Jɛkulu ka gafe-kalan—Kun min na an mago bɛ o la
1 Jehowa seerew tun bɛ wele fɔlɔfɔlɔ ko Bibulu kalandenw. San 1895 la, o Bibulu Kalandenw ka kalankɛ-kuluw tɔgɔ dara ko Cercles de l’aurore pour l’étude de la Bible. O kalankɛ-kuluw tun bɛ L’Aurore du Millénium kitabuw de kalan. Kɔ fɛ o lajɛw tɔgɔ nana da ko Cercles béréens pour l’étude de la Bible. (Kɛw. 17:11) Tuma caman na mɔgɔ kulu fitinin bɛ ɲɔgɔn dalajɛ du dɔ kɔnɔ wulada waati dɔ la min bɛnnen bɛ u bɛɛ ma. O lajɛw kɛra jɛkulu ka gafe-kalan ɲɛbila ye.
2 Dusudon-n-kɔnɔ ani dɛmɛ: A dabɔra a kama ka jɛkulu ka gafe-kalan-kuluw kɛ fitininw ye. O b’a to lajɛnabagaw ka u ka ɲɛfɔliw kɛ, ka u ka limaniya jira kɛnɛ kan o cogo la. O bɛ na ni ‘ɲɔgɔn jagɛlɛya ye . . . , bɛɛ kelen-kelen bɛ jagɛlɛya sɔrɔ tɔw ka limaniya sababu la.’—Rɔm. 1:12.
3 Ni an bɛ to ka gafe-kalan lakɔlɔsibaga ka mɔgɔkalancogo jateminɛ, o bɛ se ka an dɛmɛ ‘ka tiɲɛ kuma walawala koɲuman.’ (2 Tim. 2:15) A b’i sinsin Bibulu tɛmɛsira sɛbɛnnenw kan cogoya min na, i ɲɛmada o fɛ i ka o dege. Ka kɛnyɛ ni gafe-kalanta cogoya ye, a bɛ se ka segin kolomayɔrɔw kan ni Bibulu dɔrɔn ye, k’o kɛ sinsincogo ye u kan. A ka kɛcogo ɲuman bɛ se ka an dɛmɛ an ka se ka dɔ fara an ka mɔgɔkalancogo ɲɛ kan, an ka cidenyabaara kɔnɔ.—1 Kɔr. 11:1.
4 Jɛkulu ka gafe-kalan lakɔlɔsibaga ka kan ka kibaru duman laseli fana ɲɛminɛ ka fara dɔgɔkun kalan kan. A ni baara lakɔlɔsibaga bɛ jɛ ka fɛɛrɛw tigɛ waajuli ta fan fɛ walisa k’a ka kulu kɔnɔmɔgɔ bɛɛ dɛmɛ u ka se ka u jɔyɔrɔ fa kerecɛnya baara la, min ye ka kibaru duman waajuli kɛ ani ka mɔgɔw kɛ kalandenw ye.—Mat. 28:19, 20; 1 Kɔr. 9:16.
5 Jɛkulu ka gafe-kalan ɲɛminɛbaga bɛ hami ni a ka kulu kɔnɔmɔgɔ kelen-kelen ka alako de ye. A bɛ o hami jira jɛkulu ka gafe-kalan ani forobaara waatiw la. Waati dɔw la, a bɛ se ka taa bɔ balimaw la u ka so walisa ka u jagɛlɛya alako ta fan fɛ. Bɛɛ ka kan ka se ka gɛrɛ ni nisɔndiya ye jɛkulu ka gafe-kalan lakɔlɔsibaga la, ka dɛmɛ ɲini a fɛ alako ta fan fɛ ni u mago jɔra o la waati o waati.—Esa. 32:1, 2.
6 An ka ɲɔgɔn kologɛlɛya: Yɔrɔ minnu na jamana ɲɛmɔgɔw ma sɔn Ala ka jamakulu ka baara kɛ, balimaw bɛ ɲɔgɔn dalajɛ ka kɛ kulu fitininw ye, ka u ka lajɛ kɛ. Balima dɔ y’a fɔ ko: “Hali ka sɔrɔ jamana ɲɛmɔgɔw ye an ka kerecɛnya baara bali, an mana waati o waati sɔrɔ, an tun bɛ an ka dɔgɔkun lajɛw kɛ, an tila-tilalen ka kɛ mɔgɔ tan-kulu walima mɔgɔ tan ni duuru-kulu ye. Alako ta fan fɛ, lajɛw bɛ barika caman don an na, a kɛra Bibulu kalan waatiw ye wo, walima ni an bɛ ɲɔgɔn fɛ lajɛw kɔ fɛ. Ko minnu ye an sɔrɔ, an tun bɛ olu suma ɲɔgɔn na, wa o ye an dɛmɛ k’a faamu ko gɛlɛya kelen de bɛ an kelen-kelen bɛɛ kan.” (1 Pi. 5:9) Nin cogo in na, an bɛɛ ka Jɛkulu ka gafe-kalan kɔkɔrɔdon ni an fanga bɛɛ ye, ka barika don ɲɔgɔn na.—Efe. 4:16.
[Questions d’étude]
1. Jɛkulu ka gafe-kalan daminɛra cogoya jumɛn na?
2. Cogoya jumɛn na, an bɛ se ka an sen don ‘ɲɔgɔn jagɛlɛya la’ jɛkulu ka gafe-kalan waati la?
3, 4. Jɛkulu ka gafe-kalan fɛɛrɛ tigɛlen bɛ se ka an dɛmɛ cogoya jumɛn na ka an ka cidenyabaara kɛ ka ɲɛ?
5. Mɔgɔ bɛ se ka tɔgɔla dɛmɛ jumɛn sɔrɔ gafe-kalan sababu la?
6. (a) An balima minnu bɛ jamana dɔw la, olu sera ka fanga sɔrɔ cogo di u kɛtɔ k’u ka lajɛ kɛ kulu fitininw kɔnɔ? (b) Aw yɛrɛ ye nafa jumɛnw sɔrɔ jɛkulu ka gafe-kalan fɛɛrɛ tigɛlen na?