Gafe min tɔgɔ ye ko Qu’enseigne la Bible ? An ka baarakɛminɛn fɔlɔ Bibulu-kalan kama
1 An ka Kafoba ka jamalajɛ la, min tɔgɔ ye ko “An ka Ala kan minɛ,” an nisɔndiyara kosɛbɛ ka gafe kura sɔrɔ min tɔgɔ ye ko Qu’enseigne réellement la Bible ? (Bibulu bɛ mun fɔ tigitigi?) Mɔgɔ minnu nana Kafoba ka jamalajɛ la, olu nisɔndiyalen de ye u ka gafe sɔrɔ Sibiridon kalanbolodalen bannen kɔfɛ. An bɛna baara kɛ ni nin baarakɛminɛn kura ye cogo di? A dilanna walisa a ka kɛ an ka baarakɛminɛn fɔlɔ ye Bibulu-kalan kama. Siɲɛ fɔlɔ min na a bɛna kɛ sɛbɛn jirata ye, o bɛna kɛ Marisikalo de la. Nka, o n’a ta o ta, an bɛ dusu don weleweledalaw kɔnɔ u ka Bibulu-kalanw daminɛ ni a ye ani k’u ɲɛminɛ kabini sisan.
2 Bibulu-kalan minnu bɛ sen na: Weleweledala minnu bɛ ka Bibulu-kalanw ɲɛminɛ ni Dɔnniya gafe walima Wajibiya gafenin ye, olu ka kan ka jateminɛ kɛ kosɛbɛ walisa k’a dɔn tuma min na ani cogo min na u bɛna a daminɛ ka baara kɛ ni gafe kura ye kalan kɔnɔna na. Ni aw ye Bibulu-kalan daminɛ a ma mɛn, aw ka gafe kura ta, ka o daminɛ. Ni aw taara ɲɛ kosɛbɛ kalan na Dɔnniya gafe kɔnɔna na, aw bɛ kalansen min na, aw bɛ se ka tɛmɛ ni o kalansen kelen ye Qu’enseigne la Bible ? gafe kɔnɔ. Ni aw surunyara Dɔnniya gafe laban de la, aw bɛ se k’o kalan ka ban.
3 Siga t’a la ko an bɛɛ bɛ mɔgɔ caman dɔn minnu bɛna nafa sɔrɔ kalan kɛli la ni Qu’enseigne la Bible ? gafe ye. Mun na an tɛna a fɔ mɔgɔ kelen-kelen bɛɛ ye ko an bɛ se ka Bibulu-kalan kɛ u kun ni nin baarakɛminɛn ye min bɛ Bibulu ka tiɲɛkumaw dɔɔnin-dɔɔnin ɲɛfɔ? Misali la, mɔgɔ minnu ye Wajibiya gafenin walima Dɔnniya gafe kalan ka ban, nka u ma taa ɲɛ fo ka u yɛrɛbakun di Jehowa ma ani ka batise, olu bɛ se ka sɔn ka u ka kalan daminɛ kokura ni gafe kura ye. Bangebagaw bɛ se ka gafe kɛ baarakɛminɛn ye walisa k’u denw kalan u ka dɔnniya lakika sɔrɔ Ala sago kan.—Kol. 1:9, 10.
4 Gafe filanan kalan: Ni Bibulukalanden tilara Qu’enseigne réellement la Bible ? gafe kalan na, yala fɛɛrɛ tigɛra walisa a ka se ka gafe filanan kalan wa? Ɔwɔ. Ni a jɛlen don ko Bibulukalanden bɛ ka taa ɲɛ a ka kalan na, hali ni o ɲɛtaa ka suma, ani ni a jɛlen don fana ko a bɛ ka min kalan, a bɛ a ka waleɲumandɔn jira o ko la, Bibulu-kalan bɛ se ka t’a fɛ ni Adorez le seul vrai Dieu gafe ye. An dalen b’a la ko Qu’enseigne la Bible ? bɛna kɛ baarakɛminɛn barikama ye an bolo an ka baara la, n’o ye ka mɔgɔw kɛ kalandenw ye.—Mat. 28:19, 20.