2 Tes. 1:6-9.
3 An mago bɛ timinandiya la: Fɛn caman de bɛ yen minnu bɛ mɔgɔw ka waati ta. O kosɔn, n’an b’a ɲinina ka mɔgɔ dɔ dɛmɛ walisa kibaru duman ka diya a ye ka taa a fɛ, fo an k’an timinandiya. Jehowa Seerew ye san kelen de kɛ u bɛ taa bɔ muso dɔ ye dɔgɔkun o dɔgɔkun, sani muso ka sɔn ka seerew ladon a ka so kɔnɔ u ka baro kɛ Bibulu kan. A ye min mɛn, o diyara a ye kosɛbɛ fo a sɔnna Bibulukalan ma. A y’a daminɛ ka taa lajɛ la, wa, a ma mɛn a y’a jira ko a b’a fɛ ka batise.
4 Diɲɛ kow bɛ ka yɛlɛma teliya la, wa, mɔgɔw fana ka kow bɛ ka yɛlɛma o cogo kelen de la. Mɔgɔ dɔw tɛ sɔn an ka taa bɔ u ye. Nka, olu la, caman bɛ sɔn sisan ka an ka kuma lamɛn, an bɛ kuma min fɔ, n’o bɛ jigiya di mɔgɔ ma, ka dusu don mɔgɔ kɔnɔ. An ka timinandiya bɛ kun bɔ, hali ni mɔgɔ kelenpe dɔrɔn de sɔnna Masaya cikan ma.
5 Diɲɛ yɔrɔ bɛɛ la, mɔgɔ minnu bɛ ka ‘ŋunan, ka kasi ko haramulen kɛlenw bɛɛ kosɔn,’ olu bɛ ka caya ka taa a fɛ. (Eze. 9:4) Ko minnu bɛ bɔ an ka waajuli baara la, o b’a jira ko mɔgɔ minnu dusukun ka ɲi, olu bɛ ka sɔn Masaya Kibaru duman ma. (Esa. 2:2, 3) O la sa, an ka waajuli kɛ ka taa a fɛ k’a sɔrɔ an ma o dabila. An ka o kɛ ni timinandiya ani ni kanuya ye ‘fɛn ɲuman kibaru duman fɔli’ la.—Esa. 52:7; Kɛw. 5:42.