An ka baara ɲuman kɛ ni Bibulu ye

¹ An mana sɛbɛn o sɛbɛn jira an waajulikɛtɔ, a nafa ka bon an ka Bibulu tɛmɛsira ta ka kalan, min bɛ an lamɛnbagaw bila u ka miiri. (Heb. 4:​12) An ka sɛbɛn jirata kumana Bibulu tɛmɛsira min kan, ni an bɛ o ta ka kuma ni o ye, o bɛ na an dɛmɛ ka an ka baro ɲɛsin sɛbɛn ma. Yɔrɔ dɔw la, weleweledalaw y’a ye ko a ka fisa u ka Bibulu minɛ u tɛgɛ kɔnɔ ni u bɛ ka gɛrɛ mɔgɔ dɔ la walima ni u bɛ ka waajuli kɛ so ni so.

² A daminɛ ni Bibulu tɛmɛsira dɔ ye: Weleweledala dɔw bɛ u ka sɛbɛnjirali daminɛ ni ɲininkali ye. U bɛ ɲininkali dɔ lawuli Bibulu kɔnɔkuma dɔ kan walisa ka u kumaɲɔgɔn hakilinata dɔn. O kɔ u bɛ sɔrɔ ka Bibulu tɛmɛsira kalan. O bɛ mɔgɔw ɲɛsin Ala ka kuma ma teliya la. An bɛ kuma minnu fɔ ka sɔrɔ ka sɛbɛn jira olu dɔw filɛ. Yala a dɔw bɛ se ka nɔ bɔ aw ka waajulikɛyɔrɔ la wa?

◼ “Ni a se tun bɛ e ye ka yɛlɛma ninnu kɛ, yala e tun na sɔn ka o kɛ wa ?” Jirali 21:4 kalan.

◼ “Mun na an bɛ ka ɲɛnamaya kɛ nin ɲɔgɔn waati gɛlɛnw kɔnɔ?” 2 Timote 3:​1-5 kalan.

◼ “Yala e ka miiri la an ka sigida bɛ ɲɛ ka tɛmɛ nin kan ni an bɛɛ kelen-kelen tugura nin laadilikan kɔ wa?” Matiyu 7:​12 kalan.

◼ “Ɲɛnamaya kɛcogo min ɲɛfɔlen bɛ yan, e miiri la ko i denw na se ka o sɔrɔ wa?” Zaburuw 37:10, 11 kalan.

◼ “E ka miiri la nin kumaw na kɛ tiɲɛ ye don dɔ la wa? Esayi 33:24 kalan.

◼ “Gɔfɛrɛnaman yɛlɛmalikuma min fɔlen bɛ yan, yala e bɛ o dɔn ka kɔrɔ wa?” Daniɛl 2:​44 kalan.

◼ “Yala a nege ma deli ka don e la ka Ala ɲininka nin na wa?” Job 21:7 kalan.

◼ An ka mɔgɔ kanulen minnu sara, yala an bɛ se ka olu ye kokura wa?” Yuhana 5:​28, 29 kalan.

◼ “Yala suw bɛ ɲɛnamaw ka ko kɛtaw kala ma wa?” Waajulikɛla (Eklesiaste) 9:5 kalan.

³ Ɲɛfɔli kɛ, misali di, a waleyacogo jira: Ni mɔgɔ dɔ bɛ a fɛ ka baro kɛ ni i ye, i kana kɔrɔtɔ, i kana girin ka tɛmɛ ni baro ye. I ye Bibulu tɛmɛsira min kalan a tigi ye, i ka waati ta ka ɲɛfɔli kɛ o kan, i ka misali di o kan, i ka a jira o ko bɛ waleya cogoya min na ɲɛnamaya kɔnɔ walisa i lamɛnbaga ka a faamu. (Neh. 8:8) Ala ka kuma bɛ mɔgɔw kalan fɛn minnu na, ni mɔgɔw ye olu faamu, ka sɔn olu la, o bɛ se ka dakabana yɛlɛmaliw don u ka ɲɛnamaya la.​—1 Tes. 2:​13.

⁴ An ka taga a fɛ ka baara ɲuman kɛ ni Bibulu ye, ni an bɛ ka mɔgɔw dɛmɛ, kibaru duman ka di minnu ye. An bɛ se ka baara kɛ ni nin fɛɛrɛ kelen ye, ni an bɛ segin ka taa bɔ mɔgɔw ye: (1) Bibulu tɛmɛsira dɔ ɲɛnatɔmɔ. (2) Ɲininkali nɔgɔman kelen lawuli o tɛmɛsira kan. O kɔ, i ka sɔrɔ ka tɛmɛsira kalan. (3) Ɲɛfɔli kɛ, misali di, ani a jira i bɛ kumana min kan o bɛ se ka waleya cogo min na. I mana taa bɔ a tigi ye waati o waati, Ala ka Kuma dɔnniya min bɛ a tigi la, i jija ka dɔ fara o kan. A tɛna mɛn, o bɛ kɛ Bibulu kalan ye i bolo!

[Study Questions]

1. An bɛ se ka mun kɛ walisa ka an yɛrɛ labɛn waajuli kama?

2. (a) An bɛ se ka an ka sɛbɛnjirali daminɛ ni Bibulu tɛmɛsira dɔ ye cogo di? (b) Barokun jumɛnw bɛ Bibulu kɔnɔ ni olu ka di mɔgɔw ye waajulikɛyɔrɔ la?

3. An bɛ Bibulu tɛmɛsira minnu kalan, an bɛ se ka mɔgɔw dɛmɛ u ka se ka olu faamu cogo di?

4. Ni an seginna ka taa bɔ mɔgɔw ye, an bɛ se ka baara ɲuman kɛ ni Bibulu ye cogo di?