Fɔlikan min bɛ mɔgɔ fanga kuraya
1 Dɔnkilida ani fɔli ye bato sɛbɛ yɔrɔ koloma dɔ ye. Israɛl kɔnɔ lawale la, Asaf ni a balimakɛw ye dɔnkili da ko: ‘Aw ka barika da Jehowa ye, jama. . . Aw ka dɔnkili da a ye, ka a tanuli dɔnkili da, aw ye aw mago don a ka dakabanakow la.’ (1 Til. 16:8, 9) Bi, an bɛ dɔnkili da Jehowa ye an ka jɛkulu ka dɔgɔkun lajɛw waati. (Efe. 5:19) O ye cogoya ɲumanba ye ka a tɔgɔ tanu dɛ!—Zab. 69:30.
2 N’an bɛ Mélodies du Royaume (Masaya ka fɔlikanw) lamɛn, n’o ye Masaya ka dɔnkili labɛnnenw ye fɔlifɔjɛkuluw fɛ (ɔrikɛsitiri fɛ), o bɛ se ka alako miiriyaw jigi an kɔnɔ. Balimamuso dɔ y’a fɔ ko: “Ni fɔlikanw bɛ ka bɔ, u kɔnɔna kumaw bɛ sin ka na ne kun na.” “E ma a dɔn o ye ko ɲuman ye, Jehowa miiriya ka na ne la ne dɔnkili lamɛntɔ!”—Fil. 4:8
3 U lamɛn waatiw: Ka Mélodies du Royaume lamɛn i ka so, o bɛ alako tin don denbaya kɔnɔ o bɛ a ka lafiya sabati. “Anw b’a lamɛn siɲɛ caman an ka so kɔnɔ ani an ka mɔbili kɔnɔ wa an tɛ sɛgɛn u lamɛnni na k’a masɔrɔ dɔnkili caman faralen don ɲɔgɔn kan minnu bɛ mɔgɔ kun minɛ” o ye denbaya dɔ ka kuma ye. “Tuma caman na Mélodies du Royaume de bɛ nisɔndiya di an ma, ni an bɛ ka an labɛn ka taa Kerecɛn lajɛw la walima ka taa lajɛw la dugu dɔ la.” Balimamuso dɔ y’a fɔ ko: “U lamɛnni bɛ nisɔndiyaba ani dusu don ne kɔnɔ ka ne to sokɔnɔbaara la—jɔnni tun bɛ se k’a miiri ko ne bɛ nisɔndiya sɔrɔ fini kolenw paseli ani u kuruli la? Ne b’a fɛ ka min don ne ka ko kɛtaw la, o ye ka dɔnkili in lamɛn ni ne dusu tiɲɛna. Dɔnkili in bɛ nisɔndiyaba de lase mɔgɔ ma! . . . A dɔnkili kelen kelen bɛɛ bɛ hɛrɛ de jigi mɔgɔ kɔnɔ.” O ɲɔgɔnna mɔgɔ-fanga-kuraya dɔnkili lamɛnwaatiw bɛ aw bolo minnu bɛ se ka aw nafa wa?
4 Bi dɔnkili caman bɛ da ni diɲɛ in ka miiriyaw de ye. Bangebagaw bɛ se ka u denw lamɔ cogoya la, walisa dɔnkili nafama ko ka diya u ye. U bɛ se ka o kɛ ni u bɛ baaraɲuman kɛ ni Mélodies du Royaume ye. Bibulu kalanden caman ani kibaru duman ka di mɔgɔ minnu ye, olu fana na nisɔndiya ka nin dɔnkili dumanw dɔn, dɔnkili minnu bɛ nɔɔrɔ da Jehowa kan, ka an hakili sankɔrɔta.—Zab. 47:1, 2, 6, 7.