Mɔgɔ wɛrɛw dɛmɛ u ka kɛ Ala teriw ye
1 Mɔgɔ minnu bɛ bɔ siyaw bɛɛ la, Jehowa bɛ ka olu kalan bi a ka siraw la. (Esa. 2:2, 3) Nka walisa o mɔgɔ suguw “ka den ni muɲuli ye,” u ka kan ka Jehowa kanu. (Luka 8:15; Mark. 12:30) Ni o kanuya sugu tɛ u la, u tɛna fanga sɔrɔ ka kow kɛlɛ minnu bɛ se ka u bila kojugu kɛli la, walima u tɛna dusu sɔrɔ ka tilennenya sirataama. An bɛ se ka mɔgɔ wɛrɛw dɛmɛ u ni Jehowa cɛsira ka ɲɛ sira wɛrɛ min fɛ, o ye k’a kɛ dɔ ka fara u ka waleɲumandɔn kan Ala jogoɲumanw ko la. An ka dusu don u kɔnɔ ko u bɛ min kalan Approchez-vous de Jéhovah gafe kɔnɔ, u ka u sɛbɛ-kɔrɔ miiri o la.
2 Aw bɛ min kɛ: Aw yɛrɛw ka walew bɛ se ka nɔ ɲɛnama bila Bibulu kalandenw dusukunw na. Ni u ɲɛ b’a la ko aw bɛ nafaba don aw ni Jehowa ka teriya la, wa k’o bɛ nɔ bila aw ka ɲɛnamaya kɛcogo la, o bɛ se k’u bila olu yɛrɛ k’a ɲini ka kɛ Ala teri ye. (Luka 6:40) Tiɲɛ na, tuma caman an yɛrɛw bɛ min kɛ o bɛ nɔba bila tɔw la ka tɛmɛ an bɛ min fɔ.
3 Bangebagaw bɛ se k’u denw kalan sira ɲɛnamaba min fɛ u ka Jehowa kanu, o ye olu yɛrɛw ka kɛwalew ye. (Dut. 6:4-9) Cɛ dɔ ni a furumuso tun b’a fɛ k’u den lamɔ ka ɲɛ tiɲɛ kɔnɔ. Walisa ka laadilikan sɔrɔ, u ye bangebaga wɛrɛw ɲininka minnu sera u denw lamɔcogo la. Cɛ min ye mɔgɔw ɲininka, o y’a fɔ ko: “Ne ni mɔgɔ o mɔgɔ kumana, olu bɛɛ sɔnna min ma, o ye ko bangebagaw yɛrɛw ka kɛwalew de jɔyɔrɔ ka bon a ko la.” O la sa, bangebagaw ka ɲɛnamaya kɛcogo kuuru bɛɛ fɛ, u bɛ se k’a jira u denw la, a kɔrɔ ye min ye ka kɛ ‘Jehowa teri ye.’—Yak. 2:23.
4 Delili minnu bɛ bɔ dusukun na: Aw bɛ se ka mɔgɔ wɛrɛw fana dɛmɛ u ka kɛ Jehowa teriw ye, ni aw bɛ u kalan delili kɛcogo la min bɛ bɔ dusukun na. Yesu ye misali min di delili kɛcogo kan, ani delili sɛbɛ caman wɛrɛ minnu bɛ Sɛbɛnniw kɔnɔ, aw bɛ se ka olu jira u la. (Mat. 6:9, 10) Aw yɛrɛ ka deliliw fɛ, aw bɛ se ka aw denw ni Bibulu kalandenw dege delili kɛcogo la. Ni u bɛ aw ka kumaw mɛn minnu bɛ bɔ aw dusukun na, u b’a dɔn aw dusukunnataw ye min ye ka ɲɛsin Jehowa ma. Aw ka dusu don u kɔnɔ u ka u “timinandiya Ala delili la” ni u bɛ kɔrɔbɔliw kɔnɔ. (Rom. 12:12) Ni u ye Jehowa ka dɛmɛ ye tuma min na u mago bɛ dɛmɛ la, o tuma de la u b’a daminɛ ka u ka dannaya da Jehowa kan, k’a kanu iko teri sɛbɛ.—Zab. 34:9; Fil. 4:6, 7.