Mɔgɔ jagɛlɛnw nka o bɛɛ la, mɔgɔ minnu bɛ hɛrɛ don u ni mɔgɔw cɛ
1 An bɛ Masaya cikan fɔ mɔgɔ minnu ye, olu caman bɛ kuma u ka dannakow kan ni kɔnɔnajɛya ye k’a sɔrɔ o dannakow bɛ Bibulu tiɲɛkuma sɔsɔ. Hali ni an ka kan ka waajuli kɛ ni jagɛlɛya ye, an b’a fɛ fana ‘hɛrɛ ka to anw ni mɔgɔw bɛɛ cɛ,’ wa, an t’a fɛ ka don u gasi la fu. (Rom. 12:18; Kɛw. 4:29) Ni an bɛ ka Masaya cikan fɔ tuma min na, cogo jumɛn na an bɛ se ka kɛ mɔgɔ jagɛlɛnw ye, nka o bɛɛ la, mɔgɔw ye minnu bɛ hɛrɛ don an ni mɔgɔw cɛ?
2 Hakililaw ye kelen yɔrɔ min na, an ka o ɲini: Mɔgɔ min bɛ hɛrɛ don ani mɔgɔw cɛ, o bɛ a yɛrɛ tanga sɔsɔliw ma. An barokɛɲɔgɔn dalen bɛ min na ni a fanga bɛɛ ye, ka a jira ko o tɛ tiɲɛ ye, o tɛna a bila a ka sɔn an ka kuma ma. Ni an barokɛɲɔgɔn ye fɛn fɔ min tilennen tɛ, laala an bɛ se ka na ni kuma ye fɛn dɔ kan, an hakililaw bɛ se ka kɛ kelen ye min na. Nka, an ka o kɛ cogo bɛnnen na. Anw ni an barokɛɲɔgɔnw hakililaw ye kelen ye yɔrɔ min na, ni an b’an sinsin o kan, o bɛ se ka u baga faga, wa, o bɛ se ka diya u ye fana.
3 Ni an tɛmɛna an barokɛɲɔgɔn hakilila dɔ kan min tilennen tɛ, yala an m’a jira ko an sɔnna o fili ma, walima an ma dɔ bɔ tiɲɛ barika la wa? Ayi. Baara min dira an Kretiɛn cidenyabaarakɛlaw ma, o tɛ k’a jira ko an barokɛɲɔgɔn hakilila kelen-kelen bɛɛ ye nkalon ye, nka an ka baara ye ka Ala ka Masaya kibaru duman fɔ. (Mat. 24:14) Ni an barokɛɲɔgɔn ye hakilila dɔ fɔ min tɛ tiɲɛ ye, sanni an ka ko kɛ k’a dama tɛmɛ, an bɛ se k’a ka kuma fɔlen filɛ cogo ye, min b’an dɛmɛ k’an an barokɛɲɔgɔn miiricogo faamu.—Nt. 16:23.
4 An k’an barokɛɲɔgɔn danbɛ to a kan: Waati dɔw la, an ka kan ka an ja gɛlɛya ani ka dusu sɔrɔ ni an b’a jira ko kalansira fuw ye nkalon ye. Mɔgɔ min dalen bɛ fɛnw na min tɛ tiɲɛ ye, walima mɔgɔ min bɛ o fɛn suguw kalan kɛ mɔgɔw kun, an tɛ yɛlɛ olu ma, walima an tɛ kuma fɔ u ma min bɛ u lagosi, bawo an ye mɔgɔw ye minnu bɛ hɛrɛ don anw ni mɔgɔw cɛ. Ni an b’a jira ko an ka fisa ni an barokɛɲɔgɔn ye, o bɛ se ka a mabɔ an na. Nka ni an majiginnen don an kɛcogo fɛ, ani ni an ka ɲi, o bɛ tiɲɛ kanubagaw hakiliw dayɛlɛ. Ni an y’a jira ko an bɛ an lamɛnbagaw ni u ka dannakow bonya, an bɛ u ka danbɛ to u kan. A bɛ nɔgɔya u bolo o cogo la ka sɔn an ka cikan ma.
5 Ciden Paul tun bɛ Ala ka kuma fɔ mɔgɔ minnu ye, a tun bɛ a hakili jakabɔ olu ka dannakow kan, walisa k’a ɲini ka kibaru duman fɔ u ye, cogo la min bɛ diya u ye. (Kɛw. 17:22-31) A sɔnna ka a “yɛrɛ kɛ fɛn bɛɛ ye bɛɛ kosɔn, walisa cogo o cogo,” a “ka u dɔw kisi.” (1 Kɔr. 9:22) An bɛ se ka o ɲɔgɔn fana kɛ, ni an ye mɔgɔw ye minnu bɛ hɛrɛ don anw ni mɔgɔw cɛ, ka an to kibaru duman waajuli la ni ja gɛlɛya ye.