An ka Jehowa ka ɲumanya ladege
1 Ni sanji nana ka yɔrɔ bɛɛ sumaya funteni tuma na, walima ni an tilara dumuni duman dɔ kɛli la, yali o t’an bila ka barika da Jehowa ye wa? Ɔwɔ, an bɛ barika da Jehowa ye bawo ale de ye ɲumanya bɛɛ Tigi ye. Jehowa ka ɲumanya b’an bila an k’a kanu an dusukun na k’a ladege. (Zab. 119:66, 68; Kɛw. 14:17; Efɛ. 5:1) An bɛ se ka ɲumanya kɛ ka ɲɛsin mɔgɔw ma cogo jumɛn na?
2 Ka ɲɛsin dannabaliw ma: An bɛ se ka Jehowa ka ɲumanya ladege cogo min na, o dɔ ye ka hami sɛbɛ la mɔgɔw la minnu tɛ an balima dannabaaw ye. (Gal. 6:10) Ni an bɛ ɲumanya kɛ ka ɲɛsin u ma cogo nafamaw na, o bɛna u bila ka hakili ɲuman sɔrɔ Jehowa Seerew kan ani an ka cikan kan.
3 Misali la, tutigɛbaga funankɛ dɔ taara dɔgɔtɔrɔso la. A bɛ ka makɔnɔni kɛ tuma min na walisa u k’a wele ka don dɔgɔtɔrɔ fɛ, a y’a ye ko muso min bɛ a kɛrɛfɛ, o tɔɔrɔlen bɛ kosɛbɛ ka tɛmɛ tɔw kan. Tutigɛbaga dontuma sera tuma min na, a y’a to muso ka don a nɔ na. Kɔfɛ, a ni o muso kelen bɛnna sugu la. Tutigɛbaga yeli diyara muso ye kosɛbɛ. Muso tun ma sɔn kibaru duman na fɔlɔ. Nka a y’a fɔ tutigɛbaga ye ko a b’a dɔn sisan ko Jehowa Seerew bɛ u mɔgɔɲɔgɔnw kanu tiɲɛ na. O la sa, a sɔnna ka Bibulu kalan daminɛ. A ka kalan bɛ kɛ tuma bɛɛ.
4 Ka ɲɛsin an balimaw ma: An bɛ Jehowa ka ɲumanya ladege ni an bɛ an seko damajira kɛ walisa ka an balima dannabaaw dɛmɛ. Ni kasaara kɛra, an bɛ mɔgɔ fɔlɔw la minnu bɛ na u dɛmɛ. An bɛ o hakili sugu kelen jira ni cogo tɛ an balimaw bolo ka taa lajɛw la. An bɛ u dɛmɛ u ka se ka taa lajɛw la. Ni an balimaw ye dɛsɛbagatɔw ye farikolo la, an bɛ taa bɔ u ye. Ni an tɛ balima dɔw dɔn ka ɲɛ jɛkulu kɔnɔ, an b’a jira olu la ko an bɛ u kanu.—2 Kɔr. 6:11-13; Heb. 13:16.
5 Jehowa bɛ ɲumanya jira cogo wɛrɛ fana na, o ye ko a bɛ ‘sɔn ka yafa.’ (Zab. 86:5) An k’a jira ko an fana bɛ ɲumanya fɛ, an kɛtɔ ka Jehowa ladege, ka yafa ɲɔgɔn ma. (Efɛ. 4:32) O b’a to anw ni an balima dannabaaw ka jɛɲɔgɔnya ‘bɛ diya kosɛbɛ.’—Zab. 133:1-3.
6 Jehowa ka ɲumanyaba ka kɛ sababu ye k’an bila an k’a tanu fo ka ɲagali, ka kɛ mɔgɔw ye minnu ka nisɔndiya bɛ ye u ɲɛ kan. O ka an bila fana ka an cɛsiri ka Jehowa ka ɲumanya ladege an ka ko kɛtaw bɛɛ la.—Zab. 145:7; Jer. 31:12.