Bangebagaw, yala aw bɛ taa ni aw denw ye cidenyabaara la wa?
1 Masakɛ hakilitigi Solomani ye laadilikan ɲuman di den lamɔcogo kan, a y’a fɔ tuma min na ko: “Denmisɛn ka kan ka sira min taama, i ka a kalan o la, hali ni a kɔrɔla, a tɛna o bila.” (Nt. 22:6) Den bɛ Kretiɛn minnu bolo, olu b’a fɛ u denw ka kɔrɔbaya ka kɛ Jehowa ka baarakɛlaw ye minnu kɔgɔlen don alako ta fan fɛ, k’u yɛrɛ di Jehowa ma. (1 Sam. 2:18, 26; Luka 2:40) Den minnu bɛ Kretiɛn duw kɔnɔ, olu ka kan ka se k’u ka dannaya ɲɛfɔ cogoya jɛlen la, dannaya min sinsinnen bɛ Bibulu kan, hali ni u ye denmisɛn fitininw ye. Denmisɛnninw ka ɲɛtaa bɛ teliya alako ta fan fɛ ni u bɛ u bangebagaw bilasira foro cidenyabaara la, kabini u fitininnama.
2 Den san fɔlɔw ye a dege waati de ye, ɲuman walima juguma kama. O dege sanw kɔnɔna na, denmisɛnw ka kan ka fɛn minnu dege k’o kɛ u deliko ɲuman ye, o dɔ ye ka Ala ka Masaya Kibaru duman waajuli kɛ. Bangebaga caman ye o daminɛ tuma min na u ye u denw ta u fɛ du-ni-du waajuli la, k’a sɔrɔ u denw tun ka dɔgɔ. Ni bangebagaw bɛ u sen don tuma bɛɛ waajuli la, o bɛ denmisɛnw dɛmɛ u ka kɛ cidenyabaara fɛ, k’u cɛsiri o la. (Yuh. 5:20) Denmisɛn minnu b’a ɲini ka o jogoɲuman suguw dege, a nege bɛ don olu la ka kɛ weleweledalaw ye minnu ma batise fɔlɔ, hali ni u ye denmisɛn fitininw ye.
3 An ka kuma an balimamuso dɔ kan min cɛ ye ale ni a den duuru to yen ka taa. An balimamuso cɛ tun tɛ Jehowa Seere ye. An balimamuso tun ka kan ka don baara la diyagoya la ani ka a denw ka magoɲɛkow ɲɛnabɔ. Yala kow cayara a kunna fo a y’a denw ka alakow bila a bolo kɔfɛ wa? An balimamuso hakili tora a la ko: “Ne tun cɛsirilen bɛ Bibulu kalanni ni sɛbɛnw fana kalanni na, sɛbɛn minnu tun sinsinnen bɛ Bibulu kan. Ne tun mana min kalan, ne tun bɛ n jija k’o sirataama fana. Ne tun bɛ taa ni denw ye lajɛw la ani da-ni-da cidenyabaara la tuma bɛɛ. O kɔ kɛra mun ye? Ne den duuru bɛɛ batisera.” Bangebagaw, aw minnu bɛ aw mago don koɲuman aw denw na, aw ka aw denw dege joona deliko ɲumanw na Kretiɛn cidenyabaara la.
4 An balimamuso dɔ wɛrɛ fana ko: “Ne ba kɛra Seere ye tuma min na, ne tun bɛ kalo damadɔw dɔrɔn na. Kabini o tuma na, a y’a ka baara ta ni a dusu ye, n’o ye ka an lamɔ ni ‘Matigi ka kololi ni a ka laadili ye.’ (Efɛ. 6:4) Ni ne hakili b’a la ka taa se fo yɔrɔ jan, a tun bɛ Bibulu kalan ni an ye tuma bɛɛ, an tun bɛ lajɛw labɛn ɲɔgɔn fɛ, ani an tun b’a bilasira dɔgɔkun o dɔgɔkun, du-ni-du baara la. An tun bɛ kuma an ka dannaya kan fana lakɔli la.”
5 Kretiɛncɛ dentigi dɔ ye nin kuma nafama fɔ: “Ne ni n muso y’a daminɛ joona ka an denkɛw ta an fɛ an ka du-ni-du seereya baara la. An y’an denw dege ka o kow kɛ u delikow ye. O la sa, u ma deli ka lajɛ dɔ jɛ, a ma deli ka kɛ fana ko u ma taa waajuli baara kɛ, fo ni a kɛra kow ye minnu tun tɛ se ka bɔ a ma cogo si la. Ne dalen b’a la ko o dege sanw de y’a to nin kow kɛra i n’a fɔ Bibulu b’a fɔ cogo min na Ntalenw 22:6 la.” An balimakɛ ni a muso ye min sɔrɔ u ka baara la, a ye o fɔ nin cogo la: “Sɛgɛn minnu bɛɛ kɛra, olu si ma nisɔndiya bɔ, an ye nisɔndiya min sɔrɔ ka an denkɛw ye ka taama ɲɛnamaya sira kan.”
6 Bangebagaw, aw ye Jehowa ka kanuya ladege. Aw ka aw denw lamɔ ka kɛnyɛ ni Kretiɛn ka cidenyabaara ‘sira’ ye. O kɛcogo dɔ ye ka aw denw ta aw fɛ foro cidenyabaara la. Aw bɛ cɛsiri minnu kɛ, Jehowa, an fa min bɛ sankolo la, ale bɛna dugawu caman lase aw ma, olu ko la.—Nt. 10:22.