Hakilijigin waati: Baara caman kɛwaati
1 Lawale la, waati pereperelatigɛlenw na san kɔnɔ, Israɛldenw tun bɛ ‘Jehowa ka seliw kɛ.’ (Lev. 23:2) Ni Israɛldenw tun bɛ waati ta ka miiri u ka Ala ka ɲumanya la, o tun bɛ nisɔndiya lase u ma, ka u bila u ka u jija bato senuma la.—Til. 30:21–31:2.
2 An tile la, an bɛ nisɔndiya baara min kɛ ala-ka-marako ta fan fɛ, o bɛ bonya kosɛbɛ san o san Hakilijigin waati la. O ye waati ye min kɔnɔna na, an bɛ miiri kosɛbɛ fɛn sɔngɔba la, Jehowa ye min di an ma—a denkɛ bangelen kelenpe. (Yuh. 3:16; 1 Pi. 1:18, 19) Ala ni a Denkɛ ye kanuya min jira, n’an bɛ taasi o la, o b’an bila ka Jehowa tanu, ka an jija walisa ka a sago kɛ.—2 Kɔr. 5:14, 15.
3 Ɲinan Matigi ka surɔfana bɛna kɛ Alamisadon na, Marisakolo tile 24, tile bilen kɔ fɛ. An bɛ se ka dɔ fara an ka kɛta kan cidenyabaara la cogo di Marisi, Awirili ni Mɛ kalow la?
4 An ka seereya kɛ mɔgɔ caman ye: N’an bɛ foro baara la, an ka siraw ɲini ka seereya kɛ mɔgɔ caman ye. Yala an bɛ se k’a boloda ka an sen don da-ni-da baara la, waati min na mɔgɔ caman bɛ u ka so wa, i na a fɔ wulada sumanin fɛ walima fitiri fɛ? Ni i ka gafe kalan kulu kɔnɔmɔgɔ dɔw b’a fɛ ka waajuli kɛ sanni gafe kalan ka daminɛ, gafe kalan lakɔlɔsibaga bɛ se ka baara ka lajɛ surun dɔ labɛn o don na walisa aw ka baara kɛ waajulikɛyɔrɔ la min ka surun gafe kalan kɛyɔrɔ la.
5 An bɛ se ka seereya kɛ mɔgɔ caman ye sira min fana fɛ, o ye ka seereya kɛ foroba-yɔrɔw la. Japɔn jamana na, an balimamuso dɔ tun b’a fɛ ka kɛ tutigɛbaga farankan ye nka a tun bɛ waati dafalen baara la. Maakɔrɔ dɔ y’a fɔ a ye ko a bɛ se ka nbɛda seereya kɛ tɛrɛn gari kɛrɛ fɛ don o don sanni a ka taa a ka dahirimɛɲini baara la. A kɛlen kɔ ka a ka maloya ni tɛrɛntabaga dɔw ka ɲagaribɔ kunnasagon, a ye mɔgɔ 40 ɲɔgɔn sɔrɔ a tun bɛ sɔn-ni-sɔn gafeninw di minnu ma tuma bɛɛ. Tɛrɛntabagaw ani gari baarakɛlaw ani bitikitigi minnu bɛ tɛrɛngari kɛrɛ fɛ, olu tun bɛ o mɔgɔ 40 na. A tun bɛ sɔn-ni-sɔn gafenin 235 di mɔgɔw ma kalo o kalo. A kɛtɔ ka Bibulu kɔnɔkuma dɔw ɲɛfɔ miniti damadɔw dɔrɔn kɔnɔ, a sera ka Bibulu-kalan 6 daminɛ.
6 Waati ɲuman minnu bɛ yen walisa ka seereya kɛ: Weleweledala caman minnu bɛ taa lakɔli la, kalanbila waatiw bɛ olu bolo san kɔnɔ. O kalanbila waatiw bɛ se ka kɛ waati ɲumanw ye walisa ka kɛ tutigɛbaga farankan ye. Ka fara o kan, Kerecɛn denmisɛnw bɛ se ka dɔ fara u ka kɛta kan ni u bɛ seereya kɛ lakɔli la. A bɛ se ka bala i la ko i ka kalasi kɔnɔmɔgɔw b’a fɛ kosɛbɛ ka i ka dannakow dɔn. Baro minnu bɛ ɲɛminɛ kalasi kɔnɔ, walima lakɔlibaara minnu bɛ di i ma k’a kɛ, mun na i tɛna o kow kɛ sababu ye walisa ka seereya kɛ? Kerecɛn denmisɛn dɔw ye baara kɛ ni Jehowa Seerew ka videyow ye walisa ka seereya kɛ. Dɔ wɛrɛw ye Bibulu-kalanw daminɛ u ka kalasi kɔnɔmɔgɔw kun, k’u dɛmɛ ka taa ɲɛ fo ka se yɛrɛbakun dili ni batɛmu ma. Ninnu bɛɛ ye cogo ɲumanw ye walisa ka ‘Jehowa tɔgɔ tanu.’—Zab. 148:12, 13.
7 I ka don o don kow senfɛ, cogo caman ɲini walisa ka kuma mɔgɔw fɛ an ka dakabana Ala ni a ka layidu ɲumanw kan. An balimakɛ dɔ tun bɛ tɛrɛn sugu kelenw ta don o don. Ni a tun bɛnnen don tuma o tuma, a tun bɛ seereya kɛ tɛrɛn kɔnɔmɔgɔw ye. Misali la, ni a tun bɛ a ka tɛrɛn nali makɔnɔ, a tun bɛ seereya kɛ tuma bɛɛ kamalennin dɔ ye miniti duuru kɔnɔ. Mun bɔra o la? Kamalennin ni a baarakɛɲɔgɔn sɔnna ka Bibulu kalan kɛ. O kalan tun bɛ kɛ tɛrɛn kɔnɔ u ka taama kɔnɔna na. Waatinin o kɔ fɛ, musokɔrɔba dɔ min tun ye u ka barow lamɛn, o gɛrɛla an balimakɛ la ka Bibulu-kalan ɲini a fɛ. Musokɔrɔba bɛ tɛrɛn ta don minnu na, ale fana ka kalan tun bɛ kɛ o donw na. O cogo la, an balimakɛ ye Bibulu kalan kɛ mɔgɔ tan kun tɛrɛn kɔnɔ.
8 Ni i kɔrɔla, walima ni i tɛ kɛnɛbagatɔ ye, o bɛ dan sigi i ka kɛta la. I dun bɛ se ka mun kɛ o la sa? Cogo caman bɛ yen hali sa, cogo minnu fɛ i bɛ se ka dɔ fara i ka kɛta kan Jehowa tanuli la. Yala i y’a lajɛ ka seereya kɛ telefɔni fɛ wa? Ni i dalen tɛ a la ko i bɛ se o kɛcogo la, o fɔ i ka gafe kalan lakɔlɔsibaga ye. A bɛ se ka fɛɛrɛ tigɛ walisa weleweledala minnu bɛ seereya kɛ telefɔni fɛ, olu ka baara kɛ ni i ye. Ni e ni mɔgɔ dɔ bɛ baara kɛ ɲɔgɔn fɛ, i bɛ fɛn dege a fɛ, a fana bɛ fɛn dege i fɛ. Aw bɛ ɲɔgɔn dɛmɛ fana ka seereya kɛ min bɛ nɔ bɔ. Mɔgɔ bɛ se ka seereya kɛ ka ɲɛ cogo min na telefɔni fɛ, o kunnafoni ɲuman dilenw bɛ san 2001 Feburuyekalo An ka masaya cidenyabaara kɔnɔ, a ɲɛw 5-6.
9 Ka na Hakilijigin na, o bɛ se ka dusu don mɔgɔ kuraw kɔnɔ u ka a ŋaniya ka dɔ fara u ka tanuli kan Jehowa ye. U bɛ se ka siran o siran sɔrɔ waajuli baara kɛcogo kɔrɔ la, i bɛ se ka u dɛmɛ ka o siranw kunnasagon ni i b’a fɔ u ye ko ɲuman minnu kɛra foro baara la ani ni i b’u dege dɔɔnin-dɔɔnin u ka Bibulu kalansiraw ɲɛfɔ, ka u ka dannaya fana lafasa. (1 Pi. 3:15) Ni Bibulu kalanden dɔ y’a jira ko a b’a fɛ ka kibaru duman waajuli daminɛ, an ka o fɔ lakɔlɔsibaga ɲɛmɔgɔ ye. A bɛna fɛɛrɛ tigɛ ka ɲɔgɔn ye dɔ sigi sen kan ni kalanden ye walisa k’a jateminɛ ni kalanden bɛ mankutuw dafa ka se ka waajuli kɛ ni jɛkulu ye kɛnɛkan cidenyabaara la. Jehowa ka a ye ko mɔgɔ kura dɔ ye a latigɛ ka ale ka masabaya kɔkɔrɔdon, n’o ye a ka masabaya ye dunuya bɛɛ kunna, a jɛlen don ko o ka kan ka a nisɔndiya kosɛbɛ.—Nt. 27:11.
10 I bɛ se ka kɛ tutigɛbaga farankan ye wa? Lɛrɛ 50 minnu wajibiyalen bɛ walisa ka kɛ tutigɛbaga farankan ye, i ka kan ka o jateminɛ sɛbɛ la. (Mat. 5:37) O kɔrɔ ye ko i ka kan ka lɛrɛ 12 kɛ dɔgɔkun o dɔgɔkun foro baara la. Tutigɛbaga farankan ka waati bolodacogo minnu bɛ ɲɛ 5nan na, yala o dɔ la kelen bɛ bɛn i ma wa? Ni a si tɛ bɛn i ma, yala i bɛ se ka waati bolodacogo dɔ kɛ min b’a to i ka kɛ tutigɛbaga farankan ye Marisikalo, Awirilikalo walima Mɛkalo la wa? Jehowa deli a ka barika don i ka cɛsiriw la walisa ka dɔ fara i ka kɛta kan waajuli baara la.—Nt. 16:3.
11 Maakɔrɔw ni cidenyabaara magannaw bɛna i kɔkɔrɔdon kosɛbɛ i ka cɛsiriw la walisa ka nin Hakilijigin waati kɛ tanuli kɛrɛnkɛrɛnnen ye Jehowa ma. A ka c’a la, u caman bɛna kɛ tutigɛbaga farankanw ye. Maakɔrɔw bɛna fɛɛrɛw tigɛ walisa foro baara lajɛ wɛrɛw ka kɛ i na a fɔ wulada sumani fɛ baarakɛdonw na, ani dɔgɔkun don labanw na, ni o ka kan. Walisa k’a dɔn yɔrɔ jumɛn ani tuma jumɛn na o lajɛw bɛna kɛ, ani jɔni bɛna o lajɛw ɲɛminɛ, maakɔrɔw bɛna kuma o ko kan ni mɔgɔw ye minnu ye u ka kow labɛn walisa ka kɛ tutigɛbaga farankan ye, walima minnu bɛ k’a jateminɛ ka o kɛ. Maakɔrɔw bɛna u jija ka kow labɛn walisa weleweledala wɛrɛw ka baara kɛ ni i ye, i y’a boloda ka waajuli kɛ donw ani waati minnu na. O cogo la, ko labɛnnenw bɛ se ka sinsin koɲuman, baara ɲuman caman fana bɛ se ka kɛ.—Nt. 20:18.
12 I seko damajira kɛ: Ni i ka cogoya t’a to i ka kɛ tutigɛbaga farankan ye, i hakili to a la ko an bɛ cɛsiriw ni kaariyako minnu kɛ, Jehowa bɛ sɔn olu la ‘ka kɛnyɛ min b’an bolo, a tɛ o kɛ ka kɛnyɛ min t’an bolo.’ (2 Kɔr. 8:12) An bɛ se ka barika da Jehowa ye fɛn minnu ko la, olu ka ca kosɛbɛ. Dawuda jo don k’a sɛbɛn ko: ‘Ne bɛ barika da Jehowa ye tuma bɛɛ. Ne da na a tanuli donkili da tuma bɛɛ.’ (Zab. 34:1) O fana ka kɛ an ŋaniya ye Hakilijigin waati la.
[Study Questions]
1. Seli minnu tun bɛ kɛ san kɔnɔ, olu tun bɛ nɔ jumɛn bila Israɛldenw na minnu tun bɛ siran Ala ɲɛ?
2, 3. Hakilijigin waati la, mun na a bɛnnen don an ka dɔ fara an ka baara kɛta kan alako ta fan fɛ? An bɛna Hakilijigin kɛ don jumɛn na?
4, 5. a) Mun ye dɔw dɛmɛ u ka se ka kibaru duman fɔ mɔgɔ caman ye? b) I y’a ye ko kɛcogo jumɛn bɛ tɔnɔ bɔ i ka waajulikɛyɔrɔ la?
6. Denmisɛnw bɛ se ka dɔ fara u ka Alako-baara kan cogo di?
7. a) An balimakɛ dɔ ye waati ɲuman jumɛnw sɔrɔ walisa ka seereya kɛ? b) Yala i ye o nisɔndiya sugu fana sɔrɔ wa?
8. Mɔgɔ minnu kɔrɔla walima minnu tɛ kɛnɛbagatɔw ye, olu bɛ se ka dɔ fara u ka kɛta kan cidenyabaara la cogo jumɛn fɛ?
9. An bɛ se ka Bibulu kalandenw dɛmɛ cogo di walisa u ka mankutuw dafa ka se ka waajuli kɛ ni jɛkulu ye kɛnɛkan cidenyabaara la?
10. a) Waati bolodacogo ɲuman bɛ se ka an dɛmɛ ka kɛ tutigɛbaga farankan ye cogo di? b) Yala salon i sera ka kɛ tutigɛbaga farankan ye Hakilijigin waati la wa? Cogo di?
11. Mɔgɔ minnu bɛna kɛ tutigɛbaga farankanw ye, maakɔrɔw ni cidenyabaara magannaw bɛ se ka olu kɔkɔrɔdon cogo di?
12. Mun b’an bila ka Jehowa tanu tuma bɛɛ?
[Box on page 3]
An bɛ se ka dɔ fara an ka kɛta kan cogo jumɛn na?
◼ Waajuli kɛ tuma min na mɔgɔw bɛ u ka so
◼ Seereya kɛ foroba-yɔrɔw la
◼ Seereya kɛ baarakɛyɔrɔ la walima lakɔli la?
◼ Seereya kɛ telefɔni fɛ
◼ Kɛ tutigɛbaga farankan ye
[Chart on page 5]
Tutigɛbaga Farankan ka Waati Bolodacogo dɔw: Sira minnu fɛ lɛrɛ 12 bɛ boloda dɔgɔkun kɔnɔ foro la
Sɔgɔma—Ntɛnɛn Fo Sibiri
Don wɛrɛ bɛ se ka bila kari nɔ la
Don Waati Lɛrɛw
Ntɛnɛn Sɔgɔma 2
Tarata Sɔgɔma 2
Araba Sɔgɔma 2
Alamisa Sɔgɔma 2
Juma Sɔgɔma 2
Sibiri Sɔgɔma 2
Lɛrɛw Mumɛ: 12
Tile Fila Dafalen
Dɔgɔkun tile fila bɛ sugandi (Ka kɛnyɛ ni don sugandilenw ye, nin bolodacogo lɛrɛ mumɛ bɛ bɛn 48 ma dɔgɔkun kɔnɔ)
Don Waati Lɛrɛw
Araba Tile Kuuru 6
Sibiri Tile Kuuru 6
Lɛrɛw Mumɛ: 12
Wuladanin Fila ani Dɔgɔkun Don Labanw
Wuladanin fila bɛ sugandi
Don Waati Lɛrɛw
Ntɛnɛn Wuladanin 1 1⁄2
Araba Wuladanin 1 1⁄2
Sibiri Tile Kuuru 6
Kari Tile Tilancɛ 3
Lɛrɛw Mumɛ: 12
Tilefɛla Saba ani Sibiri
Don wɛrɛ bɛ se ka bila kari nɔ la
Don Waati Lɛrɛw
Ntɛnɛn Tilefɛla 2
Araba Tilefɛla 2
Juma Tilefɛla 2
Sibiri Tile Kuuru 6
Lɛrɛw Mumɛ: 12
Ne Yɛrɛ ka Waati Bolodacogo
Waati kelen-kelen lɛrɛ hakɛ dantigɛ
Don Waati Lɛrɛw
Ntɛnɛn
Tarata
Araba
Alamisa
Juma
Sibiri
Kari
Lɛrɛw Mumɛ: 12