An ka Ala ka kuma fɔ ni jagɛlɛya ye ka t’a fɛ
1 An ye Kerecɛnw ye minnu bɛ waajuli kɛ. An b’a dɔn ko mɔgɔ bɛɛ tɛna sɔn an ka waajuli la. (Mat. 10:14) Hali ni mɔgɔ dɔw bɛna ban a la, o t’a to an ka kibaru duman fɔli dabila. (Nt. 29:25) Mun bɛna an dɛmɛ ka Ala ka kuma fɔ ni jagɛlɛya ye ka t’a fɛ ?
2 Ciden Paul tun ye nafaba don ‘Krista Yesu dɔnniya la, o min ka fisa kosɛbɛ.’ Ikomi “Paul tun bɛ o dɔn k’a jɛya, o kɔrɔ ye ko a tun dalen bɛ o la tigitigi,” o de ye Paul bila ka kuma. (Fil. 3:8; 1 Tes. 1:5) Paul tun bɛ cikan min fɔ a ka waajuli la, dɔw tun bɛ o filɛ kuma nafantan ye, ani fatɔkuma ye. Nka, Paul tun b’a dɔn k’o tun ye “Ala ka sebagaya ye ka dannabaga bɛɛ kisi.” (Rom. 1: 16) O kosɔn, hali mɔgɔw y’a kɛlɛ tuma min na, Paul ‘kumana ni jagɛlɛya ye, a jigi dalen Matigi kan.’—Kɛw. 14:1-7; 20:18-21, 24.
3 An ka fanga bɔyɔrɔ: Ni Paul tun bɛ waajuli kɛ ni jagɛlɛya ye, a ma o kɛ ni a yɛrɛ fanga ye. A tun bɛ kumana ale yɛrɛ ni Silasi kan tuma min na, Paul y’a sɛbɛn ko:‘... an tɔɔrɔla ka lagosi Filipe, nka o kɔ, Ala ye an jagɛlɛya ka a ka kibaru duman fɔ aw ye, hali k’a sɔrɔ mɔgɔw tun b’a fɛ ka an bali.’ (1 Tes. 2:2; Kɛw. 16:12, 37) K’a to kaso la fana Romɛ, Paul y’a ɲini mɔgɔ wɛrɛw fɛ u ka Ala deli a ye, walisa a ‘jagɛlɛyalen ka kuma, iko a ka kan ka o kɛ cogo min na,’ kibaru duman ko la. (Efe. 6: 18-20) Sanni Paul ka dannaya da a yɛrɛ kan, a y’a ka dannaya da Jehowa kan. O de y’a to a sera ka Ala ka kuma fɔ ni jagɛlɛya ye.—2 Kɔr. 4:7; Fil. 4: 13).
4 A bɛ ten bi fana. An balimakɛ dɔ y’a ye ko a tun ka gɛlɛn a ma, k’a jira a ka baarakɛyɔrɔ la, ko a ye Jehowa Seere ye, ani ka senfɛ seereya kɛ. A ye Jehowa deli o kow la, ka seereya daminɛ. A baarakɛɲɔgɔn dɔ tun ma sɔn a ka seereya la a daminɛ na, nka an balimakɛ y’a fɔ a ye tuma min na ko suw bɛna kunun, o nana laban Bibulu-kalan na. K’a ta o ma sa, ni an balimakɛ tun ye mɔgɔ o mɔgɔ ye, a bɛ se ka min waaju, a tun bɛ seereya kɛ o ye. An balimakɛ yɛlɛmara baarakɛyɔrɔ wɛrɛ la. O yɔrɔ la yen fana, san 14 kɔnɔ, a ye mɔgɔ 34 dɛmɛ u ka batise. An bɛ se ka da a la ko Jehowa bɛna dɔ fara an fana fanga kan o cogo kelen na, walisa an ‘jagɛlɛyalen ka a ka kuma fɔ’ ka t’a fɛ.—Kɛw. 4:29.