An k’a jira mɔgɔw la ko an bɛ u fɛ: An ka ɲininkaliw ni an ka lamɛnni fɛ
1 A ka di mɔgɔ caman ye k’u hakilinata fɔ, nka a ka go u ye ka mɔgɔ wɛrɛw lamɛn u k’u kɔrɔfɔ, walima k’u sɛgɛsɛgɛ. O la sa, an minnu ye Kerecɛn cidenyabaarakɛlaw ye, an ka kan ka fɛn min dege, o ye ka se ka mɔgɔw bila u ka kuma walisa k’u hakilinata dɔn, ɲininkaliw sababu fɛ.—Nt. 20:5.
2 An ka ɲininkaliw ka kan ka mɔgɔw bila ka miiri, u man kan ka mɔgɔw degun. Ni an balimakɛ dɔ bɛ waajuli kɛ du ni du, a bɛ to ka mɔgɔw ɲininka nin cogo la: “E fɛ, yala don bɛna na, don min na mɔgɔw bɛɛ bɛna ɲɔgɔn bonya, ka ɲɔgɔn danbɛ dɔn wa?” Ka kɛnyɛ ni o tigi ka jaabi ye, a bɛ t’a fɛ ko: “E bolo, walisa o ka kɛ, fo fɛn jumɛn ka kɛ?” walima a b’a fɔ “Mun na e bɛ miiri nin cogo la?” Ni an balimakɛ dɔ wɛrɛ fana bɛ senfɛ seereya kɛ ani ni a bɛ waajuli kɛ foroba yɔrɔw la, ni a ye mɔgɔw ye denw bɛ minnu bolo, a bɛ olu ɲininka nin cogo la: “Bangebagaya la, ko jumɛn de b’i nisɔndiya ka tɛmɛ a bɛɛ kan?” A bɛ tila k’o tigi ɲininka ko: “Mun de ye e haminanko bɛɛ la belebele ye?” A’ y’a kɔlɔsi ko nin ɲininkaliw bɛ mɔgɔw bila u k’u hakilinata fɔ, k’a sɔrɔ a ma kɛ degun ye u bolo. Kow cogoyaw tɛ kelen ye. O kosɔn an bɛ ɲininkali kɛ fɛn minnu kan, ani an bɛ o ɲininkali kɛ cogo min na, olu ka kan ka bɛn an ka waajulikɛyɔrɔ mɔgɔw magow ma.
3 An ka mɔgɔw bila u k’u hakilinata fɔ: Ni mɔgɔw sɔnna k’u hakilinata fɔ an ye, an k’an muɲu u kɔrɔ k’u lamɛn. An kana u ka kuma tigɛ fu. (Yak. 1:19) Sɔn u ka kuma fɔlen ma ni ɲumanya ye. (Kol. 4:6) I bɛ se k’a fɔ dɔrɔn: “O ka ɲi. A diyara ne ye i ka o fɔ ne ye. I ni ce.” I k’u tanu ni kɔnɔnajɛya ye, n’i bɛ se k’o kɛ. I ka ɲininkali wɛrɛw kɛ ni kanuya ye, walisa k’a dɔn u bɛ min miiri, ani mun na u bɛ miiri o cogo la. E n’i barokɛɲɔgɔn hakilinata ye kelen ye yɔrɔ minnu na, a ɲini k’olu dɔn. Ni i b’a fɛ k’u ɲɛsin Bibulu tɛmɛsira dɔ ma, i bɛ se k’a fɔ ko: “Yala i delila k’a miiri ko o bɛ se ka kɛ wa?” I kana kɛ mɔgɔ ye min b’i ban ka tɔw hakilinata jate, walima ka kɛ mɔgɔ ye min bɛ sɔsɔli kɛ.—2 Tim. 2:24, 25.
4 Mɔgɔw bɛ an ka ɲininkaliw jaabi cogo min na, o bɛ se ka bɔ tuma caman na an yɛrɛ ka mɔgɔ lamɛncogo la. Ni an bɛ u lamɛn n’an dusukun bɛɛ ye, o bɛ se ka u bila ka kuma. Lakɔlɔsibaga taamakɛla dɔ y’a kɔlɔsi ko “ni an bɛ muɲu mɔgɔw kɔrɔ k’u lamɛn, o ye ko barikama ye min bɛ se ka u sama an nɔfɛ. O ye cogo cɛɲi fana ye min b’a jira ko an bɛ u fɛ.” Ka mɔgɔ wɛrɛw lamɛn, o ye k’u bonya. O bɛ se k’u bila ka kibaru duman lamɛn, an b’a ɲinina ka o min fɔ u ye.—Rom. 12:10.