An ka Krista ladege an ka waajuli baara la
1 Yesu kɛra ɲɛjirabaga ye an bolo, walisa an k’a ladege an ka waajuli baara la. Ala kanuyaba ni mɔgɔw kanuyaba min bɛ Yesu la, a y’o jira ko caman na ani sira caman fɛ. A ye mɔgɔ majiginnenw kalan tiɲɛ ko la. Mɔgɔ minnu tun sɛgɛnnen bɛ ani minnu tun doninen bɛ, a ye koɲuman kɛ olu ye.—Mat. 9:35.
2 Yesu taamacogo ni a ka kalansiraw: Yesu m’a to politikikow walima ko gansan minnu bɛ kɛ hadamadenw ka nafa kama, olu k’a hakili ta ka bɔ a ka baara kan. A m’a to fana kuntilenna ɲuman wɛrɛ si k’a hakili ta ka bɔ a ka baara belebele kan, walima o ka na jɔyɔrɔ fɔlɔ la, a ka baara ɲɛ. (Luka 8:1) A y’a sinsin Ala ka Masaya kibaru duman waajuli kan, k’a jira ko o kelenpe de ye hadamadenw ka kunkow ɲɛnabɔlan ye fo abada. Baara nafamaba de tun bɛ Yesu bolo ka kɛ, wa, a tun ka kan k’o kɛ waati surun dɔ de kɔnɔ. Tuma min na Kapɛrnaum dugu kɔnɔmɔgɔw tun b’a fɛ Yesu ka to u fɛ yen, a y’a fɔ a ka kalandenw ye ko: “An ka taa . . . dafɛ duguw la, walisa ne ka waajuli kɛ o yɔrɔw la fana, k’a masɔrɔ o de ye ne nakun ye.”—Mar. 1:38.
3 Yesu kɛlen kɔ ka a ka kalandenw dege, a ye u ci ni nin kuma kɛrɛnkɛrɛnnenw ye ko: “Aw . . . ka waajuli kɛ ko sankolo masaya surunyara.” (Mat. 10:7) A y’a fɔ a nɔfɛmɔgɔw ye ko Masaya kunkankow de ka kan ka bila jɔyɔrɔ fɔlɔ la u ka diɲɛlatigɛ kɔnɔ. (Mat. 6:33) Sanni Yesu ka yɛlɛn sankolo la, a ye kuma laban minnu fɔ a ka kalandenw ye, olu y’a jira k’a jɛya, kalandenw tun ka kan ka min kɛ. A ko: ‘A’ ye taa siyaw bɛɛ la ka u kɛ ne ka kalandenw ye.’—Mat. 28:19.
4 Jɔyɔrɔba min bɛ masaya la: Yesu tun b’a sinsin fɛn koloma min kan a ka kuma kɔnɔna na, o tun ye Ala ka Masaya ye, wa, a ye dusu don a ka kalandenw kɔnɔ u k’a ladege. Hadamadenw bɛ cɛsiri minnu kɛ walisa ka u ka kunkow ɲɛnabɔ, olu tɛ se ka ɲɛsɔrɔ. (Jer. 10:23) Ala ka Masaya kelenpe de bɛna Ala tɔgɔ saniya, ka hadamadenw lafiya fo abada. (Mat. 6:9, 10) “Mɔgɔ minnu bɛ ŋunan ka kasi ko haramulen kɛlenw bɛɛ kosɔn,” ni an bɛ olu kalan Masaya ka tiɲɛw ko la, o bɛ u dɛmɛ u ka diɲɛlatigɛ ka ɲɛ u bolo, u bɛ hɛrɛ sɔrɔ o kɔnɔ, wa, jigiya lakika bɛ to u la siniko ta fan fɛ.—Eze. 9:4.
5 Yesu sen bɛ tuma bɛɛ Ala ka Masaya kibaru duman waajuli la, wa, a y’a jira an na k’a jɛya ko a bɛ an kɔkɔrɔdon o baara la. (Mat. 28:20) Yesu ye cogo min jira an na, an ka cidenyabaara bɛ se ka sanga ni o ye fo ka se hakɛ jumɛn ma? (1 Pi. 2:21) An bɛ laban don minnu na nin ye, hadamadenw ka ɲɛnamaya ni u ka saya bɛ minnu dafɛ, an ka ko bɛɛ kɛ ka kɛnyɛ ni an seko ye, ka tugu ni an sɛbɛ bɛɛ ye Yesu ka cogo jiralen kɔ an ka cidenyabaara la.