“Ala ka kuma fɔ ni siran tɛ”
1 Yala tuma dɔw la i bɛ siga ka kuma kɛnɛkan i ka dannaya ko la, ni cogo dira i ma k’o kɛ lakɔli la walima baarakɛyɔrɔ la wa? Yala a ka gɛlɛn i bolo ka senfɛ seereya kɛ i somɔgɔw ni i sigiɲɔgɔnw ye, walima ni mɔgɔw ye, i tɛ minnu dɔn wa? Mun bɛna an bɛɛ dɛmɛ ka “Ala ka kuma fɔ ni siran tɛ,” ni a bɛnnen don k’o kɛ ko minnu na?”—Fil. 1:14.
2 I kana siga: Yala i bɛna siga k’i teri sɛbɛ-sɛbɛ dɔ walima k’i somɔgɔ dɔ lafasa, ni nkalon tigɛra ka da a la wa? Jehowa, an teri bɛɛ la sɛbɛ-sɛbɛ jirala cogo jugu la fo ka dama tɛmɛ, san kɛmɛ caman kɔnɔna na. Bonya b’an bolo min ɲɔgɔn tɛ, ka seereya kɛ an ka Alaba kosɔn. (Esa. 43:10-12) Ala kanuyaba min b’an dusukun na, o bɛ se k’an dɛmɛ an kana siran, walima an kana miiri kojugu an yɛrɛ la ko mɔgɔw bɛna an lajɛ. Ala kanuyaba min b’an dusukun na, o bɛ se fana k’an bila ka kuma k’a sɔrɔ an ma siga ka seereya kɛ tiɲɛ ko la ni jagɛlɛya ye.—Kɛw. 4:26, 29, 31.
3 An ka to an hakili la ko an ka cikan ye kibaru duman de ye. A lamɛnni bɛna nafa lase mɔgɔw ma, nafa minnu bɛ mɛn kosɛbɛ. N’an bɛ miiri kibaru duman de la, nka an tɛ miiri an yɛrɛw la, walima an kɛlɛbagaw la, o bɛna an dɛmɛ ka waajuli kɛ ni jagɛlɛya ye.
4 Mɔgɔ wɛrɛw ka misaliw: An bɛ se ka fanga sɔrɔ kantigi wɛrɛw kɛcogo fɛ minnu ye Ala ka kuma fɔ ni siran tɛ. Misali la, Henɔk ye Jehowa ka kiri weleweleda kojugukɛlaw kan ni jagɛlɛya ye. (Jude 14, 15) Mɔgɔ minnu tun tɛ nafa don Nuhun ka waajuli la, Nuhun ye olu waaju ni kantigiya ye. (Mat. 24:37-39) San kɛmɛ fɔlɔ Kretiɛn minnu tun ye “mɔgɔ gansan kalanbaliw” ye, olu ye waajuli kɛ ka taa a fɛ, k’a sɔrɔ mɔgɔw tun b’u kɛlɛ. (Kɛw. 4:13, 18-20) An ka bi tile la, mɔgɔ minnu ye dannaya da Jehowa kan, o y’a to u ye mɔgɔɲɛsiran kɛlɛ, ka kɛ kibaru duman fɔbaga timinandiw ye. O mɔgɔw ka maana ɲɛfɔlenw bɛ tuma caman na La Tour de Garde ni Réveillez-vous ! kɔnɔ.
5 Jehowa ka baarakɛla kantigi minnu ye gɛlɛyaw sɔrɔ fɔlɔ la, n’an b’an hakili to olu ka kɛwalew la, o bɛ se k’a to an bɛ dusu ta. (1 Mas. 19:2, 3; Mar. 14:66-71) ‘Ala ye u ja gɛlɛya,’ wa, u kumana ni siran tɛ. An k’an jija ka kuma o cogo la fana.—1 Tes. 2:2.