Denbaya ka ko bolodalen​—Denbaya ka foro baara

¹ Ni Jehowa ɲɛ bɛ denmisɛnw na ka a tɔgɔ tanu, o bɛ a nisɔndiya kosɛbɛ. (Zab. 148:12, 13) Yesu ka donw na, ‘tanuli bɔra hali denmisɛnw ni sinmindenw da la’ ka taa Ala ma. (Mat. 21:15, 16) O ko kelen de bɛ ka kɛ bi. Bangebagaw, aw bɛ se ka mun kɛ walisa ka aw denw dɛmɛ u ka kɛ Jehowa batobaga timinandiw ye Kerecɛn ka cidenyabaara la? Iko sinsin kɛra a kan cogo min na sanfɛ barokun na, jɛkulu ka lajɛw kan, aw yɛrɛ ka misali jɔyɔrɔ de ka bon kosɛbɛ nin yɔrɔ fana na. Denfa dɔ ye bangebagaw fanba dusukunnata jira, a kɛlen k’a fɔ ko: “Aw bɛ min fɔ denmisɛnw ye, u tɛ o kɛ dɛ, nka aw bɛ min kɛ, u bɛ o de kɛ.”

² An balimamuso dɔ lamɔna tiɲɛ sira kan bangebagaw fɛ minnu tun bɛ siran Ala ɲɛ. A ko: “An ma deli ka wuli ban Sibiridon sɔgɔma ka an yɛrɛ ɲininka filan-filan na ni an tun bɛna bɔ ka taa cidenyabaara la. An tun b’a dɔn ko an bɛna bɔ.” O cogo kelen na fana, ni i b’a kɛ i delinako ye e ani i ka denbaya ka jɛ ka forobaara kɛ ɲɔgɔn fɛ dɔgɔkun o dɔgɔkun, i bɛ se k’a don i denw kɔnɔ dɔɔnin-dɔɔnin, nafa min bɛ waajulibaara la. O ko tɛna a to dɔrɔn aw denw ka dege aw fɛ, u kɛtɔ ka aw kɔlɔsi, nka o bɛna a to fana aw yɛrɛ ka nin kow jateminɛ aw denw na: u miiricogo, u jogo ɲumanw ani u ka ɲɛtaaw.

³ U dege dɔɔnin-dɔɔnin: Walisa denmisɛnw ka nisɔndiya sɔrɔ cidenyabaara la, u ka kan ka labɛn ka se ka u sen don o la, cogo la min bɛ nɔ bɔ. An balimamuso min kofɔra baro daminɛ na, o ko fana: “An ma kɛ abada denw ye minnu tun bɛ tugu u bangebagaw kɔ dɔrɔn u ka baara la. An tun b’a dɔn ko an niyɔrɔ bɛ yen ka kɛ, hali ni a tun danna dɔrɔn ka soneri kɛ daw la ani ka welesɛbɛn dɔ di. Sanni dɔgɔkun laban ka se, labɛn koɲuman fɛ, an tun b’a dɔn an ka kan ka min fɔ.” Aw fana bɛ se ka aw denw dege o cogo la, ni aw bɛ miniti damadɔw ta dɔgɔkun o dɔgɔkun walisa ka u labɛn cidenyabaara kama, a kɛra denbaya ka kalan kɛtuma ye, walima a kɛra waati wɛrɛ ye.

⁴ Ni sokɔnɔmɔgɔw bɛ jɛ ka waajuli kɛ ɲɔgɔn fɛ, o b’a to aw bɛ se ka aw den kalan tiɲɛ ko la, ka segin o kan siɲɛ caman na fo o tiɲɛkumaw ka sigi ka sinsin u hakili la. Kerecɛn dɔ tun bɛ to ka a denmuso ta a fɛ ka kilomɛtɛrɛ 20 taama, taa-ka-segin na, walisa ka sɛbɛndenninw tila dugufitinin dɔw mɔgɔw ni ɲɔgɔn cɛ. Denmuso hakili bɛ o la ni nisɔndiyaba ye. A ko: “O taama ninnu de kɔnɔna na ne fa tun bɛ tiɲɛkumaw fɔ ne ye, ka olu don ne dusukun na dɔɔnin-dɔɔnin.” (Dut. 6:7) O cogo kelen na, aw fana ka kɛ mɔgɔw ye Jehowa bɛ duba minnu ye, bawo aw ye foro baara kɛ aw ka denbaya ka dɔgɔkun ko bolodalen dɔ ye.