Yala i bɛ ka i ka denbaya labɛn kisili kama wa?

¹ Bibulu kirayakuma tiimɛni bɛ dalilu jɔnjɔn di an ma ko an bɛ diɲɛ juguman min kɔnɔ nin ye, o laban bɛ ka surunya teliya la. An bɛ waati gɛlɛn de la minnu bɛ i ko Nuhun ka waati sani sanjiba tun ka na. (Mat. 24:37-39) O diɲɛ kɔrɔ halakila tuma min na, Nuhun kisira bawo a “taamana Ala fɛ.” (Jen. 6:9) A jɛlen don ko Nuhun tun y’a ka denbaya kalan Jehowa ka ko wajibiyalenw na, bawo tuma min na sanjiba nana, olu fana kisira. An bɛ se ka Nuhun ladege cogo jumɛn na walisa ka anw ni an ka denbaya labɛn ka se ka kisi an ka diɲɛ juguman in laban na?

² Ka tilennenyako waajuli kɛ: Nuhun tora ka ‘tilennenyako waajuli kɛ’ waati kɔnɔ min bɛ taa san binaani fo san biduuru ɲɔgɔnna na. (2 Pi. 2:5) Mɛlɛkɛ murutilen minnu ye hadamaden fari ta, a kɛra olu sababu ye wo, walima a ma kɛ olu sababu ye wo, siga t’a la ko Nuhun tilelamɔgɔw yɛlɛla a ka waajuli kumaw ma. Tuma caman na fana n’an bɛ ka waajuli kɛ, an bɛ mɔgɔw sɔrɔ kibaru duman man di minnu ye ani minnu bɛ yɛlɛ an ma. O ko b’a jira ko an ka diɲɛ juguman in laban surunyara. (2 Pi. 3:3, 4) Nka, bimɔgɔw tɛ i n’a fɔ Nuhun ka waati mɔgɔw. U caman bɛ sɔn k’an lamɛn, ka u ‘kunda’ Jehowa ka bato kan. (Esa. 2:2) An bɛna an yɛrɛ kisi ani ka an lamɛnbagaw kisi, n’a y’a sɔrɔ dɔrɔn an bɛ waajuli kɛ ka taa a fɛ. (1 Tim. 4:16) A nafa ka bon kosɛbɛ bangebagaw ka u denw kalan ko waajulibaara ye kɔrɔtɔko ye, u ka kuma ni u ka misali ɲuman fɛ u bɛ min jira u denw na.-2 Tim. 4:2.

³ Nuhun “y’a kɛ ten”: Nuhun ni a ka denbaya ka kisili tun bɛ bɔ Jehowa ka ci fɔlen sirataamani na. (Jen. 6:22) Bibulu ni jɔnkɛ dannamɔgɔ b’an ɲɛminɛ cogo min na bi, n’an bɛ ‘sɔn’ ka tugu o la, o nafa ka bon an fana bolo. (Yak. 3:17, NW) Jehowa ka jɛkuluba bɛ hakilila minnu di, bangebaga dɔ tugura olu kɔ. A tun bɛ a ka denbaya ka kalan kɛ dɔgɔkun o dɔgɔkun. A n’a ka denbaya fana tun bɛ cidenyabaara kɛ ɲɔgɔn fɛ sibiri o sibiri ani kari o kari i n’a fɔ jɛkuluba y’a fɔ ka gɛlɛya cogo min na. O senfɛ, a tun b’a jija a n’a den dɔ la kelen ka waajuli kɛ ɲɔgɔn fɛ dɔgɔkun o dɔgɔkun. Fa y’a timinandiya o cogo la “ten” minkɛ, o kɛra fɛn ɲuman ye a ka denmisɛnw ma, wa, u wɔɔrɔ bɛɛ kɔrɔbayara ka kɛ Jehowa ka baarakɛla kantigiw ye.

⁴ An ka diɲɛ juguman in laban bɛna cun an kan. (Luka 12:40) N’an bɛ Nuhun ladege, ka dannaya kɛ kisili kama, siga t’a la ko anw ni an ka denbaya labɛnnen bɛna sɔrɔ.-Heb. 11:7.