Ɲininkaliw Jaabi

◼ An bɛ se ka jɛkulu ka lajɛw kɛ ka bɛn waati dilen ma cogo di?

Waati bɛ tɛmɛ joona ni an bɛ ka fɛn duman dɔ kɛ ni an teriw ye. O kosɔn, a bɛ se ka gɛlɛya ka lajɛ kɔnɔkow kɛ waati dilen kɔnɔ. Mun dun bɛ se k’an dɛmɛ?

A daminɛ waati fɔlen na. Ni jɛkulu kɔnɔmɔgɔw bɛɛ bɛ ɲɔgɔn lajɛ, a nafa ka bon k’a ɲini lamɛnbagaw fɛ u ka u sigiyɔrɔ magɛn sanga kelen walima sanga fila sanni kalan ka daminɛ. O cogo la, lajɛ bɛ se ka daminɛ waati fɔlen na, ani a daminɛcogo la. (Ekl. 3:⁠1) Lajɛ minnu mɔgɔw man ca, i n’a fɔ forobaara lajɛw, olu man kan ka daminɛ lɛrɛ fɔlen kɔfɛ walisa ka mɔgɔw makɔnɔ minnu bɛ se ka na waati sigilen kɔfɛ.

Labɛn koɲuman. Ka se ka to waati fɔlen kɔnɔ, o fɛɛrɛ dɔ ye ka kɔn k’i labɛn. Kalansen min dira i ma, o kun ye min ye tigitigi, i ka o to i hakili la cogo jɛlen na. A yɔrɔ kolomaw ɲini k’a ye, i k’i sinsin olu kan. A yɔrɔ minnu nafa man bon, i ka olu to yen. I ka kalansen ɲɛfɔ cogo nɔgɔn na. Ni ɲɛjiraliw walima mɔgɔ-ɲininkaliw sen bɛ a la, kɔn k’olu labɛn. N’i bɛ ka i yɛrɛ dege, i kan kɔrɔta, i ka waati jate.

I ka kalansen tila k’a kɛ tilayɔrɔ caman ye. Ni kalansen min dira i ma, o ye jɛmukan ye, walima ni baro don min bɛ kɛ ni lamɛnbagaw ye, i na a ye ko nafa b’a la ka i ka kalansen tila k’a kɛ tilayɔrɔ caman ye. I b’a fɛ ka waati hakɛ min kɛ a tilayɔrɔ kelen o kelen kan, i ka o latigɛ, k’o sɛbɛn i ka sɛbɛn kɛrɛ la. I ka waati latigɛlen kɔlɔsi, ka kuma ka bɛn o waati ma. N’i ka kalansen ye baro ye min bɛ kɛ ni lamɛnbagaw ye, i kɔlɔsi walisa i kana bin jan na ka ɲɛfɔli caman kɛ baro daminɛ na, fo yɔrɔ koloma minnu bɛ kɔfɛ, i bɛ wajibiya k’olu kɛ teliya la. La Tour de Garde ɲɛminɛbagaw ka kan ka waati dɔ to kɔfɛ, min bɛ bɔli kɛ, walisa kalan bɛ kuncɛ ni ɲininkaliw minnu ye, olu ka se ka kɛ. U ka kan fana k’u ɲɛmajɔ walisa u kana don dɔnkili laban ni kuncɛli delili waati kɔnɔ.

A Kuncɛ ka bɛn waati fɔlen ma. Ni lajɛ kɔnɔko ka ca, i n’a fɔ Baara ka lajɛ cogoya, kumakɛla kelen-kelen bɛɛ ka kan k’a dɔn lajɛ yɔrɔ min dira a ma, o bɛ daminɛ tuma min na ani o bɛ ban waati min na. Mun bɛ se ka kɛ ni a sɔrɔla ko lajɛ bɛ a fɛ ka tɛmɛ waati fɔlen kan? Balimakɛ kelen walima balimakɛ fila minnu bɛ lajɛ yɔrɔ tɔw ɲɛminɛ, olu bɛ se k’u ka baara kɛ waati surun tɔ kɔnɔ, u kɛtɔ k’u sinsin yɔrɔ kolomaw dɔrɔn kan. U tɛna yɔrɔw dɔw walawala. O cogo la, u bɛ se k’u ka kuma fɔta surunya ka to waati fɔlen kɔnɔ. Ka se ka o ko sugu kɛ, o b’a jira ko u ye karamɔgɔw ye minnu bɛ se kosɛbɛ.

An minnu ye lamɛnbagaw ye, an bɛ se ka balimakɛ dɛmɛ min bɛ kalan ɲɛminɛ, an kɛtɔ ka jaabi jɔnjɔn surunw di, ani jaabi minnu ni baro bɛ taa sira kelen fɛ. O la sa, an kelen-kelen bɛɛ bɛ se ka an se ko kɛ walisa lajɛw ka kɛ ‘cogo bɛnnen ni cogo ɲɛnabɔlen na.’​—⁠1 Kɔr. 14:40.