Aw ka aw ka waleɲumandɔn jira

¹ Hali ni an bɛ ‘waati gɛlɛnw de la,’ kun caman b’an bolo ka Jehowa waleɲumandɔn. (2 Tim. 3:1) A kun bɛɛ la fɔlɔ ye ko Jehowa ye a denkɛ di an kosɔn. O ye fɛn sɔngɔ gɛlɛn ye, an bɛ a waleɲumandɔn kosɛbɛ min na. (Yuh. 3:​16) Ka fara o kan, k’a sɔrɔ mɔgɔ minnu bɛ diinɛ nkalonmaw na, kɔngɔba bɛ olu la Alako ta fan fɛ, anw bɛ ka dumuni camanba de diyabɔ Alako ta fan fɛ. (Esa. 65:13) An sen bɛ balimaya la min bɛ diɲɛ yɔrɔ bɛɛ la. Bonya fana dira an ma ka an ni don nisɔndiya baara la, n’o ye bato lakika yiriwali ye. (Esa. 2:​3, 4; 60:​4-​10, 22) Jehowa ye o dugawu camanba minnu lase an ma, an bɛ se cogo jumɛn na ka an ka waleɲumandɔn jira a la, olu ko la?​—Kol. 3:15, 17.

² An ka baara kɛ ni nisɔndiya ye ani ni an dusukun bɛɛ ye: Tuma min na Paul tun bɛ ka kuma nilifɛnw ko kan, a y’a sɛbɛn ko: “Min bɛ nili kɛ ni ɲagali ye, o de ko ka di Ala ye.” (2 Kɔr. 9:7) O sariyakolo bɛ sirataama fana an ka baara kɛcogoya la Jehowa ye. An b’an ka waleɲumandɔn jira Jehowa la an ka nisɔndiya fɛ tiɲɛ ko la, an ka nisɔndiya fɛ kerecɛn lajɛw la, an ka timinandiya fɛ foro cidenyabaara la, ani an ka nisɔndiya fɛ Jehowa sago kɛli la.​—Zab. 107:21, 22; 119:14; 122:1; Rom. 12:​8, 11.

³ Fɔlɔfɔlɔ Israɛl jamana na, nilifɛn minnu tun bɛ di Jehowa ma, Sariya tun tɛ hakɛ wajibiya u dɔw kan. Jehowa batobaga kelen-kelen bɛɛ tun bɛ se k’a ka waleɲumandɔn jira a kɛtɔ ka nili kɛ ‘ka kɛɲɛ ni Jehowa ka duba ye,’ a tigi ye min sɔrɔ ka bɔ Jehowa yɔrɔ. (Dut. 16:16, 17) O cogo kelen na bi fana, ni an bɛ Jehowa waleɲumandɔn an dusukun na, o bɛna an bila an ka an seko damajira kɛ Masaya-waajuli la, ani mɔgɔw kalanni la k’u kɛ kalandenw ye, ka kɛɲɛ ni an cogoya ye. Kalanbilawaati bɛ cogo wɛrɛw di an ma walisa an ka an ka waleɲumandɔn jira. Dɔw bɛ nafa bɔ kalanbilawaati walima sɛgɛnlafiyɛn waati la, u kɛtɔ ka dɔ fara u ka waati kɛtaw kan forobaara la, hali dɔw bɛ kɛ tutigɛbaga farankan ye. Yali aw fana bɛ se ka dɔ fara aw ka cidenyabaara kan kalanbilawaati walima sɛgɛnlafiyɛn waati la ɲinan wa?

⁴ Aw ka barikadali ka caya: An bɛ se ka barika da Jehowa ye cogoba min dɔ fɛ, o ye delili ye. (1 Tes. 5:17, 18) Ala ka Kuma b’a gɛlɛya an ma ko an ka ‘barikadali kɛ ni dannayaba ye.’ (Kol. 2:7) Hali ni an ka baara kɛtaw ka ca kosɛbɛ walima ko an bɛ kɔnɔgan na, an ka kan tuma bɛɛ ka barikadali don an ka don o don deliliw la. (Fil. 4:6) O la sa, an ka cidenyabaara ni an ka deliliw fɛ, an ka ‘an ka barikadaliw caya kosɛbɛ Ala ye.’​—2 Kɔr. 9:12.