An bɛɛ bɛ se k’an ta kɛ kalanden kuraw kɛli la

¹ Mɔgɔ kelenpe dɔrɔn ka cɛsiriw tɛ mɔgɔ dɔ kɛ kalanden kura ye. Jehowa bɛ se ka a ka “baarakɛɲɔgɔnw” bɛɛ kɛ baarakɛminɛnw ye walisa ka Bibulu kalandenw dɛmɛ ka taa ɲɛ alako ta fan fɛ. (1 Kɔr. 3:6-9) An kelen-kelen bɛɛ bɛ mɔgɔ kuraw dɛmɛ an ka kɔnɔnajɛya ɲɛfɔliw fɛ an ka Kretiɛn lajɛw la, ani an taamacogo fɛ, o min b’a jira cogo jɛlen na ko Ala ka hakili senu bɛ baara la an ka ɲɛnamaya kɛcogo la. (Yuh. 13:35; Gal. 5:22, 23; Efe. 4:22, 23) Fɛn jumɛn wɛrɛw bɛ se ka kɛ walisa ka mɔgɔ kuraw dɛmɛ?

² Jɛkulu bɛ se ka min kɛ: Mɔgɔ minnu ye lajɛw nali daminɛ, an kelen-kelen bɛ se k’a jira u la ko an bɛ u fɛ, ni an b’a bɔ an yɛrɛ la k’u fɔ ni nisɔndiya ye, ani ka baro kɛ u fɛ sani lajɛ ka daminɛ ani lajɛ bannen kɔfɛ. Cɛ dɔ kɛlen ka miiri a nako fɔlɔ la jɛkulu kɔnɔ, a ko: “Don kelenpe la, ne ye mɔgɔ minnu ye, kanuya bɛ minnu na, ni ne tun tɛ u dɔn fewu, olu tun ka ca ka tɛmɛ mɔgɔw hakɛ kan, ne ye minnu ye eglisi kɔnɔ, kabini ne fitinin. A tun jɛlen don ko ne ye tiɲɛ dɔn sisan.” Kalo wolonwula a nako fɔlɔ kɔfɛ jɛkulu la, cɛ batisera.

³ Ni Bibulu kalanden kura bɛ taara ɲɛ, aw k’a tanu ni kɔnɔnajɛya ye. Yala a bɛ ka mɔgɔw ka kɛlɛ muɲu wa? A bɛ na lajɛw la tuma bɛɛ wa? Yala a ye dusu ta ka ɲɛfɔli kɛ lajɛw la wa? Yala a tɔgɔ sɛbɛnna Ala-ka-marako cidenyabaara kalan na, walima a ye cidenyabaara daminɛ wa? A ye ɲɛtaa min kɛ, aw k’a tanu o la. O bɛna dusu don a kɔnɔ k’a timinandiya.—Nt. 25:11.

⁴ Bibulu kalan ɲɛminɛbaga bɛ se ka min kɛ: Weleweledala dɔw sera ka u ka Bibulu kalandenw dɛmɛ u ka jɛkulu kɔnɔmɔgɔw dɔn kelen-kelen, u kɛlen k’a ɲini weleweledala wɛrɛw fɛ u ka u bilasira ka taa Bibulu kalandenw ka kalan kɛ. Ni kalanden bɛ se dɔrɔn, a ɲini a fɛ a ka na jɛkulu lajɛw la. Ni a ye lajɛw nali daminɛ, a kɛ i kuntilenna ye k’a jira tɔw la. O cogo la, a bɛna jɛkulu ye i n’a fɔ a somɔgɔw alako ta fan fɛ. Yala a bɛ k’a yɛrɛ kɛlɛ walisa ka delinako jugu dɔ dabila i n’a fɔ sigarɛtimin wa? Yala a ka sokɔnɔmɔgɔ dɔ ma jɛn ni a ka Bibulu-kalan ye wa? Ni a b’o fɔ weleweledala dɔ ye min ye o gɛlɛya ɲɔgɔn sɔrɔ, nka n’a ye se sɔrɔ o kan, laala o bɛna a dɛmɛ.—1 Pi.5:9.

⁵ Mɔgɔ kuraw mago bɛ jɛkulu ka dɛmɛ na alako ta fan fɛ. An bɛɛ bɛ se k’u dɛmɛ ka taa ɲɛ, n’an b’a jira u la ni kɔnɔnajɛya ye ko an bɛ u fɛ.