An k’a ɲini ka dɔ fara an ka cidenyabaara kan
1 Ciden Paul y’a fɔ k’a gɛlɛya Kretiɛnw ma ko u ka taama Ala ka sira kan, “ka jiidi o la ka taa ɲɛ” n’o ye ka taama Ala ka sira kan ka taa a fɛ cogo dafalen na kosɛbɛ. (1 Tes. 4:1) O kɔrɔ ye mun ye an bolo? A kɔrɔ dɔ ye ko an ka kan ka siraw ɲini tuma bɛɛ walisa ka dɔ fara an ka baaraw kan alako ta fan fɛ, ani k’an cɛsiri tuma bɛɛ ‘k’an ka baara bɛɛ kɛ ka dafa.’—2 Tim. 4:5.
2 An ŋaniya: K’a ɲini ka dɔ fara an ka cidenyabaara kan, o bɛ bɔ an ŋaniya de la ka baara kɛ an Dabaga ye cogo dafalen na kosɛbɛ. An b’a fɛ ka taa ɲɛ alako ta fan fɛ ani ka siraw ɲini walisa k’an ka cidenyabaara kɛcogo ɲɛ kosɛbɛ. Delinako ɲuman ani ŋaniya ɲuman bɛna an dɛmɛ k’an kuntilennaw sɔrɔ Ala ka baara la.—Zab. 1:1, 2; Fil. 4:6; Heb. 10:24, 25.
3 N’an b’a fɛ ka baara kɛ walisa ka dɔ fara an ka cidenyabaara kan, fo an k’a ɲini ka nin jogoɲumanw bonya an dusukun na: ka nili kɛ ani ka kaariya. An bɛ se k’o jogoɲumanw bonya an dusukun na, ni an bɛ miiri kosɛbɛ Yesu ka misali la delili kɔnɔ. (Mat. 20:28) Yesu ye nisɔndiyaba sɔrɔ a ka cidenyabaara kɔnɔ bawo a tun bɛ mɔgɔ wɛrɛw mago ɲɛ. (Kɛw. 20:35) An bɛ se ka Yesu ladege n’an b’a jira k’an bɛ mɔgɔw fɛ ani n’an bɛ tɛmɛ siraw fɛ minnu bɛ dayɛlɛ an ye walisa ka dɔ fara an ka cidenyabaara kan.—Esa. 6:8.
4 Bangebagaw jɔyɔrɔ: Kabini denw fitinin, bangebagaw bɛ se k’u dege dɔɔnin-dɔɔnin walisa a ka kɛ denw ŋaniya ye ka mɔgɔ wɛrɛw mago ɲɛ ani ka dɔ fara an ka cidenyabaara kan. Denbaya kɔnɔmɔgɔw bɛ u timinandiya cogo min na, ani u b’u sen don kosɛbɛ cidenyabaara la cogo min na walisa ka dɔ fara o kan, denmisɛnw bɛna o kɔlɔsi. A nege donna an balimakɛ dɔ denmisɛnma na ka dɔ fara a ka cidenyabaara kan, a kɛlen ka baara kɛ n’a mɔkɛ ye jɛkulu ka baaraw la. A y’a mɔkɛ ka cɛsiri n’a ka nisɔndiya ye minkɛ, o y’a bila ale yɛrɛ ka cogow ɲini k’a balimakɛw mago ɲɛ. Sisan, an balimakɛ ye cidenyabaara maganna ye.
5 An mago bɛ balimakɛw la: “Ni mɔgɔ dɔ bɛ . . . ɲini, o tigi bɛ baara ɲuman fɛ.” (1 Tim. 3:1) O kumaw bɛ dusu don balimakɛw kɔnɔ u k’a ɲini ka cogo wajibiyalenw dafa walisa ka baara wɛrɛw kɛ Jehowa ka jɛkuluba kɔnɔ. O kɛli t’a wajibiya seko kɛrɛnkɛrɛnnenw walima dakabana sekow ka kɛ an na an ni minnu wolola. Balimakɛ min b’a ɲini ka dɔ fara a ka cidenyabaara kan, o bɛna fɔlɔ ka Masaya ɲini, wa, a bɛna a sen don cidenyabaara la ni cɛsiri ye. (Mat. 6:33; 2 Tim. 4:5) A bɛna a jija ka kɛ misali ɲuman ye tɔw bolo.
6 Diɲɛ bɛɛ kɔnɔ: Jehowa bɛ ka mɔgɔw dalajɛli baara teliya. (Esa. 60:22) Kɔrɔtɔko don bi, ko mɔgɔ o mɔgɔ bɛ Yesu ka misali ladege, olu ka baara kɛ cogo dafalen na kosɛbɛ u ka cidenyabaara la. Waajuli baara min kɛra diɲɛ bɛɛ kɔnɔ k’a ta Sɛtanburukalo san 2005 la ka n’a bila Utikalo san 2006 la, o dantigɛli sɛbɛn y’a jira ko o waati kɔnɔ mɔgɔ 248.327 de batisera. A bɛ i ko ni mɔgɔ kura 680 ni kɔ de batisera don o don! An bɛɛ ka siraw ɲini ka taa a fɛ walisa ka baara kɛ an ka cidenyabaara la cogo dafalen na kosɛbɛ.