Aw ka Jehowa ka Ɲumanya kow fɔ

1. Mun b’an bila ka Jehowa ka ɲumanya kow fɔ?

¹ “Bonya ni barika ani saramaya ye e de ta ye, Matigi [Jehowa], katuguni sankolola fɛnw ni dugukolo kan fɛnw ye e de ta ye.” (1 Til. 29:11) Jehowa kanuya ani waleɲumandɔn min b’an na, o b’an bila ka mun kɛ? O b’an bila ka Jehowa “ka ɲumanya kow fɔ,” ale ‘Min ye an wele ka bɔ dibi la ka an don a ka kabako kɛnɛ la.’ (1 Pi. 2:9) Ka kuma mɔgɔw fɛ an ka Alaba ko la, an tɛ se k’o dabila. An bɛna cogo ɲumanw sɔrɔ ka Jehowa ka ɲumanya kow weleweleda Marisikalo, Awirilikalo ani Mɛkalo la.

2. Baara kɛrɛnkɛrɛnnen jumɛn de bolodala walisa ka mɔgɔw ladɔnniya Hakilijigin ko la, ani jɔni bɛ se k’a sen don o la?

² Baara Kɛrɛnkɛrɛnnen walisa ka mɔgɔw ladɔnniya Hakilijigin ko la: Ntɛnɛn don, Awirilikalo tile 2, an bɛna Matigi ka surɔfana hakilijigin kɛ, ka Jehowa ka ɲumanya kow da kɛnɛ kan. Mɔgɔw bɛna wele kɛrɛnkɛrɛnnenya la nin koba in na ni sɛbɛn ye min bɛna tila mɔgɔw ni ɲɔgɔn cɛ dugukolo fan bɛɛ la, k’a daminɛ Marisikalo tile 17 ka n’a bila Awirilikalo tile 2 la. An bɛ dusu don bɛɛ kɔnɔ u ka u seko damajira kɛ o baara la. O bɛna kɛ waati ɲumanba ye mɔgɔ kuraw bolo ka kibaru duman fɔli daminɛ, n’a y’a sɔrɔ ko minnu ɲinina u fɛ walisa u ka se ka kibaru duman fɔli daminɛ, u ye o kow dafa. Ni Bibulu kalandenw walima ni denw b’aw bolo minnu bɛ se k’o kow dafa, a’ y’a bɔ aw yɛrɛw la ka o fɔ maakɔrɔw ye.

3. An bɛ se ka mun fɔ, n’an bɛna mɔgɔw wele ka na Hakilijigin na?

³ Nin baara kɛrɛnkɛrɛnnen bɛna kɛ i n’a fɔ min kɛra Kafoba ka jamalajɛw la minnu tɔgɔw ye ko “Kisili ka surun.” Welesɛbɛnw hakɛ bɛna ci min bɛ bɔli kɛ, walisa weleweledala kelen-kelen bɛɛ ka se ka den 50 sɔrɔ, ani tutigɛbagaw kelen-kelen bɛɛ, den 100. N’i bɛna sɛbɛn di tuma min na, i k’i ka kuma surunya. I bɛ se k’a fɔ ko: “Nin ye i ka welesɛbɛn ye an ka san o san koba nata la. An bɛna i kunbɛn ka ɲɛ. Kunnafoni dilenw bɛ o koba kan nin welesɛbɛn kɔnɔ.” A jɛlen don ko ni ɲininkaliw b’i barokɛɲɔgɔn fɛ, i bɛna waati ta k’olu jaabi. Appendice barokun min tɔgɔ ye ko Le Repas du Seigneur (Matigi ka Surɔfana), n’o bɛ daminɛ Qu’enseigne la Bible gafe ɲɛ 206nan na, o bɛ se k’i dɛmɛ. Sibiridonw ni karidonw fɛ, an bɛna sɔn-ni-sɔn gafeninw ni mɔgɔ welesɛbɛn kɛrɛnkɛrɛnnen jira ɲɔgɔn fɛ. Mɔgɔ o mɔgɔ mana a jira ko kibaru duman ka di a ye, i ka olu bɛɛ tɔgɔw sɛbɛn, wa, i ka fɛɛrɛ tigɛ ka segin ka na bɔ u ye.

4. Hakilijigin welesɛbɛn kɛrɛnkɛrɛnnenw bɛna tila-tila cogo jumɛn na?

⁴ Ni a bɛ se ka kɛ, nin welesɛbɛn ka kan ka di denbaya kelen-kelen bɛɛ kɔnɔmɔgɔ dɔ ma bolo ni bolo. I k’a sɛgɛsɛgɛ ko i ka segin-ka-bɔnyew, i ka Bibulu kalandenw, i somɔgɔw, i sigiɲɔgɔnw ani i dɔnbaga wɛrɛw fana ye o welesɛbɛn sɔrɔ.

5. Mun na an ka kan k’a daminɛ kabini sisan k’an ka kow labɛn walisa ka kɛ tutigɛbaga farankanw ye?

⁵ Ka kɛ Tutigɛbaga farankan ye: Yala i bɛ se ka Jehowa ka ɲumanya kow fɔ kosɛbɛ, i kɛlen tutigɛbaga farankan ye, Marisikalo, Awirilikalo ani Mɛkalo la wa? A ka c’a la, o kɛli bɛna i bila ka yɛlɛma dɔw don i ka don o don waatibolodalen na. (Efe. 5:15-17) I bɛ se ka da a la, ko n’i ye i cɛsiri ka dɔ fara i ka kɛta kan Jehowa ka baara la, o bɛna nisɔndiya ni Jehowa ka dugawu lase i ma. (Nt. 10:22) Ikomi Hakilijigin waati bɛ ka surunya, i ka kan k’i ka kow labɛn kabini sisan.—Nt. 21:5.

6. An balimamuso min kɛra tutigɛbaga ye salon, k’a si to san 90 na, an bɛ kalan jumɛn bɔ o ka ko la ?

⁶ An balimamuso dɔ min si ye san 90 ye, o kɛra tutigɛbaga farankan ye salon. An balimamuso ko: “Hali ni a ka di ne ye yɛrɛ de ka baara kɛ ne ka nakɔ kɔnɔ, ka turuli daminɛ, ne y’a ye ko ne ka kan ka ne ka fɛnw bila u jɔyɔrɔ la, iko a ka kan cogo min na. Ikomi ne tun b’a fɛ ka Masaya kunkankow bila jɔyɔrɔ fɔlɔ la, ne y’a latigɛ ka kɛ tutigɛbaga farankan ye Marisikalo la.” Yala an balimamuso ye dugawu sɔrɔ a ka cɛsiriw la wa? A ko: “Ne y’a faamu kosɛbɛ ko ne ye jɛkulu kɔnɔmɔgɔ dɔ ye, wa, o ye ne gɛrɛ kosɛbɛ Jehowa la fana.” An bɛ fɛn minnu bila jɔyɔrɔ fɔlɔ la, yala an b’a fɛ ka olu sɛgɛsɛgɛ, wa, ni o yɛlɛma suguw kan ka, k’olu kɛ wa?

7. Yala a ka gɛlɛn ka kɛ tutigɛbaga farankan ye wa?

⁷ Ka tutigɛbaga farankan ka lɛrɛ 50 wajibiyalen sɔrɔ, o man gɛlɛn i n’a fɔ i bɛ se k’a miiri cogo min na. I bɛ fɛn minnu kɛ don o don, i ka olu lajɛ delili kɔnɔ, k’i ka waati boloda, i ka tila k’o sɛbɛn ka fara i ka alako bolodalenw kan. E de bɛ i yɛrɛ ka kow kalama ka tɛmɛ bɛɛ kan. N’i tɛ kɛnɛbagatɔ ye, ani ni barika ɲɛnama t’i la, i bɛ se ka lɛrɛ fila kɛ cidenyabaara la don o don. N’i bɛ baara kɛ baarakɛwaati dafalen na, walima n’i bɛ taa lakɔli la, i bɛ se ka kɛ tutigɛbaga farankan ye, n’i b’i sen don cidenyabaara la wuladaninw fɛ ani dɔgɔkun don labanw na.

8. Mun y’a to cɛ dɔ n’a muso sera ka kɛ tutigɛbaga farankanw ye?

⁸ Mɔgɔ caman ni u ka denbaya sera ka kɛ tutigɛbaga farankanw ye ɲɔgɔn fɛ. Salon, cɛ dɔ n’a muso siga-sigara ka don tutigɛbagaya baara la, bawo olu bolo, u ka kow tun t’a to u ka se ka tutigɛbagaya baara kɛ. U ye mun kɛ? “An ye Jehowa deli a k’an dɛmɛ, walisa an tun b’a fɛ ka min kɛ ɲɔgɔn fɛ kabini tuma jan, an ka se k’o kɛ.” U y’u ka kow labɛn cogo bɛnnen na, wa, u sera ka kɛ tutigɛbaga farankan ye. U ye nin fɔ ka fara a kan ko: “A diyara kosɛbɛ. An bɛɛ lajɛlen ye dugawu caman sɔrɔ. An bɛ min fɔ dɔrɔn, o ye ko aw yɛrɛ k’a kɛ k’a lajɛ. Ni an sera k’a kɛ, aw fana bɛ se k’a kɛ.”

9. I bɛ se ka mun kɛ i ka denbaya ka kalan nata kɔnɔna na, baara kɛrɛnkɛrɛnnen kalo nataw ko la?

⁹ Mun na i tɛna waati dɔ ta i ka denbaya ka kalan nata kɔnɔna na, walisa k’a lajɛ aw bɛɛ lajɛlen bɛ se ka dɔ fara aw ka kɛta kan cogo min na, kalo nataw kɔnɔna na? Hali n’i ka denbaya kuuru bɛɛ tɛ se ka kɛ tutigɛbaga farankan ye, laala mɔgɔ kelen na se ka kɛ a ye, ni denbaya kɔnɔmɔgɔ tɔw bɛɛ bɛ u bolo di ɲɔgɔn ma, ka dɛmɛ don. N’o tɛ se ka kɛ, i ka denbaya bɛ se k’a kɛ a kuntilenna ye, ka dɔ fara a ka waati kɛta kan cidenyabaara la, o baara kɛrɛnkɛrɛnnen kalow la.

10. Mun na an ka kan k’a fɔ tɔw ye, ko an b’a fɛ ka kɛ tutigɛbaga farankan ye Hakilijigin waati la?

¹⁰ An ka Ɲɔgɔn dɛmɛ: Nisɔndiya ye fɛn ye mɔgɔw bɛ min lase ɲɔgɔn ma. Kuma i ŋaniya kan ka kɛ tutigɛbaga farankan ye. O bɛ se ka dusu don mɔgɔ wɛrɛw fana kɔnɔ u k’o kɛ. Ka fara o kan, mɔgɔ minnu kɛra tutigɛbaga farankanw ye salon, olu bɛ se ka hakililaw di minnu bɛna i dɛmɛ k’i ka kow ɲɛnabɔ ani k’i ka waati boloda, walisa i ka kɛ tutigɛbaga ye. (Nt. 15:22) N’i bɛ se ka kɛ tutigɛbaga farankan ye, mun na i tɛna a ɲini weleweledala wɛrɛ fɛ, laala min ka kow ni i ka kow ye kelen ye, o ka fara i kan o nisɔndiya baara la?

11. Cogo jumɛn na, maakɔrɔw bɛ se ka kɛ sababu ye ka dusu don tɔw kɔnɔ walisa u ka kɛ tutigɛbaga farankanw ye, kalo nataw la?

¹¹ Maakɔrɔ caman ye u ka kow labɛn iko a ka kan cogo min na, walisa ka se ka o baara kɛrɛnkɛrɛnnen kɛ. (Heb. 13:7) O ye ko ye min bɛ dusu don jɛkulu kɔnɔ kosɛbɛ dɛ! Maakɔrɔw fana ka barow fɛ, u bɛ se ka kɛ sababu ye weleweledala wɛrɛw ka tutigɛbagaya dusu sɔrɔ. Kuma ɲuman damadɔ minnu bɛ dusu don mɔgɔw kɔnɔ, walima hakilila nafama dɔw dɔrɔn bɛ se ka kɛ fɛnw ye, dɔw mago tun bɛ minnu na tigitigi, walisa u ka kɛ tutigɛbaga farankanw ye. A ka c’a la, baara lakɔlɔsibaga bɛna lajɛ wɛrɛw boloda foro baara kama, walisa bɛɛ ka se k’u sen don waajulibaara la kulu fɛ, baara jiginnen walima lakɔli jiginnen kɔfɛ yɛrɛ. A bɛna jɛkulu ladɔnniya tuma bɛɛ o lajɛ bolodalenw ko la. A bɛna ko bɛɛ kɛ fana walisa bɛɛ ka waajulikɛyɔrɔ ni sɛbɛnw sɔrɔ minnu bɛ bɔli kɛ.

12. N’i tɛ se ka kɛ tutigɛbaga farankan ye, i bɛ se ka mun kɛ?

¹² Hali ni i ka kow b’i bali ka kɛ tutigɛbaga farankan ye, o bɛɛ n’a ta, i bɛ se ka dusu don mɔgɔw kɔnɔ minnu kɛra tutigɛbaga farankanw ye, ka Jehowa deli u ye fana. (Nt. 25:11; Kol. 4:12) I bɛ se k’i ka kow labɛn walisa i ni olu ka cidenyabaara kɛ ɲɔgɔn fɛ don wɛrɛw la, dɔgɔkun kɔnɔna na, walima i bɛ se ka mɛɛn waajuli la u fɛ, ka tɛmɛ kɔrɔlen kan.

13. An b’a fɛ ka tutigɛbaga farankan hakɛ jumɛn sɔrɔ jamanaw kɔnɔ minnu bɛ Senegali Tɔn bolofara ka bolo kan? E ka jɛkulu bɛ se ka mun kɛ walisa an k’o hakɛ sɔrɔ?

¹³ An bɛ Tutigɛbaga Farankan 300 nɔfɛ Awirilikalo la: Jamana minnu bɛ Senegali Tɔn bolofara ka bolo kan, tutigɛbaga farankan hakɛ cayalenba minnu ɲɔgɔn ma sɔrɔ o jamanaw kɔnɔ, olu filɛ: 204 Senegali, 35 Ganbi, 30 Mali la, 9 Gine bisawo. O hakɛ bɛɛ faralen ɲɔgɔn kan, o ye 288 ye. O la sa, an b’a fɛ ka tutigɛbaga farankan hakɛ min sɔrɔ Awirilikalo nata la, n’o ye hakɛ ye min bɛ se ka sɔrɔ, o ye 300 ye. O ko bɛna dusu min don jɛkuluw kɔnɔ, o bɛna waajulibaara bonya cogo min na fana an ka waajulikɛyɔrɔ la, e ka miiri o la!

14. Mun na Awirilikalo ye kalo ɲumanba ye walisa ka kɛ tutigɛbaga farankan ye?

¹⁴ Mun na Awirilikalo ye kalo ɲumanba ye walisa ka kɛ tutigɛbaga farankan ye? Ikomi Hakilijigin bɛna kɛ kalo daminɛ na, o bɛna cogo caman di an ma ka segin ka taa bɔ mɔgɔw ye minnu nana Hakilijigin na, walisa k’u dɛmɛ. An bɛna sɔn-ni-sɔn gafeninw jira, k’an kuntilenna kɛ Qu’enseigne la Bible gafe bilali ye an ka segin-ka-bɔnyew bolo walisa ka Bibulu-kalanw daminɛ. O la sa, ni an kɛra tutigɛbaga farankanw ye Awirilikalo la, o bɛna cogo caman di an ma ka Bibulu-kalanw daminɛ. Ka fara o kan, sibiri duuru ni don wɛrɛw bɛ Awirilikalo la, baara tɛ kɛ minnu na. O b’a nɔgɔya baarakɛlaw ni lakɔlidenw bolo u ka kɛ tutigɛbaga farankanw ye.

15. Ikomi nin Hakilijigin waati bɛ ka surunya, mun na o ka kan ka kɛ kɔrɔtɔko ye an bolo?

¹⁵ Hakilijigin waati kelen o kelen bɛ tɛmɛ, o b’an surunya nin diɲɛ laban na, ni san kelen ye. Waati tɔ min tora walisa ka kuma mɔgɔw fɛ an ka Alaba ko la, o dɔgɔyara. (1 Kɔr. 7:29) Ni nin Hakilijigin waati tɛmɛna kaban, a ye cogo nafamaba min tun di an ma ka an sankolola Fa tanu, o bɛna kɛ ko tɛmɛnen ye min tɛna kɛ tun. Kabini sisan, an k’an ka kow labɛn, k’an seko damajira bɛɛ kɛ, walisa ka Jehowa ka ɲumanya kow fɔ Marisikalo, Awirilikalo ani Mɛkalo la.

[Caption on page 4]

Yala an bɛ se ka Tutigɛbaga Farankan 300 sɔrɔ Awirilikalo la wa?

◼ I ka fɛn minnu bɛ jɔyɔrɔ fɔlɔ la, olu lajɛ.

◼ E ni i ka denbaya ka jɛ ka baro kɛ kuntilennaw kan.

◼ I b’a fɛ ka min kɛ, o fɔ tɔw ye.