An ka Karamɔgɔba ladege n’an bɛ baara kɛ ni Qu’enseigne la Bible gafe ye
1. Yesu tun bɛ mɔgɔw kalan cogo jumɛn na?
1 Karamɔgɔba Yesu tun bɛ fɛnw ɲɛfɔ cogo la min ka nɔgɔn, min jɛlen bɛ. Walisa k’a lamɛnbagaw bila u ka miiri, tuma dɔw la, a tun bɛ fɔlɔ k’u ɲininka u hakilinataw la. (Mat. 17: 24-27) A tun bɛ u ɲɛsin Ala ka Kuma ma. (Mat. 26:31; Mar. 7:6) A tun bɛ jateminɛ kɛ walisa a kana kunnafoni caman di a ka kalandenw ma fo ka dama tɛmɛ, bawo a b’a dɔn k’u bɛna dɔnniya sɔrɔ ka taa a fɛ. (Yuh. 16:12) Ni Yesu tun b’a ka kalandenw kalan fɛnw na, a tun b’a ɲini fana k’a dɔn ni u tun dalen bɛ o fɛnw na, ani ni u tun ye o fɛnw faamu. (Mat. 13:51) Qu’enseigne la Bible gafe dilanna walisa k’an dɛmɛ ka mɔgɔw kalan o cogo kelen na.
2. An bɛ se ka baara kɛ ni ɲininkaliw ye minnu bɛ kalansen kelen-kelen bɛɛ daminɛ na sira jumɛnw fɛ?
2 Ɲininkali minnu bɛ kalansen daminɛ na: Ni an bɛ gafe kalansen dɔ daminɛ, a ka ɲi an ka ɲininkaliw jira kalanden na, ɲininkali minnu bɛ daminɛ na, kalansen tɔgɔ jukɔrɔ. I ka ɲininkaliw lawuli walisa u jaabiw sɔrɔli ka diya kalanden ye. Walima i bɛ se k’a ɲini a fɛ a k’a hakilila di cogo surun na ɲininkaliw kan. E bɛna ɲɛfɔli min kɛ a ka kuma fɔlen kan, o janya kun tɛ. A ka kuma kelen-kelen bɛɛ latilen kun tɛ fana. I bɛ se dɔrɔn k’a fo a ka hakilila dilen na, ka kalansen sɛgɛsɛgɛli daminɛ. A ye ɲɛfɔli minnu kɛ ɲininkaliw kan kalansen daminɛ na, o ɲɛfɔliw bɛna i dɛmɛ k’a dɔn, n’i ka kan k’i sinsin kosɛbɛ kalansen yɔrɔ dɔ kan.
3. An bɛ se ka kalan kɛ cogo nɔgɔn na cogo jumɛn na?
3 Sɛbɛnniw: Kalan ka kan ka sinsin Sɛbɛnniw de kan. (Heb. 4:12) Nka, Bibulu tɛmɛsira kofɔlen kelen-kelen bɛɛ kalan kun tɛ. An ka dannakow sinsinnen bɛ tɛmɛsira minnu kan, i sinsin olu de kan. Bibulu tɛmɛsira minnu bɛ kunnafoniw di, ni olu jɔyɔrɔ man bon kalansen kɔnɔna na, olu kalan kun tɛ. Qu’enseigne la Bible gafe bɛ tiɲɛ ɲɛfɔ cogo la min man gɛlɛn. Kalan kɛ cogo nɔgɔn na. I sinsin yɔrɔ kolomaw dɔrɔn de kan. I kana kuma kojugu fɛn misɛnninw kan. I kana kunnafoniw bɔ yɔrɔ wɛrɛ la fana ka na olu sen don baro la, k’a sɔrɔ kun tɛ o la.
4. Kalan kɛtuma na, mun b’a to an b’a dɔn ni an ka kan ka Appendice yɔrɔ lajɛ?
4 Ɲɛw 194-223: Barokun 14 wɛrɛw bɛ yɔrɔ la min bɛ wele tubabukan na ko “Appendice,” (ɲɛw 194-223) n’o ye kunnafoni wɛrɛw ye minnu dira ka fara kalansenw kan. E yɛrɛ de b’a lajɛ n’i bɛna baro kɛ o yɔrɔ kan kalan kɛtuma na. Barokun dɔw la, i bɛ se ka dusu don kalanden kɔnɔ a ka o yɔrɔ kalan a yɛrɛ ye, kɛrɛnkɛrɛnnenya la, n’a y’a sɔrɔ ɲɛfɔli min kɛra kalansen kɔnɔ, a ye o faamu, ani ni a sɔnna o ma. Misali la, ni aw bɛ ka baro kɛ kalansen 4nan kan, n’o ye ko “Qui est Jésus Christ?” (Yesu Krista ye jɔni ye), baro kɛ kun tɛ yɔrɔ kan min bɛ wele tubabukan na ko “Jésus Christ, le Messie promis (Yesu Krista, Masiya kofɔlen), n’a y’a sɔrɔ kalanden dalen b’a la kaban ko Yesu ye Masiya ye. Tuma dɔw la, nafa bɛ se ka ye a la aw ka waati ta kalan kɛtuma na, ka ‘Appendice’ barokun dɔ, walima ka a yɔrɔ dɔ sɛgɛsɛgɛ.
5. N’i y’a latigɛ ka kunnafoni lajɛ Appendice kɔnɔ, i bɛ se k’o kɛ cogo jumɛn na?
5 N’i y’a latigɛ ka baro kɛ Appendice kan, i bɛ se ka kɔn ka ɲininkaliw labɛn ani ka dakunw mafilɛ ni kalanden ye, i n’a fɔ kalan bɛ kɛ kalansen kan cogo min na. Walima, ka kɛnyɛ ni kalanden magow ye, i bɛ se ka miniti damadɔw ta kalan kɛtuma na, walisa e ni ale ka kunnafoni dilenw lajɛ ɲɔgɔn fɛ. O bɛna a to i k’a dɔn kalanden ye barokun min kalan a yɛrɛ ye, ni a ye o faamu.
6. Seginkanni minnu bɛ kalansen kelen-kelen bɛɛ laban na, baara bɛ se ka kɛ ni olu ye cogo jumɛn na?
6 Seginkanni yɔrɔ: Yɔrɔ min labɛnna kalansen kelen-kelen bɛɛ laban na, o bɛ kuma jɛlenw de jira. Ɲininkali minnu kɛra kalansen kelen-kelen bɛɛ daminɛ na, olu jaabiw bɛ o yɔrɔ de la tuma caman na. I bɛ se ka baara kɛ ni o yɔrɔ kumaw ye walisa ka segin kalansen yɔrɔ kolomaw kan. Weleweledala dɔw y’a ye ko a nafa ka bon ka kalanden bila a ka kuma kelen-kelen bɛɛ kalan, laala fana Bibulu tɛmɛsira minnu ni o kuma bɛ taa ɲɔgɔn fɛ. O kɔfɛ, tɛmɛsiraw bɛ o kuma sɛmɛntiya cogo min na, u b’a ɲini kalanden fɛ a ka ɲɛfɔli surun kɛ o kan. O b’a to kalan ɲɛminɛbaga b’a dɔn ni kalanden ye kalansen yɔrɔ kolomaw faamu ka jɛya, ani ni a y’a faamu fana Bibulu bɛ o yɔrɔ kolomaw sɛmɛntiya cogo min na, ani ni a sɔnna o ma. O bɛ kalanden dege fana a ka baara kɛ ni Bibulu ye walisa ka tiɲɛ ɲɛfɔ mɔgɔ wɛrɛw ye.
7. Cogo jumɛn na an bɛ se ka baara kɛ ni Qu’enseigne la Bible gafe ye walisa ci min dira an ma, an k’o kɛ?
7 Ci min dira an ma ka kɛ, n’o ye ka mɔgɔw kalan, ani k’u kɛ kalandenw ye, an bɛ se k’o kɛ cogo la min bɛ nɔ bɔ kosɛbɛ, n’an bɛ Yesu ka mɔgɔ kalancogo ladege. (Mat. 28:19, 20) Qu’enseigne la Bible gafe bɛ se k’an dɛmɛ k’o kɛ. An ka baara ɲuman kɛ n’a ye walisa ka mɔgɔw kalan tiɲɛ ko la, cogo jɛlen na, min ka nɔgɔn, min ka di fana.