École de formation ministérielle—dondaba dɔ dayɛlɛlen baara kama
1 Jehowa ye a ka kira Jeremi bila ka nin kirayakuma fɔ ko: ‘Ne na Sagagɛnnaw bila [ne ka baarakɛlaw] kunna minnu na [ne ka baarakɛlaw] balo. Ne ka baarakɛlaw tɛna siran tun, u ja tɛna tigɛ tun, hali kelen tɛna u jɛ.’ (Jer. 23:4) Sagagɛnnaw ka o baara bɛ ka kɛ bi, siyaw bɛɛ la. O baara bɛ ka kɛ jɛkulu maakɔrɔ fɛ minnu hakɛ bɛ ba tan sigiyɔrɔma caman bɔ. Ka fara o kan, kamalennin caman i n’a fɔ ngomi, nana u yɛrɛma walisa ka baara kɛ Jehowa ye. (Zab. 110:3) O balimakɛ majigilenw ye dugawuba ye Ala ka jamakulu bolo dɛ! Ikomi Ala sira fɛ, mɔgɔw dalajɛli baara bɛ ka taga a fɛ, halisa a magoba bɛ yen, cɛ minnu bɛ baara ɲɛdɔn, olu ka u yɛrɛ to u balimakɛw ka bila la walisa ka baara kɛ u ye.
2 Muso tɛ maakɔrɔw ni cidenyabaara maganna minnu bolo, walisa ka olu kalan u ka se ka dɔ fara u ka baara kɛtaw kan, ko ɲuman min sigira o kama, o ye École de formation ministérielle ye. Kabini o lakɔli daminɛna san 1987, balimakɛ minnu ye o kalan kɛ, olu ka ca ni 22 000 ye. U bɔra jamana 140 na. U tun ye klasi 999 ye. Lakɔli kɛra o balimakɛw bolo ‘dondaba dɔ dayɛlɛlen ye baara kama.’—1Kɔr. 16:9.
3 Lakɔli kɛra kun min na: Cɛ minnu bɛ baara ɲɛdɔn, École de formation ministérielle kun ye ka olu kalan, ka olu labɛn walisa dɔ ka se ka fara u ka baara kɛtaw kan, jɛkuluba mago mana kɛ u la yɔrɔ o yɔrɔ la. Lakɔli bɛ dɔ fara u sekow kan walisa u ka kibaru duman waajulibaara ɲɛminɛ, u ka u ta kɛ jɛkulu mɔgɔw ladonni baara la, ani ka jɛkulu mɔgɔw kalan. U kɛlen kɔ ka diplomu sɔrɔ, lakɔliden dɔw bɛ kɛ tutigɛbaga kɛrɛnkɛrɛnnenw ye, walima u bɛ kɛ kafo lakɔlɔsibagaw ye u ka jamana na, walima jamana wɛrɛw la. Dɔw bɛ bila baara la u yɛrɛw ka jɛkuluw kɔnɔ, walima Tɔn bolofara ka waajulikɛyɔrɔ la, u magoba bɛ yɔrɔ minnu na.
4 U ka dɔgɔkun segin (8) kalan kɔnɔna na, lakɔlidenw bɛ kalan gɛlɛn daminɛ Bibulu kan. U bɛ Bibulu kalansira caman sɛgɛsɛgɛ kosɛbɛ. Ikomi maakɔrɔw bɛ u mago don jɛkulu kɔnɔmɔgɔw la, u bɛ kunnafoni sɔrɔ u ka baara bɛɛ lajɛlenw kan. Kunko bɛ ɲɛnabɔ cogo min na Kerecɛn ka ɲɛnamaya kɔnɔ, o ɲɛnabɔsiraw bɛ jira u la. Sɛbɛnniw bɛ min fɔ ɲɛmɔgɔya kɛcogo la, kiritigɛcogo la, kow kɛcogo la jɛkuluba kɔnɔ, u bɛ kalan olu la fana. Forobajɛmu bɛ kɛ cogo min na, u bɛ kalan kɛrɛnkɛrɛnnenya la o la. Dɛmɛ bɛ di u kelen-kelen bɛɛ ma walisa dɔ ka fara u ka ɲɛtaa kan teliya la, Ala sira la.
5 Fɛn minnu wajibiyalenw bɛ: A bɛ faamu ko fɛn minnu wajibiyalenw don walisa ka se ka don lakɔli la, bɛɛ tɛ se k’olu dafa. Mɔgɔ minnu b’a fɛ k’o lakɔli kɛ, olu ka kan ka kɛ maakɔrɔw ye walima cidenyabaara magannaw ye san fila ka tugu ɲɔgɔn na. San fila ye o dɔgɔyalenba ye. U ka kan ka kɛ mɔgɔw ye muso tɛ minnu bolo. U si hakɛ ka kan ka kɛ san 23 ni san 50 cɛ. Kalan bɛ kɛ kan min na, u ka kan ka se ka sɛbɛnni kalan o kan na, ka sɛbɛnni kɛ o kan na, ani ka o kan fɔ nɔgɔya la. U ka kan ka kɛ mɔgɔ kɛnɛbagatɔw ye minnu mago tɛ furakɛli kɛrɛnkɛrɛnnen walima dumuni kɛrɛnkɛrɛnnen na. Tutigɛbaga basigilenw fɔlɔ de bɛ ta.
6 Minnu bɛ na u yɛrɛma walisa ka lakɔli kɛ, mɔgɔ mago mana kɛ u la yɔrɔ o yɔrɔ la, u ka kan ka sɔn, ani u ka kan ka se ka taa o yɔrɔ la. Kira Esayi hakilila ɲɔgɔn ka kan ka kɛ u la, ale min sɔnna ka a yɛrɛ jira walisa ka baara kɛrɛnkɛrɛnnen kɛ. A ko: ‘Ne filɛ, i ka ne ci.’ (Esa. 6:8) Esayi ye majigilenya fana jira a ka ɲɛnamaya kɔnɔna bɛɛ la. Minnu bɛ u tɔgɔ di walisa ka École de formation ministérielle kɛ, kanuya min bɛ u la ka ɲɛsin u balimakɛw ma, ani ŋaniya min bɛ u la ka baara kɛ u ye, o kow de ka kan k’u bila ka lakɔli kɛ. K’a ɲini k’u yɛrɛ bila tɔw san fɛ, o tɛna kɛ ŋaniya ye min bɛ u bila ka lakɔli kɛ. Nin kalan ɲuman sugu kɔ fɛ, lakɔliden minnu ye diplomu sɔrɔ, mɔgɔ bɛ sigi ni a ye ko u ye fɛn minnu kalan, u ka olu waleya, mɔgɔ wɛrɛw ka nafa kama.—Luka 12:48.
7 Lakɔli nafaw: Dɔgɔkun segin (8) kalan gɛlɛn kɔnɔna, lakɔliden minnu ye diplomu sɔrɔ, olu ‘balola dannaya ani kalan ɲuman kuma fɛ.’ (1 Tim. 4:6) O ye lakɔlidenw kɛ mɔgɔw ye minnu bɛ se sisan ka mɔgɔw dɛmɛ, ka dusu don mɔgɔw kɔnɔ. O la sa, u bilara ka taa jɛkuluw ni kafo minnu na, u bɛ se ka o baara kɛ yen. Balimakɛ minnu ye École de formation ministérielle diplomu sɔrɔ, olu bilara ka taa yɔrɔ minnu na, o yɔrɔ caman na, forobaara yiriwara, dusu donna balimaw kɔnɔ janko denmisɛnw, walisa u ka tutigɛbagaya baara kɛ, ani mɔgɔ kura minnu bɛ na ka fara Ala ka jamakulu kan, mago kɛrɛnkɛrɛnnen donna olu la kosɛbɛ fana.
8 Yala i ye maakɔrɔ walima cidenyabaara maganna ye, muso tɛ min bolo ani min si bɛ san 23 ni san 50 cɛ wa? Mun na i tɛna a lajɛ ni i bɛ se k’i tɔgɔ di walisa ka École de formation ministérielle kɛ? Yala i ye balimakɛ ye min ye denmisɛn ye, min bɛ ka miiri kosɛbɛ a bɛna fɛn minnu kɛ kɔ fɛ Jehowa ka baara la wa? Mun na i tɛna i ka ɲɛnamaya kɛcogo nɔgɔyalen to i yɛrɛ bolo, ni ɲɛmajɔ ye, walisa i ka se ka don ‘dondaba dɔ fɛ min dayɛlɛla baara kama’? O bɛ se ka i ka nisɔndiya ni i ka wasa bonya kosɛbɛ. Tiɲɛ na, École de formation ministérielle kɛra dugawu ye balimakɛw bolo minnu bɔra o lakɔli la, nka a kɛra fana dugawu ye Ala ka jamakulu kɔnɔ, diɲɛ yɔrɔ bɛɛ la.
[Box on page 3]
U ye nafa minnu sɔrɔ kalan na
“Kalan ye dɔ fara kosɛbɛ ne ka cidenyabaara kɛcogo kan ani ne seko kan ka se ka n mago don jɛkulu kɔnɔmɔgɔw la ni hakilitigiya ye, ne kɛtɔ ka baara kɛ ni Bibulu ye.”
“Lakɔli ye ne dɛmɛ ne ka se ka baara sifa caman kɛ jɛkulu kɔnɔ ni hakililatigɛba ye.”
“A ye fɛnw bɛɛ yɛlɛma ne ka ɲɛnamaya kɛcogo la. Ne tun bɛ min miiri Ala-ka-marako ko la, ani Ala ka jamakulu ko la, a ye o fana yɛlɛma.”
“Lakɔli ye ne kalan min na, o ye ne dɛmɛ kosɛbɛ k’a dɔn nafa min b’a la ne ka n yɛrɛ to mɔgɔ wɛrɛw ka bila la walisa mɔgɔ mago bɛ se ka kɛ ne na yɔrɔ o yɔrɔ. Ne ka se ka taa baara kɛ yen.