An k’a jira mɔgɔw la ko an bɛ u fɛ—An ka kɛ mɔgɔw ye minnu bɛ bonya ni karama da mɔgɔw kan
1 “Matigi ye makaritigi hinɛma ye.” (Zaburuw 145:8) Hali ni Jehowa ye dunuya bɛɛ Masaba ye, Jehowa ka ɲi, a bɛ mɔgɔw gasi sigi. Ni a bɛ ko kɛ ni hadamaden dafabaliw ye, a b’u bonya. (Jen. 13:14; 19:18-21, 29) Ni an bɛ an ka Ala ladege o la, an ka kibaru duman ɲɛfɔcogo bɛ fisaya. (Kol. 4:6) Nka, o kɔrɔ tɛ ko an bɛna mɔgɔw bonya an ka kuma dɔrɔn fɛ.
2 Ni an bɛ waajuli kɛ da-ni-da: Ni an nana bɔ mɔgɔ ye waati la min bɛnnen tɛ o tigi ma, walima ni an nana a sɔrɔ o tigi bolo degunnen bɛ kosɛbɛ fo a tɛ se ka kuma an fɛ, an ka kan ka mun kɛ? An ka kan ka o ko suguw faamu, ka an ka ɲɛfɔli surunya, walima k’a fɔ o tigi ye ko an bɛna segin ka na waati wɛrɛ la. Ni mɔgɔw ma sɔn an ka sɛbɛnw na, an bɛna a jira ko an ka ɲi, ni an t’a ɲini k’u diyagoya. Ni an bɛ mɔgɔw gasi sigi, o bɛna an bila k’an janto mɔgɔw ka yɔrɔ la. Misali la, ni an ye so dayɛlɛ ka don du kɔnɔ, an ka da tugu an dontɔ ani an bɔtɔ, wa an ka an denw fana dege o kɛli la. Ni an ma mɔgɔ sɔrɔ yɔrɔ min na, an ka kan ka sɛbɛn bila yɔrɔ la, tɛmɛbagaw tɛ a ye yɔrɔ min na. Tiɲɛ na, bonya ni karama bɛna an bila ka mɔgɔ wɛrɛw minɛ i n’a fɔ an b’a fɛ u ka an minɛ cogo min na.—Luka 6:31.
3 Ni an bɛ seereya kɛ nbɛda la: Ni an bɛ ka seereya kɛ nbɛda la, an bɛ se k’a jira ko an bɛ mɔgɔw bonya ni an tɛ sennamɔgɔw bali u ka tɛmɛ, ani ni an tɛ an dalajɛ bitikiw ɲɛ fɛ. An bɛna a jira ko an bɛ mɔgɔw faamu ni an t’a ɲini ka kuma mɔgɔw fɛ minnu kɔrɔtɔlen don, nka an b’a ɲini ka kuma mɔgɔw fɛ, waati damadɔ bɛ minnu bolo. Tuma dɔw la, mankan bɛ siradaw la, fo an ka an kan kɔrɔta walisa mɔgɔw ka se ka an ka kumaw mɛn. O bɛɛ n’a ta, an ka kan ka o kɛ ni bonya ye. An t’a ɲini mɔgɔw k’an jateminɛ.—Mat. 12:19.
4 Ni an bɛ seereya kɛ telefɔni na: Ni an bɛ mɔgɔw gasi sigi, o bɛna an bila ka waajuli kɛ telefɔni fɛ, mankan tɛ yɔrɔ min na. An b’a jira ko an kɛcogo ka ɲi mɔgɔw fan fɛ, ni an bɛ teliya k’an yɛrɛ kofɔ u ye, ani ka u welekun fɔ. Mɔgɔ bɛ kuma telefɔni na yɔrɔ min fɛ, an ka o gɛrɛ an da la ka kuma, ka an kan diya. O bɛna an dɛmɛ ka baro ɲɛnama kɛ mɔgɔw fɛ, min sinsinnen bɛ Bibulu kan. (1 Kɔr. 14:8, 9) Ni an ka ɲi, ni an bɛ mɔgɔ gasi sigi, ani ni an bɛ mɔgɔ bonya o kow la, an bɛ ka Ala Jehowa de ladege, ale min ye hinɛma ye.