A’ ye aw ka waati minɛcogo kɔlɔsi
1 An bɛ masinw tile de la. O masinw bɛ dɔ bɔ baara la, ka waati caman di an ma. Nka, a bɛ mɔgɔ caman kɔnɔ ko u ka baara kɛtaw ka ca, ani k’u ka waati ka dɔgɔ. Yali e bolo a ka gɛlɛn ka delinako ɲuman mara alako ta fan fɛ wa? Yali i b’a fɛ ka waati caman sɔrɔ cidenyabaara kama wa? An bɛ se ka nafaba bɔ an ka waati la cogo di?—Zab. 90:12; Fil. 1:9-11.
2 Fɛn minnu bɛ an ka waati tiɲɛ, an k’a ɲini k’olu dɔn: An kelen-kelen bɛɛ ka kan ka jateminɛ kɛ an ka waati minɛcogo kan tuma ni tuma. Bibulu bɛ nin gɛlɛya an ma: “Aw ye aw kɔlɔsi ka aw taama cogo dɔn. Aw kana taama iko hakilintan, nka iko hakilitigiw, ka waati kunmabɔ, k’a masɔrɔ nin donw ka jugu.” (Efɛ. 5:15, 16) Ikomi ɲɛtaaba sɔrɔla kunnafoni-di-minɛnw na, o nana ni gɛlɛyaw ye. An ka o gɛlɛya dɔw lajɛ. Nafa bɛ ɔrdinatɛri ni arajomafɛnw na cogo o cogo, ni an m’an kɔlɔsi an ka waati minɛcogo la, o baarakɛminɛnw bɛ se ka kɛ jan ye an bolo.—1 Kɔr. 7:29, 31.
3 An kelen-kelen bɛɛ ka kan k’an yɛrɛ ɲininka ko: ‘Yali don o don, ne bɛ waati ta ka E-mail (Imɛli) kalan walima k’a jaabi bila ka taa k’a sɔrɔ u tɛ fɛn wɛrɛw ye fo ka mɔgɔ tɔɔrɔ dɔrɔn wa? Yali tuma caman na ne bɛ telefɔni ci walima ne bɛ sɛbɛnw bila ka taa o fɛ, fɛn nafantanw dɔrɔn ko la wa? (1 Tim. 5:13) Yali ne bɛ don Ɛntɛrinɛti kɔnɔ ka to ka a kɔnɔkow filɛ k’a sɔrɔ kuntilenna tɛ ne na wa? Walima ne bɛ n yɛrɛ ye telewisiɔn ɲɛfɛ, ka to ka a jaw yɛlɛma-yɛlɛma wa? Tulon minnu bɛ kɛ ɔrdinatɛri ani arajomafɛnw na, yali olu ye ne hakili minɛ fo ne bɛ waati min ta ka Ala ka Kuma kalan, o tulonw bɛ ka o waati bɛɛ minɛ ne na wa? Ka to ka nin fɛn ɲɛfɔlenw kɛ, o bɛ se ka an ka alamɔgɔya tiɲɛ an ɲinɛ ma.—Nt. 12:11.
4 An ka an ka waati kɛ ni hakilitigiya ye: Arajomafɛnw ka teli ka an ka waati ni an ka ɲɛmajo bɛɛ ta. Kamalennin dɔ min hakili bɛɛ tun bɛ ɔrdinatɛri tulonw na, a sɔnna a ma, ko: “Tuma dɔw la, ni ne tun ye tulon kɛ ka sɔrɔ ka taa cidenyabaara la, walima ka taa Kerecɛn lajɛ dɔ la, ne b’a ye ko a tun ka gɛlɛn ne bolo kosɛbɛ ka ne hakili sigi lajɛw fɛ walima ne ka cidenyabaara fɛ. Ne tun bɛ miiri tuma bɛɛ ne tun bɛna se ka ɔridinatɛri tulon gɛlɛn dɔ kɛ ka ɲɛ cogo min na, ni ne seginna so. Ne ka yɛrɛkalan ni ne ka Bibulu kalan yoboyabara kosɛbɛ o fɛ. Dɔ tun bɛ ka bɔ ne ka nisɔndiya la Ala ka baara kɛli la.” Kamalennin kɛlen k’a dɔn ko a tun ka kan ka yɛlɛma don a ka kow la, tulon minnu tun bɛ a ka ɔrdinatɛri la, a sinna ka olu bɛɛ bɔ o la yɔrɔnin kelen. A hakili tora o la. A ko: “O ma kɛ ko nɔgɔn ye fewu. Ne tun m’a miiri ko tulon tun diyara ne ye fo ka se nin hakɛ ma. Nka, a kɛra ne bolo sesɔrɔ ye bawo ne tun b’a dɔn ko ne ye o kɛ ne yɛrɛ de ka nafa kama.”—Mat. 5:29, 30.
5 Ni yɔrɔw bɛ yen yɛlɛmaw ka kan ka don minnu na, a ka kan nin yɛlɛma suguw ka kɛ o yɔrɔw la. An bɛ waati min ta ka kow kɛ minnu tɛ wajibi ye, yali an bɛ se ka lɛrɛ tilancɛ ta ka bɔ o waati la, don o don wa? O ye waati ye i mago bɛ min ɲɔgɔn na, don o don, walisa ka Bibulu kuuru bɛɛ kalan san kelen kɔnɔ. Siga t’a la o bɛna kɛ fɛn nafamaba ye i bolo alako ta fan fɛ dɛ! (Zab. 19:7-11; 119:97-100) O la sa, waati hakɛ dɔ latigɛ, k’o kɛ ko basigilen ye walisa ka Bibulu kalan, ka lajɛw labɛn, ka taa cidenyabaara la. (1 Kɔr. 15:58) N’i bɛ o kɛ, o bɛna i dɛmɛ ka se sɔrɔ fɛnw kan minnu bɛ an ka waati tiɲɛ, k’i dɛmɛ “k’a faamu ka taga a fɛ, Jehowa sago ye min ye.”—Efɛ. 5:17.
[Study Questions]
1. Mɔgɔw mana kɛ yɔrɔ o yɔrɔ la, u bɛ gɛlɛya jumɛn sɔrɔ bi?
2, 3. Kunnafoni-di-minɛnw bɛ se ka na ni gɛlɛya jumɛnw ye, wa, an kelen-kelen bɛɛ bɛ se k’an yɛrɛ sɛgɛsɛgɛ o yɔrɔ la, cogo di?
4. Kamalennin dɔ ye yɛlɛma jumɛn don a ka kow la, ani mun na?
5. An bɛ se ka waati kunmabɔ cogo jumɛn na alako ta fan fɛ kuntilennaw kama, ani an bɛ nafa jumɛn sɔrɔ o kɛli la?