U ye kantigiya misali jira
1 Waati dafalen baara cogoya kura dɔ dabɔra san 1937 la. O tun ye tutigɛbaga kɛrɛnkɛrɛnɛnyabaara ye. Cɛw fara musɔw kan minnu bɛ se ko la, ni u bɛ kodɔn kretiɛn cidenyabaara la, olu y’u yɛrɛ labila Jɛkuluba bolo a k’u bila ka taa a sagona yɔrɔw la. Bi, san tan caman tɛmɛnen kɔfɛ, tutigɛbaga kɛrɛnkɛrɛnnenw b’a la ka kantigiya misali jira an na, misali min ka kan ka ladege.—Heb. 6:12.
2 U ye kow ɲɛminɛ: Kabini a daminɛ na, tutigɛbaga kɛrɛnkɛrɛnnenw kɛra waajuli ɲɛminɛbagaw ye. U ye disiki-lamɛn-fonow ta ka to ka olu lakuma mɔgɔw ye u ka so dakunw na. Ni u seginna ka na bɔ mɔgɔw ye, u tun bɛ barow fana kɛ disiki kɔnɔ kumaw kan. O baara kɛra dugubaw de kɔnɔ, jɛkuluw tun sigilen bɛ yɔrɔ minnu kɔnɔ kaban. Kɔfɛ, tutigɛbaga kɛrɛnkɛrɛnenw bilara ka taa yɔrɔw la, minnu magoba bɛ masaya weleweledalaw la. Mɔgɔ o mɔgɔ y’a jira ko kibaru duman ka di a ye, u tora ka taa bɔ olu bɛɛ ye, ani u ye Bibulu-kalan caman ɲɛminɛ. U ye o cɛsiri sɛbɛ minnu kɛ, o kɛra sababu ye jɛkulu kura kɛmɛ caman sera ka sigi sen kan. U ma sɛgɛn waajulibaara la minkɛ, o de y’a to Jɛkuluba dakabana bonyana bi nin cogo la, iko an ɲɛ b’a la cogo min na. (Es. 60:22) Tutigɛbaga kɛrɛnkɛrɛnnenw bɛ ka u jɔyɔrɔba fin ka taa a fɛ kibaru duman jɛnsɛnni na “sankolo jukɔrɔ dafɛn bɛɛ ye.”—Kol. 1:23.
3 An ka kan k’u ladege: San tan ni kɔw kɔnɔ, tutigɛbaga kɛrɛnkɛrɛnnen dɔw ye waati dafalen baara kɛ. Sanw tora ka tɛmɛ minkɛ, ko suguya caman ye o cɛw ani o muso kantigi ninnu sɔrɔ ka u ka limaniya kɔrɔbɔ. (1 Piɛ. 1:6, 7) U tun bɛ hɛrɛ min na a diyara u ye ka o to yen, ka taa baara kɛ yɔrɔw la, yɔrɔ minnu mago tun bɛ u la. An bɛ bi don min na, a dɔw kɔrɔla kosɛbɛ ani u ka kɛnɛya tɛ ten, walima gɛlɛya wɛrɛw bɛ u da la. (2 Kɔr. 4:16,17) Nka bi, “hali ni u kɔrɔla, u bɛ den.” (Zab. 92:15) U ye u ka dannaya da Jehowa kan, wa u bɛ k’a ka dugawu sɔrɔ.—Zab. 34:8; Nta. 10:22.
4 Siga t’a la tutigɛbaga kɛrɛnkɛrɛnnenw ni an ka foli ka kan. Ni bonya dara aw kan ka tutigɛbaga kɛrɛnkɛrɛnnen dɔ bila aw ka jɛkulu kɔnɔ, aw ye cogo bɛɛ kɛ walisa aw ka se ka waati kɛ ni u ye ka u ka dɔnniya dɔ sɔrɔ. U ye baara kɛ ni kantigiya ye k’u to masaya weleweledali la minkɛ, aw ka u waleɲumandɔn o la. U tora basigi min kɔnɔ, o ka dusu don aw kɔnɔ. Mɔgɔ o mɔgɔ mana u ka limaniya ladege, o tigi fana bɛ Jehowa ka mandiya ni a ka dugawu sɔrɔ bawo mɔgɔ “min bɛ taama jɛlenya sira fɛ, o tigi ko ka di a ye.”—Nta. 12:22.