Ka na lajɛw la tuma bɛɛ—O ye an ka ko fɔlɔ dɔ ye
1 Kerecɛn denbayaw bɛ u kuntilenna fɔlɔ kɛ nali ye jɛkulu ka lajɛw bɛɛ la. Nka ɲɛnamaya bɛ fɛn minnu ɲini an fɛ, olu bɛ se ka kɛ bi bi in na gɛlɛya ye an bolo. An ka sokɔnɔbaaraw, an ka baarakɛyɔrɔ, walima lakɔliso-baaraw, yali olu bɛ ka an ka waati dun an bolo wa, waati min latigɛlen bɛ Jehowa bato kama wa? Ni an bɛ kow filɛ iko Jehowa b’a filɛ cogo min na, o bɛna an dɛmɛ ka an ka kuntilenna sigilenw minɛ ka ɲɛ.—1 Sam. 24:7; 26:11.
2 Israɛlka cɛ kelen ye a dabɔ a kama ka taa dɔgɔ ɲini lafiyɛn don, o cogo la a y’i ban ka Jehowa ka kow filɛ cogo minɛ ni sɛbɛ ye. A bɛ se ka kɛ a y’a miiri ko ale bɛ ka a ka denbaya mago de ɲɛnabɔ walima a tun ma o miiri kojugu ye. A mana kɛ fɛn o fɛn ye, Jehowa y’a jira a ka kiri tigɛcogo fɛ o cɛ in kan, ko ka diɲɛbaaraw kɛ waati la min latigɛra alako kama o ye kojuguba de ye.—Nɔn. 15:32-36.
3 Gɛlɛya bɛ kunbɛn cogo min na: Mɔgɔ caman ka kan ka kɛlɛ yɛrɛ de kɛ walisa u ka baara kana se ka u ka lajɛ nali bali. Dɔw kumana u ka patɔrɔn fɛ, ka o gɛlɛya ɲɛnabɔ. Dɔw ye baarakɛwaati falen ni u baarakɛɲɔgɔnw ye. Dɔw ye baara wɛrɛw ɲini. Dɔw ye u ka ɲɛnamaya kɛcogo nɔgɔya. Siga t’a la, nin ɲɔgɔnna sarakaw kɛli bato sɛbɛ kosɔn, o ka di kosɛbɛ Ala ye.—Heb. 13:16.
4 Baara minnu bɛ di lakɔliso la ka kɛ, olu fana bɛ se ka kɛ gɛlɛyaw ye. “Ne bɛ ne ka lakɔliso-baara dilenw dɔw kɛ lajɛw ɲɛ, ka a tɔ kɛ ni ne nana ka bɔ lajɛ kɛyɔrɔ la,” npogotigi dɔ ko ten.
5 Ka jɛ ka baara kɛ ɲɔgɔn fɛ ani ka labɛnw kɛ ka ɲɛ, o de ye kɛcogo ye, min bɛ sokɔnɔbaara kɛli nɔgɔya walisa denbaya mumɛ ka se ka na lajɛw la, ka bɛn ni waati ye. (Nta. 20:18) Hali denmisɛnninw bɛ se ka dege walisa u ka u ka finiw don ka u labɛn ka kɛɲɛ ni bɔli waati dɔ ye. Bangebagaw bɛ se ka u yɛrɛw kɛ misali ye walisa u denw ka lajɛw nafa faamuya.—Nta. 20:7.
6 Nin diɲɛ in bɛ ka digi da mɔgɔw kan. Dɔ bɛ ka fara o kan ka taa a fɛ. Nafaba b’a la an ka na tuma bɛɛ lajɛw la. An ka taa a fɛ ka kow filɛ Jehowa ka ko filɛ cogo la, ka tuma bɛɛ lajɛw nali kɛ an ka fɛn fɔlɔ dɔ ye.—Heb. 10:24, 25.