Nafoloba kalifara an ma
1 Ala ye baara min di Paul ma, n’o ye ka waajuli kɛ, Paul ye nafaba don o la, wa, a y’a fɔ o baara ma ko “nafoloba.” (2 Kɔr. 4:7) K’a to o baara la, Paul ye gɛlɛyaw kun ani u y’a tɔɔrɔ. Paul ni mɔgɔ o mɔgɔw tun mana bɛn, olu waajuli tun tɛ a sɛgɛn. Paul ye taama caman kɛ siraw fɛ ani kɔgɔji fɛ, gɛlɛya ni faratiw tun bɛ minnu na. An bɛ se ka Paul ladege cogo jumɛn na, k’a jira ko an ka cidenyabaara bɛ jɔyɔrɔba la an bolo? (Rom. 11:13) Mun bɛ an ka cidenyabaara kɛ nafoloba ye min ɲɔgɔn tɛ?
2 Nafoloba fisaman: Tuma caman na, nafoloba minnu bɛ dugukolo kan, olu bɛ dusukasi caman lase mɔgɔ ma, nafa tɛ u la ko bɛɛ la, wa u nafa ye waatininko de ye. Nka an ka cidenyabaara bɛ nafa lase an ni tɔw ma min bɛ mɛɛn. (1 Tim. 4:16) A bɛ mɔgɔ kɔnɔnajɛlenw dɛmɛ u ka Jehowa dɔn, u ka yɛlɛma bɛnnenw don u ka ɲɛnamaya kɛcogo la, ka ɲɛnamaya banbali jigiya lakika sɔrɔ. (Rom. 10:13-15) Ni an ka cidenyabaara bɛ jɔyɔrɔba la kosɛbɛ an bolo, an bɛ kuntilenna sɔrɔ min b’an wasa an ka diɲɛlatigɛ kɔnɔ, an b’a dɔn ko an ye ko kɛ min nafa bɛ mɛɛn, wa, an bɛ jigiya sɔrɔ sini ko la, min bɛ an nisɔndiya kosɛbɛ.—1 Kɔr. 15:58.
3 Aw k’a jira ko aw bɛ nafa don aw ka nafoloba la: An bɛ sɔn ka min don fɛn dɔ kunkɔrɔ, o de b’a jira tuma caman na, ni o fɛn nafa ka bon an bolo. Bonyaba don an bolo dɛ ka an ka waati ni an fanga ta walisa ka Jehowa tanu! ( Efe. 5:16, 17) An b’an ka waati kɛ cogo min na, o ka kan k’a jira ko an bɛ nafa don kosɛbɛ alakow la ka tɛmɛ fɛnɲini kan. Ikomi fɛn min b’an bolo ka fɔ tɔw ye, o nafa ka bon nin cogo la, an bɛna waajuli kɛ ni nisɔndiya ye, wa, an mana cogo o cogo sɔrɔ ka kibaru duman fɔ mɔgɔw ye, an labɛnnen don k’o kɛ.
4 Nafolomafɛn minnu tɛ se ka san bawo u sɔngɔ ka gɛlɛn kojugu, tuma caman na, olu tɛ dogo, nka olu bɛ jira kɛnɛ kan walisa mɔgɔ wɛrɛw ka u ye. Ni an bɛ an ka cidenyabaara minɛ i n’a fɔ nafoloba, a jɔyɔrɔ bɛna bonya kosɛbɛ an ka diɲɛlatigɛ kɔnɔ. (Mat. 5:14-16) Ka an dusukun falen to waleɲumandɔn na, an ka ciden Paul ladege tuma bɛɛ, k’a jira ni cogo b’an bolo tuma o tuma, ko an bɛ nafa don an ka cidenyabaara la tiɲɛ na, wa, ko a bɛ jɔyɔrɔba la an bolo i n’a fɔ nafoloba.