Aw “ka tugu ne kɔ” tuma bɛɛ
1 Mɔgɔ caman bɛ u ka ɲɛnamaya kɛ u yɛrɛ diyanyɛkow kɛli kama, o bɛɛ n’a ta, tuma caman na, u tɛ hɛrɛ la. Nka fan wɛrɛ fɛ, Yesu ye laadilikan di ɲɛnamaya kɛcogo dɔ kan min bɛ na ni hɛrɛ lakika ye. O ye ka jɛn i yɛrɛ ka nafaw kɔ, ka nili kɛ. (Kɛw. 20:35) Yesu ko: “Mɔgɔ min b’a fɛ ka taama ne nɔ fɛ, o tigi ka jɛn a yɛrɛ kɔ . . . ka tugu ne kɔ” tuma bɛɛ. (Mar. 8:34, LAYIDU KURA) Ka i yɛrɛ jɛn i diyanyɛko dɔw la waati dɔw la, a tɛ dan o dɔrɔn ma. A kɔrɔ ye fana ko an b’an ka ɲɛnamaya kɛ walisa ka an ko diya Jehowa ye don o don. An t’a ɲini ka an yɛrɛ diyanyɛkow kɛ.—Rom. 14:8; 15:3.
2 An ka ciden Paul ka misali ta. “Yesu Krisita [ka] dɔnniya” nafaba kosɔn, Paul tun b’a fɛ ka fɛn minnu kɛ a yɛrɛ ye, a ma tugu o fɛnw nɔfɛ tun, nka a y’a yɛrɛ di walisa Masaya nafaw ka taa ɲɛ. (Fil. 3:7, 8) Paul tun b’a fɛ ka mɔgɔ wɛrɛw dɛmɛ. A ko: “A ka di ne ye ka ne bolofɛnw bɛɛ di . . . ani ne yɛrɛ fana.” (2 Kɔr. 12:15) An kelen-kelen bɛɛ ka kan ka an yɛrɛ ɲininka ko: ‘Ne bɛ ka mun kɛ ni n ka waati ye, ni n fanga ye, ni n sekow ye ni n ka nafolow ye? Yala ne bɛ n yɛrɛ de ka nafa ɲinini na wa, walima ne bɛ k’a ɲini ka n ko diya Jehowa de ye?’
3 Cogo minnu b’an bolo ka nili kɛ: San o san, Ala ka jamakulu bɛ lɛrɛ miliyari kelen ni kɔ de kɛ waajuli la. O Masaya waajuli baara bɛ mɔgɔ caman kisi. Jɛkulu kɔnɔna na, denmisɛnw ni mɔgɔkɔrɔbaw bɛ baara suguya caman kɛ minnu bɛ mɔgɔ wɛrɛw nafa. Baara caman fana bɛ kɛ jamalajɛw la, ani kafoba ka jamalajɛw la, ani sow jɔli la ani sow ladonni na, minnu jɔra bato lakika ka ɲɛtaa kama. Dɛmɛ minnu kɛra kanuya kɔnɔ, balimakɛw fɛ minnu bɛ Comité de liaison hospitalier (CLH) ani Groupe de visite aux malades (GVM) la, aw kana ɲinɛ o fana kɔ. O yɛrɛ-di-baara minnu bɛɛ kɛra ni cɛsiri ye, olu nafa ka bon kosɛbɛ an ka balimaya la, Kretiɛnya sira la!—Zab. 110:3.
4 Cogo caman b’an bolo ka an yɛrɛ di ni kasaara dɔ kɛra walima ni ko cunna, min ka kan ka ɲɛnabɔ teliya la. Tuma caman na, an bɛ se dɔrɔn k’a ye ko an Kretiɛnɲɔgɔn mago bɛ dɛmɛ na, walima ko a mago bɛ kumaw na minnu bɛ dusu don a kɔnɔ. (Nt. 17:17) Ni an bɛ ka an yɛrɛ di walisa ka mɔgɔ wɛrɛw dɛmɛ ani ka baara kɛ walisa Masaya ka nafaw ka taa ɲɛ fɛ, an bɛ ka Yesu ka misali ladege. (Fil. 2:5-8) An ka an jija ka o kɛ tuma bɛɛ.