Aw bɛ mun bila jɔyɔrɔ fɔlɔ la?

¹ E bɛna o ɲininkali jaabi cogo di? Siga t’a la ko an bɛɛ b’a fɛ ka Masaya kunkankow bila jɔyɔrɔ fɔlɔ la. (Mat. 6:​33) Nka, an bɛ se k’an yɛrɛ ɲininka ko: ‘Yala ne ka ko sugandilenw b’o jira wa?’ Bibulu bɛ dusu don an kɔnɔ ko an ka to ka ‘an yɛrɛ kɔrɔbɔ’ walisa ka an cogo dɔn. (2 Kɔr. 13:5) An bɛ se ka an yɛrɛ kɔrɔbɔ cogo di walisa k’a dɔn ni an bɛ Masaya kunkankow bila jɔyɔrɔ fɔlɔ la?

² An ka waati ko la: An b’a sugandi ka an ka waati kɛ cogo min na, an bɛ se ka an yɛrɛ kɔrɔbɔli daminɛ ni o sɛgɛsɛgɛli ye. (Efɛ. 5:15, 16) An bɛ waati hakɛ jumɛn kɛ dɔgɔkun o dɔgɔkun hadamadenya sirataamani na mɔgɔw fɛ, telefilɛ la, ɛntɛrnɛti kan, walima yɛrɛ-ɲɛnajɛ dɔ la? An bɛ waati hakɛ min kɛ o ko suguw la, ni an bɛ o sɛbɛn, ka tila ka o suma ni waati hakɛ ye an bɛ min kɛ alako ta fan fɛ baaraw la, o bɛ se ka an kabakoya. Yala an bɛ dɔ fara an ka baarakɛwaati kan fo waati tɛ sɔrɔ ka baara senuma kɛ, walisa dɔrɔn an ka se ka fɛn sɔngɔ gɛlɛnw san wa? Siɲɛ joli an ma taa lajɛw la, walima cidenyabaara la, k’a sababu kɛ ko an taara an yɛrɛ ɲɛnajɛ yɔrɔ dɔ la, sibiridon ni karidon na?

³ Ko minnu ka kan ka bila jɔyɔrɔ fɔlɔ la, an ka olu jateminɛ: An fanba b’a fɛ ka ko minnu kɛ, waati bɛrɛ tɛ an bolo ka se ka olu bɛɛ kɛ. O kosɔn, ni an b’a fɛ ka Masaya kunkankow bila jɔyɔrɔ fɔlɔ la, ko minnu ka kan ka bila jɔyɔrɔ fɔlɔ la an ka kan ka olu jateminɛ, an bɛ tila ka waati boloda o kow bɛɛ la “fisamaw” kama. (Fil. 1:​10) Ka Ala ka Kuma kalan, ka an sen don cidenyabaara la, ka an mago don an ka denbaya la, ani ka na an ka Kretiɛn lajɛw la, olu sen bɛ o ko fisamaw la. (Zab.1:1, 2; Rom. 10:13, 14; 1 Tim. 5:8; Heb. 10:24, 25) Ko wɛrɛw bɛ an nafa, i n’a fɔ ɲɛnajɛ ɲumanw ani farikoloɲɛnajɛ min bɛ kɛ cogo bɛrɛ bɛnnen na. (Mark. 6:31, 1 Tim. 4:8) Nka, o ko minnu nafa man bon kosɛbɛ, olu ka kan ka to u jɔyɔrɔ la.

⁴ An balimakɛ denmisɛn dɔ y’a ɲini ka Masaya kunkankow bila jɔyɔrɔ fɔlɔ la, o la sa a ye waati dafalen baara daminɛ sanni a ka tugu kalanbaw nɔfɛ, minnu tun bɛna a to a ka baara sɔrɔ. A ye kan wɛrɛ dege, ka yɛlɛma yɔrɔ wɛrɛ la, yɔrɔ min tun mago bɛ weleweledalaw la. A ko: “Ne bɛ ka dakabanawaati de kɛ yan. Cidenyabaara bɛ barika don mɔgɔ la kosɛbɛ dɛ! Ne bɛ min fɛ dɔrɔn, o ye denmisɛn kelen-kelen bɛɛ ka se ka o ɲɔgɔn kɛ, ani nisɔndiya min bɛ ne la olu fana ka se ka o nisɔndiya ɲɔgɔn sɔrɔ. Fɛn fosi tɛ yen min ka fisa ni nin ye: ka baara kɛ Jehowa ye ni an bolofɛnw ni an seko bɛɛ ye.” Tiɲɛ na, ka Masaya bila jɔyɔrɔ fɔlɔ la, o bɛ dugawu caman lase an ma. Nka min nafa ka bon kosɛbɛ, o ye ko ni an ye Masaya bila jɔyɔrɔ fɔlɔ la, o ka di Jehowa ye, an Fa min bɛ sankolo la.—Heb. 6:10.