An ka se hakilijakabɔ kɛcogo la mɔgɔw fɛ
1 Ciden Paul ye jɛmukan min kɛ Alabatoso kɔnɔ Antiose min bɛ Pisidi jamana na, o ye hakilijakabɔ kɛcogo misali ɲuman de ye. O jɛmukan ɲɛfɔlen bɛ Kɛwalew 13:16-41 kɔnɔ. Paul ye mɔgɔw bɔyɔrɔ ni u miiricogo jate, ka tila ka a ka kibaru duman ɲɛfɔcogo kɛ ka bɛn o ma. Ni an bɛ o ɲɛfɔli sɛgɛsɛgɛ, an k’a lajɛ an fana bɛ se ka o ɲɔgɔn kɛ cogo min na an ka cidenyabaara la.
2 An ka bɛnyɔrɔ ɲini: Hali ni Paul ka kuma tun sinsinnen bɛ Yesu jɔyɔrɔ kan min ka bon kosɛbɛ Ala sagonata kɛli la, Paul ma a ka kuma daminɛ ni o ye. A kumana fɛn kan, ale ni a lamɛnbagaw fanba tun bɛnnen bɛ min kan-Yahutuw ka tariku. (Kɛw. 13:16-22) O cogo kelen na, ni an bɛ bɛnyɔrɔ ɲini anw ni an lamɛnbagaw cɛ, o bɛna a to u b’u tulomajɔ an ka kumaw na. O cogo la, an bɛna se ka u dusukun sɔrɔ. Walisa an ka se ka o kɛ, fo an ka ɲininkaliw lase u ma ni bonya ye, walisa u k’u hakilinataw fɔ an ye, ani an ka kan k’ u lamɛn walisa k’a dɔn fɛn min nafa ka bon kosɛbɛ olu bolo.
3 Paul tun bɛ ka kuma tuma min na Yahutuw ka tariku kan, a ye a lamɛnbagaw hakili jigin Ala ka layidu la, ka Kisibaga dɔ lawuli Dawuda buruju la. Nka, Yahutu caman tun bɛ ka sɔrɔdasiba dɔ de makɔnɔ min tun bɛna u hɔrɔnya ka bɔ Romɛkaw ka fanga kɔrɔ ani ka Yahutuw ka siya kɔrɔta siya tɔw bɛɛ san fɛ. Siga t’a la, u tun b’a dɔn ko Yahutuw ka diinɛ ɲɛmɔgɔ minnu tun bɛ Jerusalɛm, olu tun banna Yesu la, ko u y’a don Romɛ kuntigiw bolo, ka a faga. O la sa, Paul tun bɛ se ka kɛ cogo di walisa u ka da a la ko o Yesu de ye Masiya ye min kofɔra?
4 An ka an ka ɲɛfɔli kɛcogo kɛ ka bɛn: Ikomi Paul tun bɛ a lamɛnbagaw miiricogo dɔn, a ye Sɛbɛnniw ta walisa ka hakilijakabɔ kɛ u fɛ. A ye a ka hakilijakabɔ sinsin fɛnw kan, a lamɛnbagaw tun sɔnna minnu ma kaban. Misali la, a ye kuma lana Yesu kan, k’a jira iko Dawuda bɔnsɔn, ani Yuhana batiselikɛla ye min jira. Mɔgɔ caman dun bɛ Yuhana batiselikɛla jate Ala ka kira ye. (Kɛw. 13:23-25) Paul y’a jira ko diinɛ ɲɛmɔgɔw banna Yesu la ani k’a faga minkɛ, u ye kiraw ka kuma dafa. (Kɛw. 13:26-28) A y’a ɲɛfɔ fana ko mɔgɔw bɛ yen minnu y’a ye u ɲɛ na, ko Yesu kununna ka bɔ suw cɛma. Sɛbɛnniw yɔrɔ minnu tiimɛna Yesu lakunnuni ko la, ni Yahutuw tun bɛ olu dɔn koɲuman, a ye olu fana jira u la.—Kɛw. 13:29-37.
5 Nka, tuma min na Paul tun bɛ ka kuma Gɛrɛkiw fɛ kiritigɛyɔrɔ la Areopage, Atɛnɛ dugu kɔnɔ, a nana ni a ka kuma ye sira wɛrɛ fɛ. (Kɛw. 17:22-31) A kumana fɛn kelen de kan, o bɛɛ n’a ta, jɛmukan fila bɛɛ la, a ka cɛsiriw nana ni kɔ ɲumanw ye. (Kɛw. 13:42, 43; 17:34) O cogo kelen na bi fana, ni an bɛ bɛnyɔrɔ ɲini anw ni an lamɛnbagaw cɛ, ani ni an bɛ an ka ɲɛfɔli kɛ ka bɛn u bɔyɔrɔ ni u miiricogo ma, an fana bɛna nɔ bɔ kosɛbɛ an ka cidenyabaara la.
[Questions]
1. An bɛna Bibulu kɔnɔ maana jumɛn sɛgɛsɛgɛ ani mun na?
2. Paul ka Jɛmukan daminɛcogo b’an kalan mun na?
3. Mun na a tun ka gɛlɛn Paul lamɛnbagaw bolo u ka sɔn a ma ko Yesu de ye Masiya ye min tun kofɔra?
4. Paul sera hakilijakabɔ kɛcogo la Yahutuw fɛ cogo jumɛn na?
5. (a) Paul tun bɛ ka kuma Gɛrɛkiw fɛ tuma min na, a y’a ka ɲɛfɔli kɛ ka bɛn cogo di? (b) An bɛ se ka Paul kɛcogo ladege cogo di ni an bɛ ka seereya kɛ an ka waajulikɛyɔrɔ la?