I denw kalan u ka Jehowa tanu

1. Denmisɛnninw bɛ se ka Jehowa tanu wa?

¹ Zaburu 148:12, 13 bɛ dusu don kamalenninw ni npotigininw kɔnɔ u ka Jehowa tɔgɔ tanu. Denmisɛnnin minnu ye Jehowa tɔgɔ tanu, olu caman ka kuma fɔlen bɛ Sɛbɛnniw kɔnɔ. Misali la, Samuɛl tun bɛ a ka baara kɛ Jehowa ɲɛkɔrɔ k’a sɔrɔ “denmisɛn tun don.” (1 Sam. 2:18) “Dennin” dɔ de y’a fɔ Naaman muso ye ko Jehowa ka kira min bɛ Israɛl, o bɛ se ka Naaman ka kunan kɛnɛya. (2 Mas. 5:1-3) Yesu donna Alabatoso kɔnɔ tuma min na ka kabakow kɛ, denmisɛnw de pɛrɛnna k’a fɔ ko: An b’i deli, an kisi “Dawuda Denkɛ.” (Mat. 21:15 Cogo jumɛn de la bangebagaw bɛ se k’u denw kalan u ka Jehowa tanu?

2. Mun na a nafa ka bon bangebagaw ka misali ɲuman jira u denw na?

² Bangebagaw ka misali: A ɲininen bɛ Israɛldenw fɛ minnu ye denfaw ye u ka Jehowa kanu fɔlɔ, ka a ka ci fɔlenw mara u yɛrɛw dusukunw na, sani u ka u denw kalan tiɲɛ la fo o ka se u dusukun na, walisa a ka to yen. (Dut. 6:5-9) Ni aw ye kuma ɲuman fɔ waajuli baara kan, ni aw bɛ waajuli baara sen don aw ka dɔgɔkun o dɔgɔkun ko bolodalen na, o bɛna a to waajuli bɛ kɛ aw ka denmisɛnninw bolo baara ye min nafa ka bon, min bɛ nisɔndiya lase mɔgɔ ma.

3. Cogo di an balimamuso dɔ ye nafa bɔ a bangebagaw ka misali la?

³ An balimamuso dɔ hakili bɛ nin ko la: “Ne ka denmisɛnninya kɔnɔna na, ne bangebagaw delinako tun ye ka taa foro cidenyabaara la dɔgɔkun laban o dɔgɔkun laban. Ne sera k’a ye ko tiɲɛ na ne bangebagaw tun bɛ nisɔndiya sɔrɔ waajuli la. Kabini an fitinin fo ka an kɔrɔbaya, an y’a ye tuma bɛɛ ko waajuli ka di.” An balimamuso kɛra weleweledala ye min ma batise tuma min na a ye san wolonwula sɔrɔ. Nin ye a ka san 33nan ye ko a b’a ka waati bɛɛ bila Jehowa ka baara kama.

4. Ka denw kalan dɔɔnin-dɔɔnin, o kɔrɔ ye mun ye?

⁴ An ka an denw kalan dɔɔnin-dɔɔnin u ka Jehowa tanu: N’aw bɛ ka waajuli kɛ ni aw denw ye, aw ka to aw denw ka fɛn dɔ kɛ waajuli la. U bɛ se ka soneri digi donda dɔ la walima ka da kɔnkɔn, ka sɛbɛndennin di mɔgɔ dɔ ma, walima ka Bibulu tɛmɛsira dɔ kalan. O bɛna dɔ fara u ka nisɔndiya kan, ani k’u dɛmɛ u ka da a la k’u bɛ se ka Masaya cikan ɲɛfɔ. Ni u bɛ ka kɔrɔbayara ka taa a fɛ tuma min na, u bɛ baara min kɛ waajuli la, o ka kan ka bonya ka taa a fɛ fana. O la sa, aw ka aw denw dɛmɛ u ka taa ɲɛ, ani ka kuntilennaw da alako ta fan fɛ.

5. Sani den ka se ka kɛ weleweledala ye min ma batise, a ka kan ka cogow dafa. O cogo ye jumɛnw ye?

⁵ N’aw y’a ye dɔrɔn ko a ka denmisɛnninw bɛ cogow dafa walisa ka kɛ weleweledalaw ye minnu ma batise, ani ni u y’a fɔ aw ye ko u b’a fɛ ka kɛ o ye, aw k’o fɔ maakɔrɔw ye. Ni u kɛra weleweledalaw ye, o bɛna u bila ka miiri ko a bɛ u kelen-kelen bɛɛ de bolo ka Jehowa tanu. Aw ka to aw hakili la ko mɔgɔkɔrɔbaw bɛ fɛn minnu bɛɛ dɔn aw denw mago t’a la ka o fɛnw bɛɛ dɔn, sani u ka se ka kɛ weleweledalaw ye minnu ma batise. Bibulu kalansira minnu nafa ka bon kosɛbɛ, yala aw denw ye olu faamu wa? Yala u bɛ Bibulu sariyakolow sirataama jogoɲumanya ta fan fɛ wa? Yala u b’a fɛ ka waajuli kɛ wa? Yala u b’a fɛ mɔgɔw ka fɔ u ko la ko u ye Jehowa Seerew ye wa? Ni a bɛ ten tigitigi, o tuma na, maakɔrɔw bɛ se k’a sɛgɛsɛgɛ ni u bɛ cogow dafa ka kɛ weleweledalaw ye minnu ma batise.—Organisés pour faire la volonté de Jéhovah gafe ɲɛw 79-82 lajɛ.

6. Ni bangebagaw bɛ u denw kalan, mun na o bɛ sɛgɛn kun bɔ?

⁶ Ka denmisɛnw kalan u ka Jehowa tanu, tanuli cogo la min bɛ bɔ u dusukun na, o tɛ taa baara kɔ. Ni bangebagaw ɲɛ b’a la k’u denw bɛ ka taa ɲɛ alako ta fan fɛ, u bɛ nisɔndiyaba sɔrɔ. Fɛn minnu bɛ se ka nisɔndiya lase u ma min ka bon ni o ye, olu man ca. Wa, min nafa ka bon kosɛbɛ, o ye ko a ka di Jehowa ye ni denmisɛnw bɛ kuma a ka dakabanakow kan.